1
النفق
النفق أول مرة عديته معاك...ولما خفت ومسكت إيدي
وسألتك علي الراجل العجوز اللي علي الكرسي قاعد وساكت
وهو لية قاعد هنا ...؟
قلت لي بابتسامة ..." عشان البنات الحلوين زيك ...ميتخطفوش....ومحدش زيي انا يقدر ياخد حضن وبوسه والراجل العجوز ده موجود...^-^
حسيت احساس جديد ...بالحب...مع امنية...وشوية خوف
2
البحر
لما قعدنا علي الحجارة
ولقينا مكتوب ادامنا " حرام شرعا أن تمسك بيد خطيبتك " وساعتها ضحكت انت وقلت : الحمد لله دي مش خطيبتي ...دي حبيبتي ....
ساعتها معرفتش المفروض ازعل والا افرح ...
ما انت معطتنيش جواب صح ...علي اني اية عندك بجد...!!!؟
3
الترام
ولما كنت دايما اقول ان الترام ده مواصلة مملة وبطييييئة اووي
بس حبيته معاك
ودايما كنت بحب الترام يعطل واخاف....
عشان ايديك تتلف حوالين كتفي وتطمني إنك هنا...معايا...ومش أخاف
بس ولا مرة عملتها ...ولا إيديك طمنتني ....
4
ف النادي
وبعيد عن الناس قعدنا ....
وطلبنا نفس طلباتنا...
بصيت لي وقلت " غني الاغنية اللي تيجي علي بالك ...عايز اسمع صوتك .."
بصيت للبحر أنا وغنيت.....شايف البحر شو كبير ...كبر البحر بحبك...
انت " وانا بحبك اكتر م البحر والشجر والهوا و.......و و و و ....
بس يا تري ...كنت تقصدها بجد...؟؟!!!
5
المطار
مكنتش حابب اقولك اني مسافر
وكنت هسافرمن غير ما اقولك
بس مقدرتش
حبيت تكوني انتي اخر شخص اشوفه ف مصر
بلاش دموع ...عايز أشوف ابتسامتك وضحكتك قبل ما أسافر
اقولك نكتة " مرة واحد في عيد الام جاب لمامته.....هههه اضحكي كدة يا بايخة...
مش عارفة وقتها ازاي كنت بفكر اني اخيرا ...هرتاح شوية من غيرتك اللي بتخنقني بيها ومبتدنيش فرصة أفرح بيها.....
6
النفق...
كل يوم وانا بعدي منه بلاقي اتنين ماسكين ايدين بعض...حاضنين بعض
بفتكر ....بفتكرنا....
وساعتها معرفش بيكون احساسي اية ...
اشتياق ...والا مجرد ماضي راح
7
البحر ...
وكل اتنين مع بعض...
مش باصين للي مكتوب ع الحجارة
ولا في شيء بيمنعهم انهم يعبروا عن حبهم
كل اتنين مع بعض واحيانا تلاتة....الحبيب والحبيبة وثمرة الحب...
ساعتها كنت بشتاق ....لانك تكون هنا وتفكر زي ما كنا يوم بنفكر اننا نكون مع بعض مع اولادنا اللي جايين بحبنا
8
النادي....
كان فرح صاحبتي الانتيم....
سعيدة...أه...بفكر ...أه...فيك...طبعا
بفكر ف يوم ما نكون سوا ...زي صاحبتي كدة ..ف النادي ده
صاحبتي طلبت اني اغني لها....
والغريب انها طلبت اني اغني نفس الاغنية اللي اختارناها انا وانت لرقصتنا الاولي سوا....
تفتكر دي كانت صدفة...؟
الغريب اني افتكرت اني لو غنيتها هكون سعيدة لاني هفكر فيك....واتخيل اني معاك
بس كان احساسي غير ....
معرفش لية حسيت بالبعد بيخلق بينا فجوااات
ولأول مرة أحس ان اللي بعيد عن العين ...بيكون بعيد عن القلب ...أحيانا
9
الترام....
اتعطل الترام .....ولآول مرة احس اني محتاجة بالزمن يقف عشان اعيد تفكيري تاني ...
ارجع تاني ...محبكش
ارجع تاني ....واسمع كلام العقل
ارجع تاني ...واسمع كلامك وانت بتقول......الفراق ....هو الحل
بدون كلام...بدون تفاهم...بدون ما تحس ان في قلب مجروح...استناك بشوق
وانت ...نسيته ف اول امتحان...للبعد...
انت بعدت لية ....؟
كنت بسأل نفسي طول الوقت السؤال ده...بعدت لية ...؟
ع البحر.....
ف النفق.....
ف الترام.......
وكل مكان كان بيجمعنا سوا....
ف النفق.....
ف الترام.......
وكل مكان كان بيجمعنا سوا....
استسلمت للحزن...ساعات
لليأس ساعات....
بس ساعات كان بيتملكني حنق وغيظ عليك......
وكنت اوقات اتمني اشوفك بس عشان أاذي احساسك ...زي ما انت عملت معايا ...
لليأس ساعات....
بس ساعات كان بيتملكني حنق وغيظ عليك......
وكنت اوقات اتمني اشوفك بس عشان أاذي احساسك ...زي ما انت عملت معايا ...
بتقول ان ده ميبقاش حب.....
لية ...؟؟؟ الحب والكره وجهان لعملة واحدة...
واحيانا بنإذي اللي بنحبه عشان مش بيكون حاسس بينا....
يا تري انت حسيت بإحساسي ده لما قلت ....فراق؟؟!!؟
10
المطار....
صاحبتي الانتيم بتبكي وهي بتحضني " يعني خلاص مش هشوفك الا كل سنة والا اتنين ...؟"
ابتسم من قلبي واقولها " يعني يرضيكي اني اكون ف بلد وزوجي ف بلد تاني ...."
واستغرب لفسي ....بعد ما كان احساسي اتخنق جوايا معاك....
ازاي أكون مع شخص تاني ...بإحساس جديد ....محستهوش معاك.....
خارج الاطار
احيانا بنقول ان الحب مش بيجي غير مرة واحدة ف العمر
بس الاكيد ان بطول ما فينا قلب جواه حب حقيقي وطاهر ...
هيلاقي حب حقيقي وطاهر ....مهما حصل معاه العكس
رحاب صالح
الاحد 14 اكتوبر 2012
تحفة يا رحاب
ردحذفالله عليكِ بجد
مش تحفة اووي يا موني
حذفده كله علي اد ادي
الله رائع
ردحذفبس ليا سؤال خلس مين الشيخ اللى سايب كل الاماكن وقاعد على البحر يكتب على الصخره حرام شرعا أن تمسك بيد خطيبتك دا ايه مفتى البحر دا ؟
سؤال تانى اخلس
وكنت اوقات اتمني اشوفك بس عشان أاذي احساسك .زي ما انت عملت معايا ...
بتقول ان ده ميبقاش حب.....
لية ...؟؟؟ الحب والكره وجهان لعملة واحدة...
واحيانا بنإذي اللي بنحبه عشان مش بيكون حاسس بينا....
يا تري انت حسيت بإحساسي ده لما قلت ....فراق؟؟!!
ليه قلبتيها غرام الافاعى ليه ؟
بس بجد رائعه كالعاده
تحياتى
هههههههه
حذفوالله يا عمرو انا دايما بشوف حاجات غريبة بتستوقفني كدة ف حياتي اليومية
وهو ده الي انا بكتبه لانبي بستغربه
نورت
1- بالنسبة لرقم واحد... مش ها اتكلم فيها كتير.
ردحذف2-"انا اية عندك بجد"..؟؟ سؤال ابدي سرمدي بدون اجابة عند البعض..!!
3-بس ولا مرة عملتها ...ولا إيديك طمنتني..!!
4-"بس يا تري ...كنت تقصدها بجد...؟؟!!" اكيد كان بيقصدها (وقتها) لكنه بطل يقصدها (دلوقت)
5-........
6- مجرد ماضي وراح.
7-.....
8- البعيد عن العين.. مش دايما بعيد عن القلب..!!
9- انت بعدت ليه..؟؟
10- برضه.. انت بعدت ليه..؟؟
11- زي 9 و 10..
12- زي 9 و 10 و10..!!!
آه ه ه يا تيمو
حذفحلو التحليل ده
خلاص بس كدة مش هقول حاجة
منورني دايما برغم البعد يا نوفمبر...^-*
مش هعرف اعلق عارفه ليه علشان مش عارفه ليه او عارفه ومش عايزه اواجه نفسي بأني عارفه وافتح علي نفسي باب بسده من زمان
ردحذفبس الحب بيجي مره واحده اه
بس لما بيروح بيبقا ربنا شايل بداله
حب تاني اجمل
احيانا كتير بنقنع نفسنا بحاجات عارفين انها اقتناع وقتي
حذفبس مش اكتر
بس كتير بنظلم نفسنا بالاقتناع ده وللأسف قابلت ناس كتير اقنعوا نفسهم بالغصب وكان مصيرهم الفشل
الحمد لله بحاول دايما اني مكونش فاشلة
{حاب
ردحذفالبوست ده غريب
في الاول خلاني اتبسطت
وبعدين وجعني اووي
لكل لحظة حلوة بتروح في لحظة كمان...
ليه وازاي وامتي وفين.؟؟؟؟
مليون سؤال
ذكريات....
الحياة كلها بقت ذكريات ..من حقنا واللا بقت من حق ناس غيرنا
واللا بقينا احنا من حق ناس تانين مينفعش عشانهم نفكر في ذكريات الماضي
.........
مش عارفة خلتيني اتلغبطت اووي
:((
نسيت اقول حاجة
ردحذفصعب ارتباط الاماكن بذكريات وناس كنا بنحبهم وبعدين اختفوا
بتفضل الاماكن وبتفضل الذكري..وبنفضل زي مااحنا...
......
تخيلي انا كنت بكره ان المواصلا تبقي زحمة والسكة تقف ودلوقتي....بقيت بحب كدة في لجظات معينة
رائعة ... وبتفق معاكي جداً بأن البعيد عن العين بعد فترة بيبدا يبعد عن القلب ...
ردحذفوكمان ...
القلب النقي الطاهر ربنا عزوجل مستحيل يسيبو كدا لازم يخليه مع قلب زيو ... دا ايماني ... شبيه الشيء منجذب اليه ...
وبيقولو الحب بيجي بعد الجواز صح والا لا معرفش ... بس بحب أعتقد بالنقطة دي لحد مشوفها متطبقة :P
هو لساتو محتار وهي قررت تمشي لأول مرة صح ...
ربنا يوفقها بجد :)
مساء الغاردينيا رحاب
ردحذفمحطات مرت بها مع الحب
كان لكل محطة إحساس متجدد
دائماً عذبة في وصفك وإحساسك "
؛؛
؛
لروحك عبق الغاردينيا
كانت هنا
Reemaas❤
جميله يارحاب
ردحذفراائعه انتي كالعاده
تقبلي مروري
تحياتي
بجد الله يخليكى يا رحاب
ردحذفبعدتينى شوية عن التفكير فى المواجع اللى ماليه الدنيا حتى المدونات
عاجبنى بجد كتابتك هنا
بس صدقينى حتى الكتابة احيانا بتكون سبب فى زيادة الالم لما بنقعد نفكر ونكتب
يابخت اللى بينسوا
دمت بخير
جميييلو جدا وفيها تحليلات منطقية وعميقة في نفس الوقت
ردحذفمدهشة
تحياتي وكل الود