الجمعة، 1 أكتوبر 2010

تشبهه.........ولكن


فاكر اول مرة شفتك فيها ...؟


ساعتها كنت هموت من الرعب , صحيح انا يومها مكلمتكش ولا حتي وقفت معاك ويمكن انت كمان مخدتش بالك مني , انت يعني هتاخد بالك مني ازاي وسط الناس دي كلها اللي كانت في المعرض , انا فاكرة اني يومها روحتلك المعرض من غير ما اقول لسوسن عشان متقولكش وتستناني وانا كنت خايفة من لقائي معاك , مش خايفة منك تحديدا لكن خايفة من اي لقاء باي رجل , صحيح كنا نعرف بعض من خلال سوسن لكن احنا مشفناش بعض ولا مرة , صحيح بيقولوا " الاذن تعشق قبل العين احيانا " ويمكن هو ده اللي حصلنا ......وده اللي حسيته وخفت منه ...., لكن خوفي من علاقة جديدة وحب جديد خلاني محاوطة نفسي بحاجات كتيرة واقفال كتيرة ...


فاكرة يومها اني روحت المعرض عشان اشوف لوحاتك , او لوحاتك اللي استلهمتها من كلماتي زي ما قالت لي سوسن ,كان عندي فضول لآري كلماتي وقد رسمت لوحات ملونة , وايضا لآراك فالكلام الكثير عن شخص ما يجعلنا فضولين لنراه , صحيح احنا بنحاول نرسم له صورة في ذهننا , لكن مش كل مرة بتنجح الصورة دي في الحقيقة , ولم اكن اعرف عنك الكثير , فلم اكن اعرف سوي انك صديق لخطيب صديقتي واخوها وهي دائمة التحدث عنك وعن رسوماتك , وكما تتحدث عني لخطيبها واخوها ولك ايضا في زيارتك لهم وبالطبع كانت تنقل بعض من كلماتي لهم ولك في بعض الاحيان , كلماتي التي كانت هي لقائنا الاول , كلماتي التي اوحت لك بفكرة اكثر من لوحة من رسوماتك ....


كم من مرة الحت علي سوسن للقاءك , كم من مرة دبرت موعدا لنا واعرف به فاهرب منه , لم اكن اعرف لما افعل هذا , هل لانني مررت بتجربة مؤلمة اخشي من ما قد يحدث بعدها ...؟؟؟ لا اعرف


اتذكر قبل ان اذهب اليك في المعرض انني وسوسن كنا نخرج من العمل وهي تحاول اقناعي بأن نذهب اليك في المعرض غدا بعد العمل بل واعطتني بطاقة عليها عنوان المعرض و ارقام تليفوناتك , كانت شايفة اني لو كلمتك قبل ما نتقابل هكون في حالة افضل , بس انا بعد ما افترقنا في المترو لقيتني بنزل قبل محتطي بمحطة واحدة واغير المترو واجيلك المعرض .....


دخلت من الباب وانا مترددة , كان في ناس كتير اكيد ناس يعرفوك ونقاد وكتير من اصحابك , فضلت واقفة عند المدخل مترددة وخايفة اسأل عنك , ويا تري هتبقي ملامحك اية ..؟ وهقولك اية ..؟


وانا واقفة مترددة صدمني شاب يدخل مسرعا والتفت ليعتذر لي ....


ولكني ما ان رأيت وجهه حتي اصابني الفزع والخرس .......ولم ادري بنفسي الا وانا اجري خارج القاعة ....ومنها الي محطة المترو .....الي البيت ...


* * * * * * * * * *


فاكر اول مرة شوفتك فيها , صحيح هي مكملتش نص دقيقة لكن كانت كافية لان اعرف انك انت هي " نسرين"


نسرين اللي "محمود" واحمد" وسوسن كلموني عنها كتير , نسرين اللي سوسن كانت بتسمعني كلماتها طول الوقت , نسرين صاحبة الكلمات التي الهمتني لوحات معبرة حية نشيطة وتتمتع بروح طليقة , لدرجة اني سميت المعرض " كلمات" , كنت بتمني انك تكون موجودة يوم الافتتاح بعد ما كام مرة اخجلتيني ومجتيش مع سوسن ومحمود واحمد في لقاءات اعرف ان سوسن دبرتها للقائنا وانت هربتي منها , برغم ذلك بعت لك دعوة مع سوسن وكمان كارت فيه كل ارقام تليفوناتي , كنت بتمني اسمع صوتك , كل مرة كان موبايلي يرن برقم غريب قلبي يدق واقول انت ...لكن يخيب املي...


من اول يوم للمعرض وانا بستناك وانت مجتيش , دعيت كتير انك تيجي ولو مرة واحدة واتمنيت انك تكوني لوحدك من غير سوسن ومحمود واحمد , ولغاية ما مرت نصف الايام المحددة للمعرض , وبدأ حماسي واملي يفتر من اني لن اراك .....حتي كان ذلك اليوم الذي كنت قد خرجت من المعرض لشييء ما وعندما دخلته ثانية اصطدمت بفتاة جميلة تقف وحدها , وعندما التفتت لأعتذر لها وجدتها انت ...كنت اعرف انها انت حتي وان لم ارك قبلها ابدا , كنت اعرف انك هي برغم انها كانت لمحة واحدة فقط قبل ان تخرجي مسرعة حتي مع ندائي عليك.....,انت كنت بتجري كدة لية ....؟


....................


في الكافتيريا اللي اتعودوا يتقابلوا فيها لو حبوا يبعدوا عن جو الشغل والبيبت كانوا هناك و


ضحكت سوسن وهي تستمع لنسرين وكيف خرجت من المعرض مرعوبة لمجرد ان رأت من يشبه خطيبها السابق الذي مات في حادث سيارة .....


" انت مش هتنسي خطيبك ده بقي يا بنتي ....؟ ده مات من سنتين , يعني تعيشي حياتك وتحبي وتتحبي وتفرحي مش تفضلي عايشة في جو بين الاطلال ده "


" يا سوسن انت مش فاهمة حاجة "


" طيب يا عاقلة انا مش فاهمة فهميني انت , بقالك سنتين مالكيش كلام مع اي حد الا في الشغل وبس ولا عمرك سيبتي حد يقربلك ولا عمرك اديتي لنفسك فرصة حتي انك تعجبي بحد مش انك تحبيه ...!! , لية كدة يا نسرين ؟ ! عشان حب قديم انتهي خلاص ومش راجع تاني ؟! شوفي بقي يا نسرين م الاخر كدة انا عزمت "هاني" علي الشاي وهو هيجي دلوقت .....علي فكرة هو جاي هناك اهو ....خلاص بقي وراكي ...


...........................................


" نسرين .....انت لية يوم ما اتقابلنا متكلمتيش جملتين علي بعض ؟ فضلت موطية راسك ومن تحت لتحت تبوصيلي , كنت عاملة زي عروسة في جواز صالوناتي عايزة تشوف عريسها اللي اختارته لها العيلة ومش عارفة تشوفه , فضلتي ترسمي خطوط ودواير علي المجلة اللي كانت معاك وتردي علي اسئلتي ب آه و لاء وكأنك مش عايزة تكلمني وانك كرهتيني من اول ما شوفتيني ...


...... .............. ................


" يشبه " محسن " .....صرخت سوسن بهذه الكلمات في وجه نسرين الواقفة امامها كتمثال ثم قالت لها " طيب انا لية مخدتش بالي من الشبه ده ؟ وانت بس اللي خدت بالك , ويا تري هو ده السبب اللي خلاك لما شوفتيه اول مرة في المعرض تجري وتسيبيه ؟ ولما كنا مع بعض متكلمتيش ولا كلمتين علي بعض بسبب انك شايفة انه شبه محسن والله انت مجنونة "


" سوسن انا مش مجنونة, انا مش عارفة ازاي انت مخدتيش بالك من انه يشبهه "


" والله انا ....مش عارفة ......صحيح هو يمكن يكون فيه شبه منه ...بس ..."


" بس اية ...؟ ده يمكن يكونوا نسخة واحدة ..."


" لاء مش نسخة واحدة ولا حاجة ...انت اللي عايشة في وهم اسمه محسن وعايزة الناس كلها تكون شبهه"


" لاء انا مش بعمل كدة , انت مش فاهمة حاجة "


" تاني هتقوليلي مش فاهمة حاجة , طيب فهميني , شوفي يا نسرين انت مش عاطية نفسك الفرصة لاي حاجة وانا مش هسيبك كدة , اية رأيك نروح لهاني المعرض بكرة ونتكلم في اي حاجة وكل حاجة وبالمرة اشوف اذا كان فعلا شبه محسن والا دي تهيؤات منك وخلاص وفي نفس الوقت انت تكوني عرفت الشخص ده شوية وتقرري ساعتها تكملي والا متكمليش...اية رأيك ..؟ فكرة حلوة ...صح"


" اوك ...خلاص نروح بكرة .......بس بشرط..."


"اية...؟ "


" متتكلميش في حاجة خاصة عني ...كلامي عادي وبس "


"اوك...اتفقنا"


...... ............. ..................


في المعرض ....


كانت اللوحات جميلة جدا لدرجة ان نسرين لقت نفسها بتتكلم مع هاني بتلقائية وبساطة كأنها تعرفه من زمان برغم انها في الاول كانت مرتبكة ومش عارفة تقول اية ......


كانت رسومات هاني اللي اخد فكرتها من كلماتها في غاية الروعة ولا تدري كيف عبر عن كل قصيدة لها برسوم كهذة غلبتها هي نفسها في تعبيراتها الرقيقة ......


في نهاية اليوم كانوا اتبادلوا ارقام الموبايلات , مع وعد بالكلام .....عن الكلمات والرسومات


............ .................. ....................


" ياااااااااة يا نسرين تصدقي فعلا انه يشبه محسن ....بس علي فكرة مش اووي يعني , انا ازاي مخدتش بالي من الشبه ده ...؟؟!!.... واشمعني انت يعني اللي تاخدي بالك؟"


" مش عارفة والله يا سوسن ...! انا اول ما شفته حسيت اني بشوف محسن , بس تعرفي انه رسام رائع فعلا , شوفتي اللوحات بجد روعة "


" ده لولا انه اهتم بيكي اصلا مكنش رسم اللوحات دي ولا فكر فيها , اشكريني انا يا بنتي لاني انا اللي الهمته بالرسومات دي لاني انا اللي كنت بكلمه عنك"


" هههههه شكرا يا ستي ...مشكورة كتييير ....يلا بقي اشوفك بكرة في الشغل "


.............. ................. ................


الصبح بدري والفجر لسة بيشقشق....صحتها رنة الموبايل ولقيته هو........


" الو ...صباح الخير "


" صباح الورد يا نسرين .....اكيد صحيتك م النوم ....معلش ممكن اشوفك قبل ما تروحي الشغل ...؟ ضروري ....مش عايز ردك يكون بالرفض "


"اممممم....انت فاجأتني .....بس .....اوك ....نتقابل فين...؟ "


"اية رأيك نفطر سوا في كافيتريا "الزهور؟ كمان ساعة "


" كمان ساعة ....خلاص ...اوك...كمان ساعة"


...... ................ ......................


انت لية يومها فضلت تشخبطي وترسمي اسهم وخطوط متقاطعة علي الجريدة اللي انا جبتها معايا ؟ بس ده ان دل علي شيء فكان علي انك متلخبطة او مترددة ...


بس انا كنت سعيد اليوم ده عشان شفتك لوحد واتكلمت معاك , قدرت اشوفك واعرفك لوحدي مش من كلام سوسن عنك , يمكن اكون عرفتك من كلماتك , لكن يومها حسيت اني بعرف انسانة حقيقية مش انسانة بس مجرد كلمات .....


تعرفي ان يومها روحت رسمتك ....او بدأت في لوحة رسمت فيها بعض ملامحك, وكل يوم كنا نتكلم او نتقابل ارسم جزء منها لغاية ما كملتها ....


........... ..................... .....................


عارفة ان اول مرة نتقابل فيها كنت غريبة ويمكن كنت بايخة , بس بجد مش عارفة لية كنت خايفة ...كنت شايفة انك ومحسن زي بعض ما دام فيكم شبه من بعض ...كنت خايفة منك لا تكون زيه , الناس فاكرة اني كنت بحبه اووي لدرجة اني مش هعرف اعيش من غيره و بعد ما مات , وناس تانية فاكرة اني مدام خطيبي مات اني هكون شؤم علي اي حد اتخطب له , ناس غيرهم اعتبروا عدم رغبتي اني اتعرف بحد او احب حد هو تعلقي بحبه واني لسة محافظة علي ذكراه....لكن الحقيقة غير كدة خااالص , انا ومحسن كنا علي خلاف من فترة كبيرة لاني اكتشفت انه انسان تاني غير اللي عرفته , انسان مختلف وللأسف للأسوء, وده خلاني افسخ الخطوبة اكتر من مرة بس هو كان كل مرة يلف لي انه هيبقي احسن وانا اصدقه واقول خلاص اعطيه فرصه تانية , وللأسف يرجع تاني للأسوء, فضلنا كتير علي الوضع ده يعمل حاجات كتير غلط وانا اسيبه ويرجع يتأسف لي وبعدها يرجع يعملها تاني ....تعبت , تعبت اووي, لغاية يوم الحادثة اتخانقت معاه كتير وعطيته الدبلة وقلت له ان كل شيء بينا انتهي واني استحالة ارجعله تاني او اسامحه .......خصوصا انه المرة دي كانت خيانة ...ومع صديقة للأسف كنت بعتبرها صديقة وفية ....حسيت بعد ما عرفت انه مات في حادثة اني السبب بشكل او بأخر , زعلت من نفسي اووي وحملت نفسي ذنب انا مش قادرة عليه , لكن مع مرور الوقت لقيتني بعيش حياتي ...بس مش زي ما انا عايزة برضه لاني كل ما كنت اعجب بشخص الاقيني اشوفه شكل محسن ....


حتي انت اول مرة شفتك , ولما جينا المعرض انا وسوسن , ولما اتقابلنا بعدها ....


بس مع كل يوم كان بيمر كانت الصورة بتوضح اكتر ....


لما كل يوم كنت تكلمني الصبح , كنت اول صوت اسمعه , كنت اشوف صورة محسن وملامحه وحياتي معاه, شوية شوية لقيت صورة محسن بتروح وملامحك انت بتتكون ادامي والصورة بتوضح وتترسخ جوايا ........ومبقتش اخاف انك تكون شبهه...


تفتكر اننا حبينا بعض لما سمعنا عن بعض ......؟ يعني زي ما بيقولوا الاذن تعشق قبل العين احيانا....والا هي الحياة اللي بتعطينا في وقت بنحسب انها مش ممكن تعطينا فيه اللي كنا بنحلم بيه ؟ والا هي الدنيا وتقلباتها ؟ والا هو القدراللي ربنا كتبه لينا من اول ما اتخلقنا واحنا مكوناش نعرفه او كنا بندور علي بعض في قدر مرسوم لينا من زمان وكان لابد اننا نكمل الصورة ...


مش مهم ...مش مهم هي الدنيا والا الحياة والا القدر ...المهم اننا مع بعض واننا نصين واكتملوا ......حتي ولو كان في البداية مجرد شبه....






رحاب صالح


اول اكتوبر 2010









هناك 24 تعليقًا:

  1. حلوة قوي

    قوي بجد

    مش لاقيه كىم اقوله غير اني سرحت بجد فــ الحدوته دي

    تسلم ايدك يا رحاب

    فنانه انتي

    ردحذف
  2. جميلة بجد يا رحاب
    أسلوبك ف السرد هايل
    تسلم إيدك .. بس يمكن اتشتت شوية ف النص كده .. بس أنتي عرفتي تنهيها كويس وبحرفية عالية جداً كعادتك

    :)

    خالص تحياتي وعميق احترامي وتقديري

    ردحذف
  3. انا مش ح اتكلم عن الحدوتة

    بس ح قولك ان احسن حاجة حاصلة انك بقيتى متواجدة على النت اكتر من الاول كتير

    و ده بيطمنا عليكى يارحاب

    ردحذف
  4. حسيت كاني بأتفرج على فيلم رومانسي الانتقال بين الرواة كان يتم بسلاسة وهدوء
    النهاية سعيدة هذه المرة والنهاية السعيدة تجعلنا ننهي القراءة بشعور جميل
    يسلم قلمك يارحاب

    ردحذف
  5. بصراحه \
    اولا
    انتى كاتبه مميزه
    ونواه
    لكاتبه عظيمه زى سكينه فؤاد بجد
    ومن غير مبالغه
    ثانيا
    السرد هايل وجميل بس نوع الخط بجد بتوه فى الكلام ياريت الخط يكبر شويه
    ثالثا
    اسلوب الكتابه رائع
    بالنسبه للقصه
    جميله ورمانسيه

    مش مهم ...مش مهم هي الدنيا والا الحياة والا القدر ...المهم اننا مع بعض واننا نصين واكتملوا ......حتي ولو كان في البداية مجرد شبه....

    بس

    المه القلب
    قال ايه
    موفقه دائما
    ياريت
    يا
    رحاب
    تكبرى الخط شويه

    وتكونى
    من زائرين مدونه باحث

    شرفت انى موجود هنا
    بجد
    ومتشوقين للجديد

    ردحذف
  6. عادة لا أكمل القصص الطويلة، ولأني أمل بسرعة، لكن قصتك هاته استثناء، فتسارع الأحداث جعلتني ألهث، ومضمون القصة ترك الفضول يعتريني حتى أعرف الخاتمة..

    صراحة، قصة رائعة..

    كنت هنا..

    ردحذف
  7. جميله جدا
    وسردك للاحداث رائع
    تسلم ايدك

    ردحذف
  8. هى دى بأه القصص اللى دون المستوى

    احب اقولك يا استاذه ان القصة رائعة
    وسردكولا أجمل والاجمل والاجمل انك من البداية كنتى عايزه تثبتى مقولة معينة (الأذن تعشق أحيانا قبل العين)

    وده اللى قدرتى تعمليه
    بجد بحييك شوفتى طلعت انا مش حاجه جنبك بطلوا تواضع بأه

    ردحذف
  9. رحاب والله والله والله انا قرات القصة كلها ومتأكده انى علقت عليها معرفش ازاى التعليق مش موجود ارجوك اعزورينى بس بجد التوبيك تحفه والقصه جامده وطريقة سردك ولا اروع تقبلى مرورى يا قمرى

    ردحذف
  10. كركبة دماغ
    نورتيني يا عسولة
    وميرسي يعلي زوقك
    بس بجد انا كتبتها من ثلاث شهور فاتوا وبعدين معجبتنيش فمستحتها وكتبتها اتي واكتر من مرة لغاية دلوقت برضة مش حاسة اني طلعت اللي كان في دماغي وقت ما فكرت في القصة ....ميرسي علي مرورك يا جميلة ويارب متنقطع الزيارة

    ردحذف
  11. شريف باشا
    يلا هلا يا هلا
    مرحب مرحب بشريف باش ...فينك من زماااااااان والا الخطوبة اخدتك مننا ..؟
    بجد مش عارفة اقولك اية يا شريف انت قريت قصة لي قبل كدة وغلبتني فيها وقولتلي روعة وانت كنت عارف انها فازت في مسابقتين قبل كدة ...بس مش عارفة دي مش حاسة باني طلعتها زي ما انا عايزة ....عموما متشكرة جدا لمرورك ولرأيك وانا لسة فاكرة وعدي وهنزل القصة قريب

    ردحذف
  12. تيرز
    انا متواجدة لاني الحمد لله احسن دلوقت
    الفترة اللي فاتت كانت بجد متعبة جدا بالنسبة لي بس الحمد لله علي كل شيء ...اشكرك علي تواجدك وسؤالك

    ردحذف
  13. خواطر شابة
    والله بجد انا كتبتها اكتر من مرة وبأكتر من طريقة ويمكن حسيت كل مرة لما امسحها وارجع اكتبها تاني ان الاول كان احسن ...بس مش عارفة ويمكن لغاية دلوقت ...بس بجد مبسوطة من كلامك كتيييير

    ردحذف
  14. محمود
    بلاش والنبي الكلام ده
    انا مش بقول كدة تواضع ولا اني مش واثقة في نفسي ...لكن بجد بحب اني اكون افضل ...وبجد حاسة اني مش بطلع اللي جوة دماغي زي ما انا عايزة ...ويارب يسمع منك واكون زي ما انت بتقول ...ميرسي لكلامك

    ردحذف
  15. خالد ابيجيك
    بجد انا كمان ممكن ازهق من القصة لو ملقتهاش سلسة او ما اثارت مشاعري من الاول ...وبجد بتشكرك كتير لكلامك ولمرورك

    ردحذف
  16. عمرو يسري
    الله يخليك
    دا انت اللي احسن وبجد مدونتك وافكارك جميلة كتير

    ردحذف
  17. م . حجاز
    اهلا اهلا بالزائرين لنا اول مرة
    ميرسي جدا لكلامك وبجد انا مش غرور ولا تواضع بس رحم الله امريء عرف قدر نفسه ...وانا بحاول اني اكون زي ما انا عايزة ...واتمني اني اصل لما احب والناس تحبني وتقرأ لي كما ارجو ...شكرا لزيارتك

    ردحذف
  18. منة
    يا حبيبتي ولا يهمك
    اصل النت اليومين دول غبي حبتين تلاتة ...
    وبعدين منوراني انت ولا حتي من غير تعليق

    ردحذف
  19. جااااااااامدة اوووي


    عجبتني جددااا بجد

    ردحذف
  20. جااااااااامدة اوووي


    عجبتني جددااا بجد


    :)

    ردحذف
  21. حوبتي الحلوه
    ^^

    أنا طبعا قولتلك رأي على الهوا في الموبايل .. لأنها بجد أبهرتني

    وتعرفي لو تقولي إني بجاملك هاعمل فيكي إيه ... هاضربك ضربايه صغننه ههههههههههه

    بجد يارحاب كل مره إسلوبك بيتحسن كتيير وبيبقى لذيذ

    يااارب أشوفك كاتبة قصص قد الدنيا قولي أمييييين
    ^_^

    ردحذف
  22. قطرة وفا
    ميرسي علي زوقك يا جميل
    انت الاحسن دوما

    ردحذف
  23. غيووووووووووووودة حبيبتي
    ^-^....وش مكسوف كدة
    يا بنوتة انت بلاش كدة بجد انت بتخليني اتغر في نفسي بجد
    ربنا يخليك ليا يا اعز صديقة واخت

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين