شكلك وحش اوووي

تومي " اية يا بت الجمال ده ...؟ ده انت ...
موني " قمر والله انتم الاتنين ....هتعملوها امتي بقي
سوني " مش يا بنتي اما يقول لأهله الاول
توتة " بس مقولتليش يا واد انت انت كنت حاضنها جامد اووي كدة لية ...؟ كنت خايف لا تهرب منك ...
هيما " اية ده ...؟ تتقابلوا من ورانا وتعملوا كل ده من غيرنا ...لالالا كدة وحش خااالص
موني " معلش يا هيما حبيبة بقي وعايزين خلوة شوية ...
توتة " هو انتم مين اللي صوركم الصور دي ...؟
هيما " انا لو منك يا واد يا ...كنت شدتها من شعرها زي رجل الكهف زمان و......
مي " حلوة الصور خاااالص وعلي فكرة انتم لايقين علي بعض خالص
رضوي " قمر قمر قمر ....الصو جامدة طحن ....بجد لايقين علي بعض خاااالص
هيما " لايقين علي بعض اية بس ...لعلمك انا احسن من الواد ...مليون مرة ...بس المشكلة ان ...قصيرة وانا مبحبش القصيرين هههه
توتة " اممممممم وبعدين يا هيما مالهم القصيرين ...
دي كانت بعض تعليقات علي الفيس بوك عشان صور منشورة لبنت وحبيبها ...الصور بصراحة في منتهي ...منتهي ...مش لاقية كلمة مناسبة اقولها عليها كفاية اني لما شفت الصور جاتلي حالة ذهول ....ازاي البنت دي اللي هي زميلة لي وكنت احبها واحترمها تعمل كدة وتنشر الصور دي بالشكل ده وتقبل التعليقات السخيفة دي من اصحابها أو اللي بتحسبهم أصحابها .....لاء والادهي انها مبسوطة اووي بالتعليقات
يوم ما شفت الصور دي بعت رسالة ليها علي الفيس بوك قلت لها  " مش بحاسبك بس لو انا انسانة منافقة هعمل زي اللي علقوا عندك وقالوا قمر وجميلة وطحن ومش عارف اية ...شوفي انت من حقك تحبي ......من حقك تقابلي حبيبك ومن حقك تكلمية وتقعدي معاه ولكن متوصلش انك تتصوري معاه بالشكل ده ...!!! انت بجد شكلك وحش وووي ...
انت عارفة يا تري فكروا فيك ازاي دلوقت ...؟ بيقولوا اية عنك بينهم وبين نفسهم ...؟ لازم تعرفي انك غلطانة ...؟ ولازم تحسي بغلتطك دي ...؟ انصحك تحذفي الصور دي وتفكري كويس  بحاجة تحسن من شكلك اللي بقي وحش اوووي ...
كان ردها عليا " تصدقي انك الوحيدة اللي قالت لي ده يا حوبة ...؟ بجد انت صديقة مخلصة وانا فعلا حذفت الصور من قبل ما ارد عليك وبجد سعيدة انك نبهتيني  بس علي فكرة ماما عارفة وكمان كانت معايا يوم ما اتقابلت مع ... ... واهلي واهله عارفين يعني تعتبر خطوبة  بس مش رسمية ...
عملت نفسي مصدقاها ....ولكن اتضح لي بعد كدة انها برضه عملت نفس الحكاية تاني وصور العن ...وتعليقات في منتهي .....
بعاتب صديق لي علي تعلقه ليها  كان رده ليا " حوبة دي مش بتاخد بنصايح حد ثم ان اهلها ميعرفوش ولا اهله ....تخيلي انها في يوم " كان يوم وقفة تضامن مع صحفي الدستور "  قالتلي انا و....و..... " اتنين من اصدقائنا  بكل بساطة " ممكن تلهوا اخويا شوية لغاية ما اقعد مع ... شوية اصله واحشني اووي ..
تخيلي يا حوبة انها من اول اليوم لآخ
طلعت مع ....باشا وسابتنا  وجات في اخر اليوم ....ومقولكيش علي التعليقات بقي .........مسخرة بجد
يااااااة  وانت لية كتبت تعليق تقولها قمر ومش عارف اية طيب ما كنت نصحتها ....
" يا حوبة دي كانت سخرية منها  مش اكتر ....دي عمرها ما تكون ابدا زييك وزي ....و........ و......
دي فاكرة انها كدة صح وانها كدة مش تقليدية وانها عصرية جدا وعايشة الدور .....
فكرت ف نفسي " هي دي العصرية ....هي دي الحرية .....هو ده الحب .....هي دي الصداقة ...
حسيت اني متضايقة اووي ....بس اعمل اية ما انا نصحتها قبل كدة  , ورجعت تاني للي عملته ....يعني اعمل اية ...؟
قلت لها شكلك وحش اوووي .....ومش ادامي انا وبس لاء ادام ناس كتير ....
الحرية مش معناها انك تخلعي حجابك مش معناها انك تحبي واحد مش معناها انك تخرجي تتصوري  وتتجنني ...
سؤال  : يا تري اللي عملته زميلتي دي من وجهه نظركم صح والا غلط ....؟
وسؤال كمان : انت بتحافظ علي شكلك بس عشان الناس والا عشان التقاليد والا عشان اية ...؟
عن نفسي بحافظ علي شكلي حلو بس عشان نفسي مش عشان حد

ملحوظة
مكتبتش اسماء وعملت نقط لاني بجد كنت مش عارفة اكتب اية ...لاني كنت متنرفزة اوووي اوووي اوووي

رحاب صالح