الثلاثاء، 26 أبريل 2011

ميدان التحرير ...كلاكيت أول مرة

أعشق ميدان التحرير  جدا عشق ماله وصف أو حد....
من قبل الثورة ....وليس مثلما أحبه كثيرون من بعد الثورة
أعشق  هذا الميدان لآنه كان  ملتقي الصحبة
فدوما  كنا نلتقي هناك....نتفق علي يوم ونلتقي ...كل منا من محافظة مختلفة ومنا من القاهرة
أعشق المكان لآنه مرتبط بالأصدقاء
ولكني أيضا أعشقه كمكان له تاريخ
لم يقدر لي أن أشارك في الثورة ....للأسف
وكان يوم 14 يناير 2011 هو أخر يوم رايت فيه ميدان التحرير ....
وكم كنت اتمني أن أذهب واشارك .....لكن قدر الله وما شاء فعل
وأخيرا يوم 20 أبريل 2011 تنفست هواء الثورة ....وذهبت لميدان الاحرار
ولــــــــــــــــكن....وآه من لكن هذه
كان أسوء يوم بحياتي
لم أكن أتخيل  أن أري كل شيء كما هو ...وما تغير شييء
فمازال الناس تأكل وترمي بالقمامة بالشارع
مازال المتسولون يملؤن الميدان
ومازال الناس  بجوار المتحف المصري يضايقون السائحين بكل الصور من أول " ويلكم تو ايجيبت " إلي " فيفتي دولار"
مش عارفة بجد اتخنقت أووي  من ان كل شيء زي ما هو متغيرش
أما بالنسبة لجو مقاطعة كنتاكي وهارديز وماكدونالد ...فهذا وهم بالتأكيد لان تلك المطاعم تعج بالمصريين
المعاكسات ...بكل شكل ولون
اما الاعتصام أو لفت النظر فحدث ولا حرج
فقد كانت هناك سيدة تحمل لافته تنادي بعودة الحزب الناصري   وكلام كتير مكتوب مش مرتبط ببعضه بس اهي هوجة وقفات اجتجاجية ومظاهرات .....وساعتها وانا واقفة اقرأ المكتوب  ع اللوحة سألني طفل " هو إية الحزب الناصري ده ..؟ هو في حزب اسمه الحزب الناصري عندنا ف مصر ...؟" وعلي فكرة انا شرحت للولد كل اللي اعرفه عن الحزب الناصري
لفت نظري شيء  غريب .....علي الطرقات  وخاصة الكورنيش .....كتبت كلمات مؤيدة للرئيس المخلوع ...وقفت كثيرا لقرائتها وقلت لمن معني ...حتي مؤيدي الرئيس المخلوع مخدوش بالهم  اننا هندوس ع الكلام ده ... باحذيتنا....؟ غباء غريب فعلا
صدمت جدا  بما رأيته ...فقد كنت  أتوقع أن تغيرنا الثورة للأفضل ....ولكن
لا يغير الله ما بقوم حتي يغيروا ما بأنفسهم
واحنا للأسف .....متغيرناش

هناك 26 تعليقًا:

  1. لايغير الله ما بقوم حتي يغيروا ما بأنفسهم
    .....
    التغيير الحقيقي لا يأتي بثورة تقنع البعض ويعترض عليها البعض ويستغلها الانتهازيون
    التغيير يأتي من داخلنا عندما نفرق بين الجميل والقبيح
    الخير والشر
    عندما كنت ادرس في جامعة الازهر بالقاهرة
    كنت اسير لمسافةكبيرة علي قدمي حتي لا اضطر الي القفز من فوق الحواجز الحديدية الموجودة في ميدان رمسيس والتي تعزل المحطة عن الميدان

    وكنت اري الجميع يقفزون من فوقها
    وتعجبت كثيرا
    لماذا لا يقوم الحي بعمل منافذ في هذه الحواجز الحديدية لعبور المشاة؟!
    ام انهم يستمتعون بمشاهدة الناس وهي تضطر للقفز من فوقها
    فقط لتوفر بعض من جهدها للعمل بعد رحلة طويلة في المواصلات المرهقة السيئة .
    اعتذر ان ابتعدت عن الموضوع
    ولكن مقالتك حركت شجون في قلبي

    تحية وتقدير

    ردحذف
  2. وأنا كمان يا رحاب بحب التحرير جدا ،، وبرضه لنفس السبب ان فيه كل مقابلاتي انا وصحباتي ،، بنفس درجة غلاوة الدقي في قلبي :)

    وفعلا والله اللي بيحصل هناك حاليا مهزله انا كل مرة اعدي هناك اشوف حاجات تعلي ضغط الدم ،، بس ان شاء الله لما البلد تقف على رجليها مرة تانية كل ده هيتعالج وكل الناس دي هتتلم ف بيتها من اولل وجديد

    تسلمي حبيبتي وربنا يسلم لنا مصر من كل سوء

    ردحذف
  3. مستغربة ليه يا رحاب
    احنا كده طول عمرنا بنسخن فجأة ونعمل الصح بعدين لما نهدا بننسى اللي اتعلمناه ومش بنافظ عليه
    يعني المتسولين والمعاكسات وغيرها وغيرها دي من طقوس الشعب المصري وشيء راسخ في شخصية المجتمع في بلدنا مستحيل تتغير بسهولة
    الطبع يغلب التطبع
    تحياتي ومتزعلش نفسك في حاجات غير دي كسبناها من الثورة بلاش تبصي للسلبيات بس وتضايقي نفسك

    ردحذف
  4. البعض بيسأل ليه الناس أخلاقها إتغيرت عن زمان
    وليه الثورة مغيرتش فينا حاجة

    معتقدش إن الجهل اللي كان معشش جوانا تعليميا وثقافيا وحضاريا أكتر من 30 سنة هيتعالج في 18 يوم

    الصبر

    تحياتي . .

    ردحذف
  5. انا عكسك مكنتش بحب ميدان التحرير يمكن كنت بحب طرازه المعمارى لكن كان له وجه القبيح من زحام و ضوضاء

    لكن اثناء الثورة عشقت هذا المكان كان مثال لمصر التى احلم بها فى النظافة و الايمان و التسامج و التكافل و الديمقراطية و الاخلاق لدرجة انى حزنت قليلا متفهمنيش غلط لانى ساغادر الميدان مثل حزنك لمغادرة كليتك بعد التخرج رغم فرحتك بالنجاح او حزنك لمغادرة منزل والدك رغم فرحك بالنجاح
    عند عودتى له مرة اخرى شعرت بالحزن و الصدمة
    كتبت جزء من معطف بلا قيود اسمه الشاطر حسن و ست الحسن و الجمال ارجو ان تقرائيه لان فيه ملخص الحكاية من وجهة نظرى
    خالص تحياتى

    ردحذف
  6. يمكن لانى بعيد عن مصر ومش شايف ايه اللى بيحصل فى الشارع غير عناوين بعرفها على فترات متباعده من النت والتليفيزيون ( عن قصد ) كنت متخيل ان الوضع بقى احسن من كدا يا رحاب ... بس زى ما قولتى للاسف احنا لسه متغيرناش .
    حتى بعد التنحى بفتره بسيطه كان فى مقال فى المصرى اليوم عنوانه .. عزيزى المواطن انت لم تتغير بعد ... كان بيرصد كل الحاجت دى وقتها بصراحه حسيت باحباط وقولت انه فعلا مش هنتغير
    بس انا وبرغم ده عندى امل كبير ان التغيير فى سلةكياتنا جاى اكيد وانه صعب الكل يتغير فجأه لن زى ما قال مصطفى الطبع بيغلب التطبع
    تحياتى يارحاب
    وبلاش تنزلى التحرير تانى :)

    ردحذف
  7. عندك حق يا رحاب
    ما الفائدة ان نغير ما حولنا ومن داخلنا لم نتغير

    حقا أنه أطرف أنواع التغيير

    _________

    طالما سنظل نحن على ما كنا عليه فكأن الثورة لم تكن

    __________

    خالص تقديري لفكرك وقلمك
    تقبلي مروري

    ردحذف
  8. لا يوجد تغيير الا عندما نتغير من داخلنا فان لم نتغير فلا وجود للتغير حقا اختى كما قلتى فكل شىء كما هو هنا ايضا بالاسكندريه كل شىء كما هو لا يوجد تغيير ماذا فعلت الثوره بنا للاسف الشديد حتى الان لا شىء
    تحياتى لقلمك فانتى انسانه متميزه وكتاباتك ثلثه لا تحتاج للارهاق كى نفهمها تقبلى تحياتى الاحـــــــلام

    ردحذف
  9. حاجات كتير اوى جوانا

    محتاجة التحرير

    ردحذف
  10. رحاب أنا حاسه انك متضايقه مش ممكن حد يشوف كل السلبيات دي الا اذا كان من جواه عنده استعداد انه يشوف أشياء مؤسفه زي دي, أكيد لسه الناس متغيرتش بما يليق مع الثوره و ده طبيعي لأن التغير هيحصل تدريجياً لما نتخلص من كوابيس التعليم و الجهل و العلاج و تأخر الزواج و الهمجيه و الفقر و غيره كتير من تبعات نظام فاسد فاشل حكمنا لمدة 30 سنه.
    أما بالنسبه لأجواء الميدان أكيد مش دي أجواء الثوره لأن الثوار اللي فضلوا في الميدان لحد التنحي و شالوا أرواحهم على كفوفهم في أيام الغضب معتبوش الميدان تاني و دي معلومه أكيده لأني أعرف كتير منهم, اللي هناك أرزوأجيه زي ما بيقولوا, عموماً مش عايزاكي تضايقي أو تكتأبي أكيد اللي جي أجمل ان شاء الله بس محتاجين الصبر و العمل.
    تحياتي و كل الود لكي

    ردحذف
  11. السلام عليكم

    كنت من ايام فى التحرير ساءنى كل ما قلتيه اختى فعلا وكان تعليقنا جميعا بالسيارة عن هذا المنظر الغريب كأن شيئا لم يكن للاسف ومثل مصطفى ماقال احنا فعلا نسخن فجأة وبعدين ننسى

    ربنا يصلح الاحوال ولا زالت اقول اننا محتاجين ثورة فى داخلنا والتغيير لازم يكون فينا اولا وقبل اى شىء

    دمت بكل خير اختى الحبيبة
    بارك الله فيك غاليتى

    ردحذف
  12. مافيش حاجة بتحصل فى يوم و ليلة يارحاب و مشوار الألف ميل بيبدأ بخطوة

    ايه حكاية مقاطعة كنتاكي وهارديز وماكدونالد ...مين الذكى اللى مقاطعهم و ليه؟

    دى استثمارات مصرية و عربية 100% و بتوفر فرص عمل كثيره

    ردحذف
  13. ماشي بنور الله
    أكيد كل واحد فينا عنده حكايات وليس حكاية واحدة فقط
    واذا كنا فعلا نبغي التغيير فغيرنا كثيرون مستسلمون للفعل القبيح

    ردحذف
  14. تخاريف مترجــِــمة
    بصرة....,شيك هاند يا سحر
    ودايما اقول ان الجاي ان شاء الله احسن
    احنا فعلا محتاجين وقت
    بس كنت بتخيل ان في أشياء تغيرت بعد الثورة

    ردحذف
  15. مصطفى سيف
    والله يا مصطفي مش ببص للسلبيات وبس
    بس غصب عني بلاقي السلبيات اكتر
    للأسف دي حقيقة مؤلمة بنحاول نغيرها ف الشعب المصري
    ومش عايز يتغير
    بس قوللي بقي انت لية غيرت الصورة ...؟

    ردحذف
  16. الثورة مش زرار سحري ..
    ده دورنا وده عدونا الأكبر إننا نغير الأفكار دي ونبقى شعب متحضر
    في الماضي القريب كان التنوير بتواجه عقبات كتير جدًا لكن دلوقتي التنوير بالذات طرقه مفتوحة ويمكن عقباته الوحيدة التمويلات المادية أو القدرات المهارية للأشخاص اللي المفروض يقوموا بالمسئولية دي نفسهم ..
    المفروض ما نتصدمش من حاجه دلوقتي لكن نتصدم لما نحاول نحلها ونواجهها ونفشل ..
    بخصوص موضوع للاسف مشاركتش في الثورة ففي ناس كانت نايمة في سريرها وقلوبها مع اللي في التحرير ودول شاركوا فيها ولو بالدفاع عن الثوار مع أقرب أقربائهم لا ننسى أبدًا أن ثوار التحرير بدون المدافعين عنهم وداعميهم في المحافظات والقرى والشوارع والبيوت مكانوش هينجحوا ..
    متنسيش كمان ان كان فيه ناس في التحرير - ودول كتير - وقت الثورة ومكانش فاهمين اي حاجه وبالنسبة لهم تولع الناس دي
    وتحيا مصر !

    ردحذف
  17. لن يتغير الشعب بالسرعه ديه

    الثوره سوف تنعكس علي اخلاقيات الشعب علي المدي الطويل

    ردحذف
  18. السلام عليكم
    يعنى قلت اننا محتاجين ثورة قيم ومبادئ وسلوك وعادات
    مش عشان اتعملت ثورة على النظام يبقى احنا اتغيرنا
    دى خطوة من سلسلة خطوات
    كل واحد عليه دور لو كل واحد فكر وبدا كلنا هنتغير وايد لوحدها متسقفش
    شكرا على طرحك المتميز

    ردحذف
  19. مافيش حد مالوش ذكري هناك
    والثورة جعلت منه ذكري في نفوس العالم اجمع ذكري تقول نحن شعب مصر الاحرار
    تسلم ايدك حبيبتي

    ردحذف
  20. أي إصلاح لا يأتي بين ليلة وضحاها، هناك سلوكيات متجدرة في عمق المجتمع من السهل استأصالها بسهولة.. لكن التغيير هو ضرورة وشيء مهم لكل فرد.

    ارتباطك بالميدان هو نابع من شعور داخلي يفسر بأن هذه الساحة هي رمز من رموز التحرير.

    حياكِ الله.

    ردحذف
  21. احساسك ده بالظبط حصل اول خروجه ليا بعد شهر من الخوف ايام الثوره...خدت صاحبى على اخر فبراير كده و قلنا نتفسح بقى و نزلنا شارع جامعه الدول و كانت اول خروجه بعد الثوره و التنحى و كل الحاجات اللى تبعتها من التليفزيون بس دى ....البنات محجبه ببطلونات ساقطه و الولاد ببنطلونات ساقطه برضه طالعين من عربيات فخمه ايدهم على تييت ولا بلاش و بعد الشياكه دى كلها بيرموا ورق عالارض ...

    قلت هو مش فى ثوره فى البلد ؟؟ ولا دى فى التليفزيون بس ؟؟...

    الفرق الوحيد اللى شفته يومها ان الشحاته كانت لابسه بندانه علم مصر....

    تحياتى لتدوينتك اللى رجعت ليا زكريات بحاول انسها

    ردحذف
  22. قريب كنت راكبه فى المواصلات وواحده مسيحيه كانت راكبه جنبنا

    البنت وهى نازله .. ماقولكيش الكلام اللى اتقالها

    بصى

    اللى شارك فى الثوره هم الشباب المثقفين الواعين الفاهمين اللى حاطين فى دماغهم مصلحة مصرررررر

    فيه ناس تاانيه وشباب كتيييييير كانوا متفرجين ومش بيدوروا غير ع لقمة العيش

    هما مش ذنبهم لان دى ثقافتهم ومش هيتغيروا من يوم وليله أبدااااااً

    الثوره كانت بدايه للتغير

    وليس تغير كامل

    الثوره .. نقطه فى بحر .. خطوه فى طريق الالف ميل

    ماتضايقيش نفسك لأن الموضوع محتاج صبر اكتر من كده بكتيييييير ومحتاج مجهود مصر كلها مش مليونيه فى التحرير

    كلنا لازم نشارك فى مصر القادمه ودى بقى فرصتك مادام ماشاركتيش فى التحرير

    تحياتى لشخصك الكريم

    (: (:

    ردحذف
  23. السلام عليكم

    أختي رحاب.. أحييك بصدق على التغريد خارج السرب..

    فأنا خارج مصر لا يصلني سوى الصورة الوردية، أو صورة ما يجب أن يكون وليس ما هو كان من واقع بالفعل، وبالمناسبة كلامك أيده لي أكثر من شخص ممن نزلوا الميدان بعد الثورة..!

    كلامك يدفعني للتسريع بالبوست الذي أحاول الهرب منه منذ فترة والله وهو (فيه حاجة غلط..!!!)..

    تحياتي على الفكرة أختي رحاب.

    ردحذف
  24. السلام عليكم
    ايها المدونة النشطة بنت الشاطىء الذى انتمى اليه , نعم هذه عادات بعض المصريين ولن تتوقف مع نجاح ثورتنا ودعينى اهمس فى اذنيك لاتدعى نفسك فريسة للياس فالمثقف لاينبغى ان يكون متشائما نجحت الثورة فى استئصال نظام عصف واستبد والان دورنا ودور كل من له عقل ورغبة فى النهوض بهذا البلد وسوف يتحقق ذلك بمشيئة الله بايدينا شباب مصر

    ردحذف
  25. اه يا رحاب لو كل واحد يبدأ بنفسه ويحاول يمد غيده بالنصح لغيره واحده واحده مصر حتبقى جنة بس لسه شويه متنسيش لسه الفقر معشش ولسه الجهل معشش ولسه الاخلاق منحدرة ...مبارك مشى أه بس لسه اخلاقه واخلاق اعوانه باقيه ونسال الله لنا صلاحا قريبا

    ردحذف
  26. FAW
    عارفة ان الصبر مهم
    بس في حاجات المفروض تتغير من جوانا احنا مش مع الثورة فهمتني

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين