السبت، 27 نوفمبر، 2010

يا تري إية اللي هيحصل بكرة...؟

بكرة الانتخابات ...
يا تري إية اللي هيحصل بكرة
يا تري هنعرف نروح ننتخب والا هيعملوا زي المرات اللي فاتت ويمنعونا من إننا ندلي بأصواتنا
يا تري هيعملوا اللي عايزينه وينجحوا اللي عايزينه.....برغم إعلانتهم اللي بتقول صوتك أمانة ..؟
بيحاولوا انهم يحسنوا مظهرهم بس مش عارفة لغاية امتي الناس هتصدق كدبهم ...
صديقتي مروة صاحبة مدونة سنابل الامل  حلفتني إني أروح أنتخب لأنها عارفة اني عايزة أقاطع الانتخابات ومش عايزة اروح انتخب اي حد عشان مش مقتنعة بأي حد من المرشحين
مروة إخوانية وبرغم كدة قالتلي مش لازم تنتخبي حد م الاخوان المهم انك تروحي تحطي صوتك لانك لو مروحتيش صوتك هيروح للحزب الوطني....وانا عارفة ده كويس بس بجد مش لاقية شخص مناسب انتخبه ولا مقتنعة ...
ميادة صديقتي الوفدية قالتلي انتخب مرشح الوفد عندنا ...بس انا مش مقتنعة ولا احب اني اخد بكلام حد خصوصا اني مش وفدية
طيب المعارضة ....المعارضة للاسف كان الاستاذ الصحفي رئيس تحرير جريدة الكرامة "حمدين صباحي" اللي من اول ما عرفت يعني اية سياسة حبيته  لانه كان بجد يستحق ....بس بعد ما حبيناه وأمناه علي اصواتنا وانفسنا وقضايانا ...مش هقول باعنا ...لاء ...بس معملش للاسف اللي قال عليه....
يمكن ف الاول عمل وعمل كتير كمان وكان يستحق فعلا اننا نعطيه أصواتنا ....خصوصا انه من قبل الانتخابات وهو كان في البلد دايما معانا في كل شيء ...دلوقتي وعلي مدي دورتين  أصبح نراه كالطيف ...أو السراب ...
فاكرة الدورة اللي فاتت ان شعبيته اتزت ...وكتير من الناس قالوا مش هننتخبه ..وتأثرت شعبيته وانخفضت جدا لأسباب كتيرة 
لكن لما جه وقت الانتخابات ولقينا الحزب الوطني بيمنعنا من أننا ننتخب وحتي منعونا من دخول اللجان  وكانت مهازل بجد في بلطيم ومأسي وموت ناس كمان ....احنا مسكتناش عملنا المستحيل وانتخبنا وعند بعند انتخبناه تاني عشان نغيظ الحزب الوطني ...
ونجح حمدين صباحي ....نجح المعارض المشاكس
بس يا تري المرة دي احنا هنعمل زي المرة اللي فاتت ...؟ خصوصا ان في ناس كتيرة المرة دي ضد حمدين صباحي وناس علي مستوي عالي وشعبية كمان جامدة .....
أنا لسة مقررتش خصوصا ان الجريدةالتي اعمل بها رئيس مجلس ادارتها مرشح ايضا وضد حمدين صباحي كمان ...بس انا من البداية قلت اني مش هنتخبه عشان انا محبش حد يقولي اني بنتخبه عشان شغلي وقلت الكلام ده لرئيس التحرير في الاجتماع قبل الاخير لي هناك لما قال اني بعض زميلاتي عاملين شغل هايل له في الدائرة وانا لية معملتش "عشان خاطر حمدين..؟" هو قالي كدة ..
بس انا كان ردي اني لا هنتخب ده ولا ده ....
صحيح انا في مشكلة عندي دلوقتي في الجريدة ويمكن ده سبب منها ...بس ده ميخلنيش اني اعمل حاجة انا مش مقتنعة بيها ...
لسة مقررتش هنتخب مين ....بس اللي قررته اني هروح بكرة الانتخابات واشوف اية اللي هيحصل ...؟ وساعتها هقرر انا هنتخب مين .....بس عندي فضول لأعرف يا تري حمدين صباحي المرة دي هينجح ...؟ للمرة التالتة ....والا مع اهتزاز شعبيته هيسقط...
ويا تري لو نجح هينفذ برنامجة الانتخابي اللي قال علية والا هيبقي زي السنين اللي فاتت ...؟
كلها أسئلة عايزة اجابات لكن ...بكرة جاي ونشوف اية اللي هيحصل ...
يا ريت كل واحد فيكم بكرة يشوف اية اللي هيحصل وبعدين يتكلم عنه في مدونته ...

رحاب

هناك 13 تعليقًا:

  1. ما تخافيش هيحصل كل خير
    الانتخابات محسومه من قبل
    ما تروحى بكره
    مقر الانتخاب
    يا رحاب
    ده رايى
    بلد..............تيت
    وبس خلاص كفايه احباط
    تعبت والله يارحاب

    ردحذف
  2. للأسف
    الحسبه محسوبه والصناديق مقفوله
    ربنا معاكِ ياقمر
    ويسترها معاكوا
    دمت بحب

    ردحذف
  3. الحزب الوطني لازم يجيب اكتر من 400 كرسي عشان يضمن تلتين المجلس تروحي ما تروحيش النتيجة معروفة

    ردحذف
  4. زى كل مرة

    تمثيلية غبية و بلا شرعية

    ردحذف
  5. الانتخابات فى مصر ملهاش غير مسمى واحد


    مسرحية هزلية

    ردحذف
  6. عارفه يارحاب لما تيجى رايحة تتفرجى على مسريحية وتلاقى يافطة متعلقة مكتوب عليها "نأسف العدد كامل"

    اهو بكره ده اللى هايحصل بالظبط هما جابو الممثلين والجمهور وعمال المسرح وكله كله واحنا مالناش اى دور بل بالعكس لو روحت هايقولوا الاقبال الجماهيرى على الانتخابات يبقى احسن اقعد فى بيتنا بكرامتى
    لانى اصلا ولا مقتنع بحزب ولا بوفد ولا باخوان وحتى بمستقل

    ردحذف
  7. رحاب...

    جيت عشان اسلم عليكى واقولك انك

    وحشانى موت يارب تكونى بخير



    بصراحه كده انا مليش ف السياسه

    والانتخابات والحاجات دى ولا بفهم فيها

    خالص ولا حت اعرف الانتخابات دى ماشيه

    ازاى بس عموما ربنا يعديها ع خير

    وعاوزة ابشرك الكوسه متوفره جدا ف

    بلدنا واعتقد ان الانتخابات بردو

    ماشيه بالكوسه

    ردحذف
  8. السلام عليكم

    سمعتى أغنية ثلاثى أضواء المسرح؟
    شالو ألدو جابوا شاهين

    أحمد زى الحاج احمد

    و سلميلى ..

    خللينا ف حالنا.. دول ناس كبارة ..
    و العبارة فى العــبّارة
    زى الدوبارة فى الشكارة

    فاهمة حاجة .؟

    هو ده اللى أقصده

    مالناش دعوة

    تحياتى

    ردحذف
  9. أنا كان نفسي أنزل النهاردة أشوف المهازل
    وأحمد قلي والله بس ماما للأسف معارضاني

    لما تروحي إبقي طمنيني عليكي وعملتي إيه وإنتخبتي مين ..

    على فكرة أنا معرفتش أرد على البوست إللي قبل ده ...
    معرفتش بمعنى لساني عجز عن التعبير
    :(

    وعلى فكرة إنتي وحشاني وزعلانه أوي
    :(
    ربنا يكتبلك الخير يااااااارب ياأحلى حوبه

    ردحذف
  10. أنا سمعت كلام وقريت كلام أكد لي إن الله المستعان حقا وربي ينصرنا بقى

    ردحذف
  11. أحترم موقفك جدا أختي الكريمة..

    طبعا أنا باكتب دلوقتي بعد ما بقينا بكرة...

    دلوقتي شفنا المهازل اللي كانت متوقعة.. بس لسه الصبح هنعرف النتائج.. ربنا يسهل..

    تحياتي مع تمنياتي بالتوفيق ومرور أزمة العمل على خير...

    ردحذف
  12. يا صباح الورد عليكم كلكم
    انا من غير ما اقول حاجة انتم اكيد شفتم الجزيرة والعاشرة مساءا و90 دقيقة وعرفتوا اية اللي حصل عندنا في بلطيم وعرفتوا انسحاب استاذ حمدين صباحي من الانتخابات
    بس للأسف في حاجات كتير متقلتش
    انا هبقي اقولها في بوست تاني ان شاء الله ....
    عايزة اقولكم حاجة ...شخصية المرة دي
    انا استقلت من الشغل ....اقصد من الجريدة ...والاسباب جايز اقولها ف البوست وجايز لاء ...

    بس انا كدة مستريحة نفسيا اوووي
    بتمنالكم كل الخير

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين