الثلاثاء، 7 يونيو 2011

حاجات جوايا....2

0

يااااااااة ...هو انا كنت عملت المدونة يوم إية...؟
طيب كان سنة كااااام.....؟
طب هو كان عيد ميلاد مدونتي  المفروض إمتي...؟
1/6/2008
مممممم بس مش ده عيد ميلادك الحقيقي
هحتفل بيه أكيد إن شاء الله
قريبا جدا
1
مبقتش افرح كتير
لية بقيت دايما اتوقع الاسوء
مش عارفة.....
2
كتير بحس اني غلتط ف الاختيار
لية بعد ما كنت حددت اني مقبلش اضافة اي حد علي الفيس بوك
قبلت إضافة بعض الاشخاص....؟؟؟!!!
يمكن خجلت اني أرفض ....عشان مش أبقي قليلة الذوق
لية دلوقت حاسة اني أكثر من نصف من أضفتهم مؤخرا عايزة أعملهم بلوك مش ريموف وبس
أرجع وأقول انا اللي غلطانة لاني أعتقدت  حسن النية فيهم
وقلت لنفسي بلاش  أبقي متشائمة ....
بس اتضح ان احساسي دايما صح
واني بلوم نفسي كتير علي اللي عملته
3
هو إية معني الصداقة....؟
شغل جميل جمعنا مع بعض....؟
عيش وملح مع بعض.....؟
فسحة جميلة  قضيناها  كلنا مع بعض .....؟
خوف علي بعض ....؟
طيب لية بعد ده كله تخليني أحس انه مكانش عيش وملح ولا صداقة ولا حتي زمالة....
اسمحلي أقولك انك لا كنت صديقي ...ولا حتي مجرد زميل ولا هتكون
ومش هقبل أني أعمل لك add
تاني علي الفيس بوك ....
مش هقبل صداقتك تاني لانها مش ممكن تكون هي دي الصداقة.....
4
مش معني اني قبلت صداقتك واني تعاملت معك ببساطة وحسن نية وخير
انك تسمح لنفسك تعاتبني  كأنك صديق عزيز اعرفه من زمن
لان العتاب بين الاصدقاء ....فعلا وليس من يدعي الصداقة
5
هو....انت فين...؟ مش بتردي علي الموبايل لية...؟
هي ....كنت بصلي ....مصليش يعني
هو...يا بنتي انا مش صحيتك تصلي الفجر ....؟!! هو انت مصلتيش والا إية...؟
هي....أنا صليت الحمد لله بس .....نمت بعد الفجر ...وصحيت من شوية وبحب دايما أبدأ يومي بالصلاة...
هو...حبيبتي أنا فخور بيك...بحبك
6
مش معقول كل يوم الاقي تعليقات زعلانة مني عشان مش بعلق عندهم .....
آسفة بجد
بس معلش بجد أنا مشغولة
وبسأل لية ناس تانين مش بيعاتبوني وبيكونوا هما أول ناس بتعلق علي أي بوست جديد عندي وعمرهم ما عاتبوني....؟ ده لانهم ناس بجد بتفهم وتقدر...
الكتابة مش عشان التعليقات يا جماعة
الكتابة للكتابة نفسها....لحب الكتابة نفسها......
ولكل منا مشغولياته....
أرجو من يأتي ها هنا في المدونة لا يكتب كلام شخصي ...أرجوكم......هنا كتابة وتعليق علي ما كتبت وليس علي شخصيتي
7
 هي صباح الحب حبيبي
هو....صباح الحب حبيبتي......بحب كلمة حبيبي منك....بس تعرفي في كلمة أحلي منها كتييييييير
هي....إية....؟
هو.....زوجي
8
أنا آسفة
بجد انا آسفة
يا ريتك تفهمني....وتعذرني عشان الضغط اللي أنا فيه ...دراسة ...وشغل...وسفر ..ومذاكرة....
معلش استحملني ...ولو مش انت اللي هتستحملني ...يبقي مين هيستحملني.....؟!!!
9
هي ......هشوفك ف عيد ميلادي...؟
هو...مش عارف ...يمكن وقت الشغل ميسمحش وهكون علي سفر
هي....بتهرب مش عايز تجيب هدية......
هو...هديتي عمر ما في حد غيري هيعرف يجيبهالك غيري

10
هو...تفتكري مين فينا بيحب التاني أكتر
هي...أنا طبعا...عشان بستحمل شغلك وكلامك ونرفزتك عليا
هو...لاء انا طبعا لاني بستحمل كلامك وسخافتك عليا
هي...لاء انا طبعا
هو ...لاء انا طبعا
تصدق......احنا الاتنين مجانين
11
هي...بحب الاطفال جدااااااااااااا
هو...عقبالنا ان شاء الله
هي...مش ممكن طبعا لانهم بيعيطوا كتير
هو...ده الطبيعي
طيب انت هتبقي تسكتهم وتسيبني أنام....؟
هو...لا يا حبيبتي...مش انت مامتهم...يبقي انت اللي تسهري بيهم ...هو ده كلام الاغاني اللي دوشتونا بيها

12

هو...تفتكري أولادنا هتبقي ملامحهم إية...؟
هي...عايزاهم يشبهوك
هو...عايزهم يشبهوك
يا ريتهم يشبهونا احنا الاتنين


رحــــــــــــاب

هناك 25 تعليقًا:

  1. كل دى حاجات جواكى
    علشان كده قافلة الموبيل على طول
    طيب الناس اللى عاوزة تسأل عليكى تعمل ايه يعنى
    انا مش عاوزاكى تبقى زعلانة اى حاجة بتحصل لنا بتبقى خير من عند ربنا لو عرفنا حد كويس بيبقى خير
    لو عرفنا حد افتكرناه كويس وحصل العكس برضه خير لاننا عرفناه على حقيقته
    ولا ايه ياقمر

    ردحذف
  2. انا بعت تعليق مش عارفة وصل ولا ايه لانه ماكنش راضى يسجل دخول المهم لو التعليق ماوصلش كنت عاوزة اقولك افتحى الموبيل علشان عمالة اتصل بيكى ومبيقولى مقفول

    ردحذف
  3. صباح الغاردينيا رحاب
    حاجات كتير تبقى جوانا ومحتاجين نعبر عنها بشكل مرتب او حتى بـ أسلوب ساخر المهم نكتب لان القلم بيبقى هو متنفس للروح جميل كل سطر كتبتي ولو حاولت اوقف عند كل واحد حبقى رغاية جداً هههههههه بس مرة حبيت ..الجزء الي تخانقوا فيه على مين يحب التاني اكتر احساس جميل لما كل واحد يحس حبه اكبر :) "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  4. السلام عليكم
    اختى الغالية
    اعانك الله على دراستك وعملك وسفرك المتواصل
    حلوة الفضفضة بنستمتع بيها معاك
    دومتى بخير
    تقبلى مرورى

    ردحذف
  5. اول شيء مبروك عيد ميلاد مدونتك ..

    ::::::::::::

    انا بارضه زيك كثير باشعر بنوع من الخجل لما حدا يبعث لي طلب اضافة وخاصة لما يكون رجل ..

    ::::::::::::

    ومعاك برضه بقصة الصداقة برضه ،في ناس بتعتبر نفسها من اعز الاصدقاء وبيدخلوا حالهم في اللي مالهم فيه خالص ..

    :::::::::::

    الحاجات دي جواتك وجواتنا كلنا ..
    دمت بخير ..

    ردحذف
  6. في النهاية عيالهم هيبقوا شبهة وخلاص :)
    طبعا بهزر
    بحب الكلام اللي بيبقى طالع من القلب وبدون ترتيب مواضيع كتير مع بعض وملخبطة زي افكارنا وعقولنا اللي بتتشوش دايما بافكار كتير مرة واحدة
    عجبني البوست يا رحاب واتمنى فعلا ان تجدي الاصدقاء الجيدين اللي يكونوا فعلا اصدقاء
    تحياتي

    ردحذف
  7. رحاب اهو ده عيبه

    انتى عارفة لما تكون المياه مقطوعة و تفتحى حنفيات البيت و فجاة المياه جت تلاقى حنفيات البيت كلها مفتوحة

    انتى حنفيات الكتابة عندك كلها مفتوحة
    حقيقى استمتعت بكتابتك و شربت من كل الحنفيات لكنى مش قادر اعلق من كثر شرب المياه نفسى يا بنتى الرحمة شوية هو يا مفيش كتابة يا افكار غزيرة
    ههههههه

    تحياتى

    ردحذف
  8. هو بس اللي انا مسش فاهمة

    يعني ايه كلام شخصي

    اللي اعرفة هو تعليق علي الموضوع

    ومش عايز اقول لب الموضوع

    علشان متبقاش مكلكعة شوية

    تحياتي

    ردحذف
  9. و لا يهمك

    انا برضه عاوز اعيد على المدونة مش عارف (:

    و لا يهمك

    كان ناس بتقولى انت ليه مش بتعلق عندى بالرغم انى بعلق عند ناس كتير

    بس أحياناً الواحد بيخش مود مش عارف يتكلم اساساً

    طب ما انا اهوا مش عارف اعلق عند حد بقالى فترة

    بس انا عارف ان انتم عاذرنى

    ولا يهمك

    ممكن تعملى بلوك للى مش عاوزاه و مضيقيش نفسك بجد

    .....
    هو....انت فين...؟ مش بتردي علي الموبايل لية...؟
    هي ....كنت بصلي ....مصليش يعني
    هو...يا بنتي انا مش صحيتك تصلي الفجر ....؟!! هو انت مصلتيش والا إية...؟
    هي....أنا صليت الحمد لله بس .....نمت بعد الفجر ...وصحيت من شوية وبحب دايما أبدأ يومي بالصلاة...
    هو...حبيبتي أنا فخور بيك...بحبك

    مش عارف ليه حسيت انها كانت بترد بنرفزة

    بالرغم انه هو كان هادى


    ربنا معاكى و يوفقك

    ردحذف
  10. اولا احيكى على اليوست
    ثانيا اوعى تعمل حاجه ضد ارادتك لو مش عاوزه تضيفى حد مضفيش اعتبرى الفيس ومدونتك ممكلتك انتى التى تملكينى لوحدك زمام الامور سواء تضيفى او لا
    ثالثا طبعا كل انسان ومسئول عن حاجات فى حياته سواء مذاكره او عائلته ..والمفروض اللى بيحبوكى يقدرو
    رابعا طبعا الكتابه للكتابه نفسها والواحد مش بيكتب عشان الناس تعلق عندو
    الناس مش بتزود ولا بتنقص المهم انتى

    وربنا يوفقك يارب فى حياتك

    ردحذف
  11. كل ده كلام في قلبك !!!!
    بس حلو لما الواحد بيفضفض بيستريح
    و نفسي اتعلم اعمل زيك و الله

    و يارب اكون اوحد من الناس الى مندمتيش انك عملتلهم آد على الفيس :)

    وربنا يوفقك في حياتك و دراستك

    ردحذف
  12. السلام عليكم
    طبعا مش هعيد كلام اتقال من الاصدقاء
    لكن هقولك كلام تانى

    انه شىء جميل جدا انك دايما تحاسبى نفسك
    انت سنك صغير ولو فضلتى تحاسبى نفسك اكيد هتوصلى لسن معين وتكونى اخدتى خبرة فى الحياة كبيرة
    واضح ان نفسك دايما لوامة وبتبحثى عن الصح وده شىء جميل
    بس بردو نصيحتى ليكى انك تخلى بالك دايما وتكونى حريصة فى اختياراتك لاى حد ولا ى شىء
    لان ساعات بيحصل امر ماتعرفى تخلصى من نتيجته بسهولة

    ربنا يحفظك ويحيمك غاليتى
    اسعدك ربى واصلح لنا شأننا كله

    بوركت ولك ارق تحية

    ردحذف
  13. الحاجات اللى جواكى دى يارحاب فيه منها كتير جوانا

    كلامك تلقائى وده أحلى مافيه

    (: (:

    ردحذف
  14. السلام عليكم

    ممكن أعلق على موضوع الفيس بوك؟ شكرا..

    أختي رحاب... صدقيني كل واحد فينا فيه اللي مكفيه.. وبالذات الأيام دي.. فلا تحملي نفسك فوق طاقتها لمجرد المجاملة..!!!
    وبالذات من تكون علاقته مليئة بالعتاب.. فقديما قالوا "كثرة العتاب تورث البغضاء".. حتى لو كان بين الأصدقاء المقربين..!

    بالمناسبة حدث معي منذ ايام قليلة أن فوجئت بطلب إضافة من شخص من أهل مدينتي (يبدو أنه وجدني صدفة).. ورفضتها بلا فيمتو ثانية من التردد رغم أني لم ألتقيه في الواقع من 25 سنة.. لأن هذا الشخص كانت علاقته بي (لعنة).. وظللت أعاني منها نفسيا فترة طويلة بعدها..!!! فهل مثل هذا ممكن أضيفه لمجرد المجاملة؟!!!

    مجرد حاجة جوايا أشاركك فيها..! :)

    ....................

    أما المجموعة الرومانسية من حاجاتك فصدقا استمتعت بمعظمها.. ولكن في صمت.. لأني اخشى أن يفقدها تعليقي -الجامد عادة- رونقها...!

    ....................

    تحياتي أختي الكريمة... وفضفضي وما لكيش دعوة.

    ردحذف
  15. آآآآه صحيح.. منتظر احتفالك بالمدونة.. طبعا أنا معزوم؟

    ردحذف
  16. ايه دا كله يا رحاب
    والله انا عمال اقرا الكلام من الاول للاخر
    ومش عارف اقول ايه
    الحمد لله انك بخير حال
    ويارب كدا دايما
    علي فكره اعجبني اخر مقطع جدا
    رومانسي زي حالاتي

    ردحذف
  17. صباح الورد يا رحاب

    كل سنة ومدونتك يارب عامرة بقلمك

    النابض بكل إبداع ...

    هنا أحسست بصرخات صامته ولكنها تعترض

    على بعض المواقف المؤلمة فكيف للصديق

    ألا يكون صديق برغم أنه يتشدق بذلك ؟

    هنا سؤال يحتاج أنت أن تجيبي عليه

    حتى لا يستغل أحد مسمى الصداقة بشكل

    سيء فلا نجده عند الحاجة ...

    التدوين وحملة عتب ... للأسف كثير من

    المدونين قلبوها ساحة حرب من يحمل

    تعليقات أكثر وهو ما نشاهده بكثرة

    فتغير مفهوم الكتابة وحتى القراءة

    فعندما أدخل مثلاً لرحاب أو مصطفى أو

    ريماس فهذا لأنني أستمتع بما كتبوا

    لا أن أعلق أو حتى أرغب في تعليقهم

    مع أن أراء الزملاء تهمني بشدة ولكن

    ليس بهذه الطريقة ...

    عند الحب سيدتي سنتمنى أن أبنائنا

    يشبهون شريك العمر فلذالك لن أستغرب

    لو تمنيت أن أبنتي تكون نسخة مكررة

    من والدتها ...

    تحياتي

    ردحذف
  18. ربنا يرزقك بالصديق اللي يعرف يقدر معنى الصداقه والحبيب اللي يملى ايامك سعاده وهنا ومش مشكله العيال هيبقوا شبه مين المهم انهم يكونوا موجودين ما بين اتنين بيعملوا جهدهم عشان سعادتهم
    كل سنه ومدونتك وانت بخير واجمل صوره

    ردحذف
  19. الاخت رحاب كل التحية
    حابب انى اعلق بس عللى جزئية التعليق فعلا عندك حق نحن نكتب فقط من اجل الكتابة هو ليس ميدان للسباق من يحصل على تعليقات اكثر بقية الاجزاء فى الادراج تعبر عن نفس مكتظة بالافكار والملفت انك فى اخر ادراجاتك تتناولين فقط ما يدور داخلك انت فقط اعى جيدا هذه الحالة
    بالتوفيق

    ردحذف
  20. كل سنة والمدونة بخير

    انتى اكلمتى فى حاجات عندك حق فيها

    بس صوابع ايدك مش زى بعضها

    وكويس انك عبرتى

    وهو احنا عاملين المدونات لية؟

    عشان نقول االلى عايزين نقولة مش مهم كل الناس تقدر وتفهمة

    مش مهم الناس كلها تعقب علية

    المهم انى اكتب واقول اللى احب اقولة واكيد فية اللى بيقدر واللى ما يقدر

    ربنا يوفقك

    مع خالص تحياتى

    ردحذف
  21. ربنا يطمنا عليكي دوما يا رحوبه

    والله العظيم وحشني جدااا الفضفضة معاكي لابعد ما تتخيلي :(

    ربنا يوفقك حبيبتي يارب

    ردحذف
  22. كل سنة وانت وبلوجك طيبين....واللي مايعجبكيش شيلى اسمه واللي مش عاجبخ يشرب من البحر وده جمبكم

    ردحذف
  23. كل ده يا رحاب

    صدقينى مش عارفة ارد على ايه ولا ايه

    كل اللى جواكى ده صح اوى

    جوانا احنا كمان

    نفسى اعرف افضفض كده زيك

    ربنا معاكى

    ردحذف
  24. رحاب ..
    الفيسبوك بالذات .. ماتقبليش اللي انتي عاوزة تقبليهم بس ..
    لأنه كدة انتي بتدعيهم لحياتك الخاصة ..
    او لجزء منها .. بمزاجاتك و اهتماماتك و صورك احيانا ..
    فلو مش عاوزة تقبلي اضافة حد ماتقبليش .

    حاجة كمان ..
    توقع الاسوأ دة ساعات بيبقى حيلة نفسية عشان نتقبل الاسوأ لو حدث و نفرح بالحد الادني من الحاجة الكويسة .
    تفاءلي .. و كله خير ان شاء الله .

    ردحذف
  25. رحاب انتى فين دوختينى عليكى عاوزاكى فى موضوع مهم جدا

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين