الخميس، 3 مايو 2012

وانا معاك............

عارف......
ان اللون اللي كنت لابساه  اخر مرة هو نفس اللون اللي اتقابلنا بيه اول مرة ...؟
وكان عاجبك اوووي
يارب يفضل علي طول عاجبك عليا

عارف.....
لو كنت مصلحتنيش
كنت هصالحك غصب عنك
لاني بحبك اووي.....وأكتر منك علي فكرة....ومتقولش لاء
عارف.....
لو كنت مقولتليش انك مسافر وسيبتني وسافرت ....
كنت هموت....
مش زي ما كنت بقولك يا ريتك كنت سافرت من غير ما تقولي وكنت هبقي مرتاحة
عارف....
لو مكنتش شوفتك....؟
كان ممكن اموت.....
وكنت هفضل مأنبه نفسي اني مصلحتكش قبل ما تسافر
عارف......
مكنتش عايزة اعيط......
بس مقدرتش
والله غصب عني
كنت عايزة اسيب ابتسامة وضحكة قبل ما تسافر تفضل فاكرهم .....
بس ملقتش غير دموع عيني
عارف
كنت عارفة انك بتغتت عليا عشان  تداري اللي جواك
بس انا بحس علي فكرة .....



عارف....
لما كنت كل شوية اقولك عايزة اعرف رايحين علي فين ....كنت بس عشان اقول كلام وخلاص لاني بجد مكنش يهمني غير اني معاك ولما كنت بقولك عايزة اروح  ده عشان معيطش وتفضل فاكر دموعي وتنسي ضحكتي
عارف لما انت قولت ان اغنية عمرو دياب دي بتفكرك بيا الاغنية بقت ف بالي علي طول
وحتي لما غنيت " سألتك حبيبي " مفكرتش اني رايحة فين ...
عارف
انك اول مرة هتسافر  وتسيبني ......بجد
متقولش اني كل مرة بقول كدة ....
لانك كل مرة بتكون هنا ف مصر ....بعرف اكلمك ....بعرف اني منين ما يحصل شيء هعرف بيه ....اول ما اسمع صوتك ....
لكن انت مسافر بره مصر ....يعني مكالمات محدودة ....
صحيح هيكون في مكالمات من وقت لتاني بس مش زي ما كنا متعودين...
يعني مفيش اني اصحي علي صوتك الصبح ولا اني انام عليه
مفيش خناقات كل يوم بينا واني اتنطط  في الارض واخبط  رجلي زي الاطفال لما تقولي كلمة مش عجباني
مفيش اني اهددك لو مصالحتنيش اني اكلم المدير بتاعك واقوله انك مزعلني
ههههههههههه
تعرف اننا مجانين فعلا
بس بحب الجنون معاك
عارف ....
بدعي ليل نهار ان ميكونش في اي بنوتات خالص ف الشركة .....لاني طبعا عارفة ان موقع الشغل للرجال فقط لكن الشركة حاجة تانية اكيد فيها والمصيبة انهم اجانب ......
هههههه



واثقة فيك اكيد .....بس مقدرش امنع نفسي من الغيرة ...
اذا كنت بغير من اخواتك وباباك مش هغير من اللي معاك ف الشغل...؟؟!!!
يا ريتك تفتكر اني بشتاقلك حتي وانت معايا
عارفة انك اخدت صوري معاك
ومن غير صور انا عارفة اني جوه قلبك
عارفة انك اخدت هداياي كلها معاك.....
بس انا عطيتك هدية اخر مرة عارفة انها الاغلي والاجمل ....يا ريتك تحافظ عليها وتفضل جواك وتفتكرها دايما
خليك فاكر
اني طلبت منك تكتب لي كل يوم رسالة وتطمني عليك
وحياتك بلاش الاكل التيك اووي ده ....
خللي بالك من نفسك ومن صحتك اوووي
عارف
انك لأول مرة هتكون مش موجود ف عيد ميلادي ...
هيكون وحش اووي من غيرك وهيكون يوم مالوش لازمة لانك مش هنا
يا ريتك تفضل عارف اني  .. .... ....
خد بالك من نفسك.....اللي هي نفسي

هناك 4 تعليقات:

  1. :)
    ايه الكلام الكبير ده
    انا لو منه ربع الكلام ده يخليني مااسافرش وااااااااااصل
    ونقول ربنا مايحرمهم من بعض

    ردحذف
  2. السلام عليكم
    عارفة يا رحاب جنونك بيخلى للتابة طعم تانى بحس روح طفلة اللى بتكتب وهى بترقص وتغنى
    دومتى مرحة
    اسعدك الله

    ردحذف
  3. طب عارفه ان الكلام دا جميل اوي
    طب عارفه ليه لانه عفوي جدا
    وخارج من القلب
    طب عارفه انا لو منه وسمعت كلامك دا مسافرش ابدا هههه
    بجد بجد بوست جميل
    ربنا يرجعوا بالف سلامه ويكون سالم غانم اللهم امين

    ردحذف
  4. ربنا يقويه على قوانيين حمورابي اللي معموله لكل موقف....كان الله في عونه بس بكره ح يطلعه عليكي يا حلوةهههههه...حلوة برضه

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين