الأحد، 10 أكتوبر 2010

حـــــــــــــــلال .....وحـــــــــــــــــــرام


كتير بندور علي الحلال والحرام , والمشكلة ان كل الناس دلوقتي بتفتي ف الفاضي والمليان ...تخيلوا انا وثلاثة من صحباتي خارجين من الامتحان ووقفنا تاكسي وجينا نركب فوجئت بالسواق بيقولنا " معلش يا اخوات ممكن كلكم تقعدوا في الكرسي اللي ورا ومفيش حد يقعد جنبي " انا استغربت اووي قلت له " لية ؟ قاللي عشان مينفعش بنت تقعد جنبي حرام ...دي تعتبر خلوة ...." انا لما قلت لآخويا فضل يضحك ويقولي ده واحد مجنون ...خلوة اية ...طيب يكتب ع التاكسي للرجال فقط
*****************
اتنين من صديقاتي
صديقة تكلمني من تليفون العمل كل يوم وبالساعة واكتر ...وتقوللي ما هو ببلاش وبعدين دي حكومة عايزة الحرق ولازم نستغلها زي ما بتستغلنا ...اقول لها بس ده حرام ...خصوصا انها مش نتتكلم في حاجة مفيدة ....يعني بترغي علي الفاضي والماليان لغاية ما وقت الشغل ينتهي ...تقوللي لاء مش حرام ...
اما صديقتي الاخري ...صحيح انها تكره الحكومة جدا جدا وصحيح انها تؤمن تماما ان اي خسارة للحكومة لا تشفي غليلها ولكنها لا تكلمني من تليفون العمل الا للضرورة وليس للكلام فقط....
***********
قالها بكل بساطة شغلك مع الراجل ده حرام لانه مسيحي ...
كان ردها ...بس ده محترم جدا وبعدين ده عمره ما قالي كلمة وحشة ودايما سايبني براحتي اشغل قرأن وووقت الصلاة يخليني اروح الجامع اصلي وبعدين انا مش لوحدي انا معايا ناس تانين كلهم مسلمين هو صاحب الشغل بس المسيحي ...
قالها تاني ...حرام وكل الفلوس اللي انت اخدتيها من الشغل دي حرام حرام حرام...
******************
دايما كانو يخوفونا من ركوب التاكسي في القاهرة ويقولوا هيضحكوا عليكم عشان انتم بنات وكمان مغتربات ومش هتعرفوا تخلصوا منهم لما ياخدوا منكم في المشوار ثلاثين جنية ...افتكرت كل الكلام ده وانا واقفة مع صحباتي مستعجلين ومتأخرين ...وكمان مفيش ولا تاكسي راضي يقف...في الاخر واحد وقف ...وركبنا ....واول شيء اخدت بالي منه انه مسيحي ...ميدالية المفاتيح بتاعته معلق بها صليب انيق جدا لفت نظري........حسيت بهواجس وخوف من شيء ما ....طردته من عقلي وقلت ...يارب  خير ....ولما وصلنا للمكان بتاعنا سألته كام لو سمحت ...رد ...خمسة جنية ....مصدقتش نفسي .......وقلت في نفسي غريبة جدا طيب....في شيء ...وشيء ...اشياء ....بس بجد حسيت اني في واقع غير اللي بيرسموه لينا الناس التانين...
***************
قلت لصديقتي " طبعا حرام حرام جدا ....انت عطيتيه رشوة يا سلوي ...والراشي والمرتشي في النار.."
قالت لي " يا رحاب مكانش ادامي غير كدة ....وبعدين في شيخ قال اذا مكانش ادامك غير انك تدفع الرشوة عشان تخلص اوراقك يبقي تدفها ومعليكش ذنب..."
قلت لها " اكيد شيخ من اياهم بتوع القنوات الفضائية اللي حللوا اموال البنوك والفايدة بتاعتها "
معرفتش تقول غير ......أنا محتارة...
***********
اتخانقت مع اختي .....قلت لها ان الشباب اللي غرقوا علي شواطيء اليونان وايطاليا وتركيا شهداء ...وهي تقول لاء مش شهداء ....دول طماعين ...قلت لها بس ده هجرة للبحث عن عمل ....قالت  وهي البلد مفيهاش شغل ...؟...
منطق غريب ...والادهي ان في ناس كتير عايشين لسة في الوهم ده ...ان البلد فيها شغل كتييييير....بس احنا اللي طماعين...

رحاب صالح

هناك 19 تعليقًا:

  1. كل واحد بيحلل وبيحرم على مزاجه وعلى رغبته عشان يعطى طابع دينى على افعاله وكله بيقول اى كلام فى اى كلام عادى

    ردحذف
  2. السلام عليكم
    تختلط دائما الاوراق معنا
    بين الحل والحرام
    بشكل قظيع
    جدا واللى بيتكلم على مزاجه لان الموضوع الفلانى فى مصلحته يبقى ادور على الف مخرج ومخرج علشان القيه حلال
    وعلشان الموضوع الفلانى انا تعبان منه يبقى حرام على راى الشيخ الفلانى اللى بيقول كذه ويكون مخالف للاجماع
    وغيره وغيره احنا نربى نفسينا ونلوى اعناق الدلائل حتى تسير حسب هوانا
    لقله العلم الشرعى الصحيح
    وكثره الخبث على الصح
    فاصبحنا متلاطمين لا نعرف هل نحن فى اتجاه الصحيح ام ضد التيار
    وتأخذنا الامواج وعقلنا من يسر الدين الحنيف نراه كأنه سيف على رقابنا
    ونحلل ونحرم ولا نعرف العله فى التحليل ولا التحريم
    اين الخلل
    ومن الجانى على عقولنا
    مشكله ضحله اسال الله ان يقينا شرها
    موضوع مميز
    وعندى كلام كتير قوى عاوز اقوله
    بس مش هينفع اكتب
    اخر كلام عندى اختى رحاب
    هو كل انسان ان يتقى الله ويكون عنده الورع فى تحليل امر ما او تحريمه
    هدنا الله وكل المسلمين اللى الخير دوما

    ردحذف
  3. الاصل فى الدين الاباحة و ليس المنع و تلك قاعدة فقهية

    الاسلام بنى على خمس....و هى اركان محددة و هى فقط الفرائض و ليس ما يضيفوه الان من وهابيتهم حتى اوصلوهم ألف

    و المحرمات محددين و ذكروا بشكل مباشر لا لبس فيه او مجال للتأويل و هم الخمر و الميسر و أكل الميت فيما عدا ذلك فمنه المكروه و منه اللهو الدنيوي و بالتالى مش اى واحد لابسلى عمه و لا حتى دارس دين فى مؤسسات تقليدية و ليس بحثية كالازهر يطلع يقولى ده حرام و ده حلال و انا امشى وراه و اقول آمين لان لدى عقل كرمنى به رب العالمين...الحلال بين و الحرام بين

    المجتمع تعفن

    اقرى اخر كتاب لجمال حمدان اللى نزل الاسبوع ده بعنوان
    العلامة الدكتور جمال حمدان ولمحات من مذكراته الخاصة) يضم 72 صفحة كبيرة القطع.

    ردحذف
  4. قنوات وهابية هدفها تحريم اي حاجة في مصر...والناس بتسأل اسئلة وعارفة ايجابتها....بجد حاجة تقرف...فضاء ديني

    ردحذف
  5. أزيك يا رحاب

    انا اسف جدا ع الفترة اللى فاتت

    بس بجد مضغوط فى الشغل

    و مش عارف الفترة اللى جاية ربنا يسهل

    اما التعليق

    مش هأقدر أعلق غير انى اقول

    لا حول و لا قوة إلا بالله

    ربنا يشفى

    عارفة لو الناس مشيت ع الفطرة الأنسانية

    مش هتلاقى الكلام دة كله مش هتلاقى التخلف دة كله

    الناس مش عاوزة تسهلها على نفسها

    ربنا يسترها

    ردحذف
  6. بصراحة انا اول مرة اجي هنا
    وحد بثق في ذقه جدا هو اللي قالي على مدونتك.. عشان كده قرتها

    انا متفقة معاكي في البوست كله.. الا الشهداء

    زمان ايام الرسول صلى الله عليه وسلم
    كان فيه معركة.. وبعدين بعد المعركة ما خلصت لاقوا واحد مجروح ومات.. فضلوا يهللوا انه مات شهيد.. وج الرسول صلى الله عليه وسلم وقال.. لاء ده مش شهيد.. لانه اتجرح ولم يحتمل الام الجرح فقتل نفسه...!


    عايزة اقولك من كده ايه.. ده واحد كان بيجاهد ومافيش اعظم من الجهاد عندنا.. ومات وهو في ارض المعركة.. بس مش شهيد..!

    الناس ديه صحيح راحة تشتغل.. بس دخله بطريقة غير شرعية.. يعني محرمة قانون.. والمحرم قانون حرام شرعا.. لكن مش كل الحرام شرعا محرم قانونا.. يعني هو ميت على ذنب.. ندعي ربنا يغفرلهم.. لكن ما نقولش شهداء.. وطبعا الله اعلم

    سعيدة بمعرفتي مدونتك.. وان شاء الله تنواصل :)
    بذات اني لاقيت ناس
    كتير بحبهم عندك

    ردحذف
  7. معلش اسمحيلي اوجه كلام لــTarkieb

    هو ليه كل ما حد يقول حاجة مش عجبانا نقول اصلهم وهابين!!
    شيخ الاسلام محمد بن عبد الوهاب.. شيخ جليل مغلطش ولا عمل حاجة تتاخد عليه عشان الوهابين يبقوا شتيمة دلوقتي

    الشيخ بن عبد الوهاب
    رجع الاسلام زي ما سيدنا محمد علمنا
    من غير رتوش المحدثين.. اللي بوظت الدين

    اللي خلت واحد الماني اسلم.. ولمما شاف المسلمين قال:
    الحمد لله الذي هداني للاسلام قبل ان ارى المسلمين!!!

    ردحذف
  8. أنا رديت في الفيس ...

    بس بجد يارحاب فيكي دايما حاجه حلوه في مواضيعك ...
    إنها عباره عن مواقف واقعيه وليست نسج الخيال ...

    وإنك بتجمعي كذه موقف حصل معاكي في أو قات مختلفه وبتصبيهم في موضع واحد بشكل متقن
    أحييكي حبيبتي
    ^_^

    ردحذف
  9. ايه دا

    موضوع الشغل مع المسيح حرام ؟

    اصلا انا سامعة انو لو في واحد مسلم و واحد مسيحي عندهم نفس البضاعة والمسيحي بيبيعها باقل ... فالواحد يروح ياخدها من المسيحي ... بابا قلي كدا ...

    يعني عااادي اوي .. وايه دي حرام واحد يشتغل عند مسيحي ... يعني على كدا كتير ناس هيقعدوا بالبيت ..


    احنا بزمن كل واحد في الناس عندو رسالتو العملية و فتاواه


    الله يهدي الجميع ياا رب

    ردحذف
  10. و في حديث عن الرسول صلى الله عليه واله ... بما معناه

    من افتى بغير علم فليتبوأ مقعده من النار !!

    ردحذف
  11. رحاب

    اولا وحشتينى جدا يارب تكونى بخير

    ثانيا اللى عاوزة اقولهولك عندك

    حق ف كل كلمة قولتيها بس اللى

    عاوزة اقولو ان البلد فيها هم كتير

    مش شغل كتيييير ربنا يتولانا برحمتو

    ردحذف
  12. ازيك يا رحوبة
    صحتك عاملة ايه دلوقت يا حبيبتى ؟
    يا رب دايما احسن و بخير

    بصى بقى
    بخصوص موضوع البوست
    انا مش هدخل فى جدال و اقول رأيى فى كل جزئية ..
    بس يكفى اقولك
    ان كل حد حرملك شىء
    بيتكلم من ضفته الآخرى من النهر
    لازم ييجى مكانك
    عشان يشوف اللى انتى شيفاه
    و مقتنعه بيه
    و داخل ضميرك و بقى اشبه باليقين

    لو كان ربنا عاوزنا نكون شبه بعض
    كان خلقنا لون واحد و لغة واحدة
    و دين واحد
    مكنش يستعصى على قدرته عز و جل
    لكن الاختلاف له حكمة
    و طالبنا بأن نتعارف كشعوب و قبائل
    و قال لا أكراه ف الدين
    طب ايه بقى ؟!!
    فاضل ايه
    عشان كل واحد يتعايش مع الآخر
    بسلام و محبة
    و نبطل نقرف بعض
    و نحاسب بعض
    كام لو كنا آلهة
    او رسل مفوضين من رب العزة

    الحلال و الحرام
    ناس بتقضى عمر بحاله
    تلتبس فيهم
    لحد ما تعرف حدودهم
    يكفى تستفى قلبك
    و عقلك
    و كفى


    بوسات و حضونات
    يا ست البنات

    ردحذف
  13. رحاب وحشتنى مدونتك
    الكلام ده كله نتيجة فهم الناس الغلط للدين
    ونتيجة ان كل واحد بيفتى على مزاجه
    وكل واحد بيحلل ويحرم على كيفه
    الدين بتاعنا حلو اوى وجميل اوى بس احنا مش فاهمينه صح
    انتشرت قنوات كتير بتتكلم فى حاجات كتير اغلبها غلط
    واخيرا بقت الاسئلة الدينية متاحة على تليفونات 0900 ومن غير ماتعرفى مين اللى هيجاوبك على السؤال
    عالم فى الدين ولا واحد قرأ كتابين وخلاص

    البوست فى حاجات كتير اوى بس لفت نظرى حاجتين
    الشيخ اللى حلل الرشوة ودى حاجة غريبة رغم ان الرشوة دى بقت واقع فى حياتنا واسمها اتغير لمسميات اخرى زى الشاى او الاكرامية
    والناس اللى بتحرم الشغل مع المسيحيين المفروض ان الدين لله المسيحى ده مش كافر ده من اهل الكتاب اللى احنا كمسلمين مؤمنين بكتب ربنا ورسله
    انا رغيت كتير وكان ممكن ارغى تانى بس مش هبقى غلسة بقى كفاية كده:)

    ردحذف
  14. كلامك صحيح مئه بالمئه وحصل مره ان والدتى تواجدت فى مستشفى خاصه بالمسحيين وتمويلها امريكى فبدات بالصلاه وفوجئت بواحده مسلمه بتوقفها عن الصلاه وتقولها حرام مينفعش تصلى هنا وبالطبع امى صلحت لها المفهوم المغلوط ده وقالت لها كل أراضى ربنا طهوره واهم حاجه تستقبلى القبله وتصلى مش شرط المكان بتاع مين او يخص مين ...
    بالطبع الامر ده للاسف الشديد متفشى فى كياننا واصبحنا ندخل الدين والحلال والحرام فى جميع تعاملاتنا بالطبع ده شىء رائع لكن لو طبقناه صح وتحرى الحلال والحرام واجب لكن قبل ان نتحراه نتفقه فيه وندرسه جيدا قبل ان نخلط الامور وبالتاكيد قله الوازع الدينى والثقافه الدينيه التى تكاد تكون معدومه فى مدارسنا هى الى ادت لكده كذلك طبيعتنا البشريه فى عدم تقبل الراى الاخر واحتماليه صوابه والثبات على الراى الذاتى حتى لو أثبتنا خطؤه ..الخلاصه الموضوع عباره عن مزيج متداخل من تربيه دينيه تكاد تكون معدومه وتربيه ذاتيه جبلت على الاصرار والاستكبار فى الباطل وعدم تقبل الاخر ..وتحياتى ليكى يا رحاب على الموضوع ده ...مروة شوقى

    ردحذف
  15. في كتير بيقول حلال وحرام عشان يتقال عليه انه عارف بس الحلال والحرام دوري عليه في المكان الصح للافتاء اكيد مش دار الافتاء في مصر لانها بقيت زيها زي الناس اللي في الشارع وبعدين ذنبهم ايه اصحابك تقولي ما بيحبوش الحكومه خافي عليهم
    تفبلي تحياتي

    ردحذف
  16. عمرو يسري, محمود باحث عن حب ,تيرز , تركيب , رامي , فتافيت , فاتيما, غادة , قطرة وفا, منة, نهي , ملامح,

    eng_semsem اشكركم كلكم علي ردودكم اللي اسعدتني بجد , واسفة اني مش هقدر ارد عليكم واحد واحد لاني تعبانة شوية , اشوفكم علي خير دايما ويارب تكونوا بخير علي طول

    ردحذف
  17. اللى بيحصل الوقتى منتهى التناقض الواحد بقى مش فاهم ومتلخبط لحد ما بيوصل لحد معين من الفوضى وعدم الاتزان يبتدى يرجع لنقطة التعادل واحدة واحده بيقدر يقيم اللى بيسمعه ويحكم بعقله ويفصل فى الامور اللى عمل منها بعض الشيوخ مواضيع كبيرة خصوصا اللى خاصة بالشكليات والناس اتلهت فيها ونسيت حاجات اكثر اهمية

    ردحذف
  18. رحاب صالح :
    دائما يخرج كل من يفتي ولكن الألعن ليس فيهم ولكن في المتبعين
    وببساطة هقولك ليه ..
    المتبع بيفذ من غير تفكير
    يعني بيضرب وقت ما يتقال له اضرب وبطل وقت ما يتقال له بطل ، ودول بقى بتعاني معاهم بسبب الجهل المنتشر في الطبقات المتوسطة من الشعب أو الطبقة التي تتلقى دون حتى أن ترهق نفسها وتتأكد مما تأخذه - على فكرة المتعلمين لم ينجو من تلك الأمور -
    بعد ذلك كل واحد يحلل على كيفه ويحرم على كيفه
    سبب من الأسباب هي الأفكار الغريبة التي يتم ترويجها عن طريق القنوات الفضائية ..
    //
    الكلام عادي يمكن أي فرد يتكلم عادي لكن المشكلة إنه يصر على رأيه رغم إن ليس لديه الأدلة حتى على كلامه ..
    //
    تقبلي ردي ومروري

    ردحذف
  19. رحاب صالح :
    دائما يخرج كل من يفتي ولكن الألعن ليس فيهم ولكن في المتبعين
    وببساطة هقولك ليه ..
    المتبع بيفذ من غير تفكير
    يعني بيضرب وقت ما يتقال له اضرب وبطل وقت ما يتقال له بطل ، ودول بقى بتعاني معاهم بسبب الجهل المنتشر في الطبقات المتوسطة من الشعب أو الطبقة التي تتلقى دون حتى أن ترهق نفسها وتتأكد مما تأخذه - على فكرة المتعلمين لم ينجو من تلك الأمور -
    بعد ذلك كل واحد يحلل على كيفه ويحرم على كيفه
    سبب من الأسباب هي الأفكار الغريبة التي يتم ترويجها عن طريق القنوات الفضائية ..
    //
    الكلام عادي يمكن أي فرد يتكلم عادي لكن المشكلة إنه يصر على رأيه رغم إن ليس لديه الأدلة حتى على كلامه ..
    //
    تقبلي ردي ومروري

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين