السبت، 24 أبريل 2010

لقاء الشتات ........وقلة الحياء


كل مرة كنت بقول اننا بنبعد مش بنقرب من بعض.... بنتوه.... وبرغم اننا كنا مختلفين عن بعض لكن كان بيجمعنا شيء اتعرفنا ببعض وبقينا اصدقاء وكل واحد فينا من مكان ومن محافظات مختلفة لكن كان دايما يجمعنا الحب والصداقة , اختلفنا كتييييير واتفقنا اكتر واكتر , اتخانقنا خناقات اصحاب وبرغم ان اللي كان بيجمعنا معدش بيجمعنا لكن برضه منسيناش بعض وفضلنا اصحاب, و من سنة يمكن كان في خلاف ف الجروب لعدة اسباب نعرفها اوووي بينا وبين بعض لكن خارج الجروب لا يعرفون شيء ودي حاجة حلوة فينا, فرح صالح جمعنا وخطوبة عمرو وهاجر قربت بينا اكتر لكن كان في شيء مفقود كنت بحسه دايما حاسة بالتشتت احنا مش زي زمان فينا شيء ناقص في ناس غابت وبدون سبب وفي ناس غابت وبسبب وفي ناس بتسأل لمجرد السؤال مش اكتر وفي ناس غابت وده الاحسن لأنها مكانتش تستاهل انها تكون مننا وفي ناس جديدة دخلت الجروب مرحب بيها جدا وبنتمنا انها ترتبط بينا اكتر برباط مقدس وفي ناس تانية دخلت الجروب بس مش برضه زي الناس الاساسية في الجروب.....

اتفقت مع هاجر وعمرو اننا نتقابل واعرفهم باصحابي في الكلية , كنت بتمني نعيد ايام زمان , حتي اليوم ده اصحابي في الكلية كان عندهم خطط اخري بس عرفت اخد " رضا " صاحبيتي معايا وانا رايحة اقابل عمرو وهاجر اتقابلنا ف نفس المكان اللي كانت ذكرياته مش حلوة لينا كلنا برغم اننا اتقابلنا فيه مرة واحدة  بس المرة دي خليناها حلوة , وصلنا انا ورضا وانتظرنا عمرو وهاجر عمرو وصل الاول وعرفته علي رضا ووصلت هاجر واتعرفت برضا واتمشينا شوية , وبنتكلم انا وعمرو في اخبار الجروب والناس الغايبين , لقيت موبايلي بيرن وكان شاذلي اللي بيتصل واخد عمرو مني الموبايل وكلمه وبرغم ان عمرو عمل فيلم هندي الاول وانت مين وتعرف صاحبة الموبايل ده ازاي و.......اذيك يا انسبيكتور ........ههههههه كان موقف لذيذ جدا ....

برغم ان شاذلي عرف صوت عمرو طبعا وبعدها عاتبني ازاي اكون ف مصر ومتصلش بيه ونتقابل كلنا ...؟ يااااة معرفتش هما قالوا اية ,عمرو صمم ان شاذلي يجيلنا وقلناله اننا هنستناه , اتغدينا في كنتاكي وسط ضحك عمرو وتعليقاته علي اغاني ميلودي اللي كانت شغالة , اتكلمنا عن الجروب واحوالة المشتته وسألته عن اتنين من صديقاتنا اللي قال عنهم انهم زي السمنة البلدي علي البتنجان _ تشبية عجيب طبعا علي اساس انهم اتصاحبوا اوووي _ وانهم برضه غابوا واختفوا وقفلوا الاكونت ع الفيس بوك والمدونات مع بعض زي ما يكونوا متفقين ,طيب وصالح هيجي امتي ؟ يعني ممكن كمان شهرين كدة واحشني اوووي , وسالته عن صديقة اخري قال انها بتسأل بس سؤال وخلاص , وفلانة يا عمرو ..؟ ياااااة هي لسة عايشة والله بحسبها ماتت ..!! يااااة هو وصل الامر بينا للدرجة دي , طيب وفلانة ؟ لاء علي الفيس بوك بس والله يا حوبة , قلت له علي الاقل لسة في امل اهو تقريبا في مجموعة لسة بتتكلم مع بعض _ اقصد انا وعمرو وهاجر وشاذلي وصالح و ميادة وعلا _ يعني في امل ......, اتمشينا واحنا بناكل ايس كريم واتصلنا بشاذلي تاني وعمرو وهاجر قالوا نتمشي لغاية الكورنيش وشاذلي يجيلنا هناك , ويا سلام علي المركب اللي ركبنا فيها كنت همووووت م الرعب وحاسة بالدوخة وكدة يعني برغم اني بحب المية والبحر بس مش عارفة كنت خايفة لية يمكن عشان بحس بسرعة بالدوخة والا الاغاني اللي كانت شغالة كنت هموت م الضحك ولما عمرو فضل يغني الاغنية ويعمل نفسه مش سامعني وانا بكلمه ,اخيرا شاذلي جه واجتمع علي الاقل اربعة من الجروب ده شيء جميل جدا وبعد السلام والعتاب اتحرك المركب وما بين الشعور بالسعادة ف وجودنا مع بعض وتجميع شمل الاصدقاء وحزن عشان اللي مش موجودين وكنت اتمني اشوفهم بجد , كلمة عمرو قالهالي : كل واحد شاف طريقه ومبيسألش عن التانيين , يمكن مرة علي الفيس بوك والا ف المدونة ودمتم وكله كلام وخلاص ومجاملات علق عندي عشان اعلق عندك زي ما يكون بفلوس .....

ياااااااة هو وصل بينا الحال لكدة ....!!!!! لاء مش كدة لسة فينا خير لبعض والحمد لله لسة فينا ناس بتسأل وبتهتم......بنتكلم ومنسجمين انا وشاذلي ورضا , عمرو وهاجر كانوا في مقدمة المركب بيفكروني بجاك وروز في تيتانك , فجأة حصل حاجة مش متوقعة خالص خليتني بجد مكسوفة جدا بنوتة امورة اووي وقفت وسط المركب خلعت صندلها ورقصت .....حافية القدمين يا سلالالالالالالالالالالام يا جماعة, الشاب اللي معاها صاحبها بقي حبيبها خطيبها ايا كان مشغل الفيديو ف الموبايل وبابتسامة فخورة بيصورها ومش عايزة اقول البنت كانت بترقص ازاي كفاية ان العيون بجد كانت " العيون ستخرج من محاجرها" عليها يا نهار اسووووووود في اية بجد راح فين الحياء والكسوف يا جماعة بجد انا كنت مكسوفة ابص لها فما بالكم بالشباب اللي كان مالي المركب ....!!!

فين حياء وكسوف البنت المصرية ؟ طيب فين دم الرجل المصري الحامي اللي بيغير علي حبيبته ؟ لاء ده كان فخور اووي وهي بترقص بالشكل المثير ده والعيون هتموت عليها وهي بقي ابتسامتها مش عايزة اقول عليها أي كلام وخلاص بجد مصييييييبة .......طبعا احنا كانت لينا تحفظات علي الموقف ده .....,والحمد لله كنا متفقين جدا, عمرو قاللي ان الفسحة دي تعويض عن يوم الخطوبة اللي انا محضرتوش وبجدج انبستط جدا يا عمرو بس زعلت جدا عشان الفلوس اللي انت دفعتها يا بني انت داخل علي جواز وشقة ومصاريف وبلاش تفكرني كل شوية وتقول 311 جنية هههههههه ......

رجع المركب تاني لنقطة البداية وخلاص هنفترق الوقت كان بسييييييييط اوووي كان نفسي ابقي شوية اكتر معاكم بس المهم اننا كنا مع بعض نفتكر حاجات حلوة وحاجات جاية احلي والمرة الجاية نكون مع بعض اكتر من المرة دي والناس الغايبين يرجعوا تاني ......
بعد ده كله يكون معانا شاذلي انسبيكتور يا جماعة ومندخلش المتحف المصري تصوروا ...!!!!
يلا مش مشكلة نخليها االمرة الجاية لما نكون كلنا مع بعض





حوبة

الاحد 25  ابريل 2010



هناك 14 تعليقًا:

  1. هههههههههههههههههههههههههههه
    حلوة الواقف دي
    ايه يا بنتي انتي مقضياها مقابلات جروب الفيس بوك
    و مقابلات جروب البلوجرز
    ههههههههههههههههههههههههههههه
    ارحميني بقى اصل بتغاظ بجد
    لان نفسي اقابلكم كلكم و الله
    بس الغربة
    يللا الحمد لله
    المهم قصة جميلة اوي يا حوبة يا قلبي
    و بجد الاصدقاء الزمن ده بقوا قليلين اوي اوي و ان سالوا عن بعض بيبقى مجرد سؤال تقضية واجب و خلاص
    لكن مش بنفس
    عموما ربنا يوفقكم يا رب و يزيد الحب و الاحترام المتبادل بينكم يا رب

    فرحانة اوي علشانك و الله انك بتقضي ايام حلوة
    ربنا يسعدك كمان و كمان يا رب

    و بعدين ذاكري بقى
    هي الناس في البيت فاكرينك بتروحي القاهرة علشان الكلية و انتي مقضياها مقابلات و خروجات و كنتاكي يا بنتي ؟؟؟!!!!!!!!

    لا اصحي يا ماما ده انا هقولهم
    ههههههههههههههههههههههههههههه

    يللا يا حبيبتي خلي بالك من نفسك و واحشاني موت و الله

    خالص حبي و تقديري

    ردحذف
  2. شفتي انا اول تعليق دايما على بوستاتك

    يعني المفروض يبقى ليا جايزة
    ههههههههههههههههههههههههههه

    ردحذف
  3. بالنسبة للصداقة الوقت احيانا ومشاغل الحياة احيانا اخرى تكون هي السبب في البعد وفي ما اسميته انت الشتات
    هنيالك الفسحة الحلوة دي وهقبال الجاية ان شاء الله
    تحياتي وودي

    ردحذف
  4. ساعات البنات البيرقصو في المراكب دوول بيكونو تبع المركب نفسه...

    بس سيبك.. المهم انكم اتجمعتو في وقت جميل مع اصحابك..


    تحياتي

    ردحذف
  5. ممكن العدد الكبير ينتهى بتلاته اربعه انا بحس ان دول هما الحقيقه اللى بجد اللى قدروا انهم ببساطه وتلقائيه يعدوا الحواجز الكتير عشان تفضل الصداقه موجودة

    ردحذف
  6. مهموهة صباح الورد يا قمر
    ميرسي يا اول تعليق يا جميل
    اصحابي دول يا ستي من ايام ما كنا بنكتب في جريدة الدستور من حوالي خمس او ست او سبع سنوات وبجد مش قادرة اقولك اد اية هما يتحبوا بجد وكان يوم رااااائع
    عقبال ما تيجي مصر وتقضي يوم معايا علي بحر بلطيم واكلك سمك مشوي بايدي

    ردحذف
  7. مهموهة تاني
    جايزة جايزة بس اشوفك بقي
    وبالنسبة للمذاكرة والله انا بدأت بس عشان انا قليلة الخروج من البيت فبستغل الوقت برضه في اني اشوف اصحابي

    ردحذف
  8. خواطر شابة
    صحيح مشاغل الحياة بتاخدنا لكن بنفضل برضه فينا جانب الحب والود اللي بيخلينا من وقت لتاني نحن للأوقات دي والحمد لله اننا لسة فينا الجانب الحلو اللي مبينساش

    ردحذف
  9. ابو علي " سمع هوص"
    نورتني
    بالنسبة للبنات اللي بيرقصوا تبع المركب او مش تبعه انا بقول الموقف نفسه يا نهار اسود انا كنت ميته م الكسوف والله , والمهم علي رأيك اننا اتجمعنا وقضينا وقت بجد سعيد مع بعض , عايزة اقولك اني سمعت من غادة عن لقاء قريب للمدونين مش عايزة يفوتني بس يارب يكون وقت مناسب معايا

    ردحذف
  10. مها العباسي
    نورتيني باول تعليقاتك
    صحيح ممكن العدد الكبير يفضل يقل يقل لغاية اتنين تلاتة والصداقة مش بالكثرة بل بالمشاعر والحقيقة والحمد لله فعلا الجروب بتاعنا كان كبير بس بجد في ناس مكانتش تستحق انها تكون معانا وفي ناس فضلت هي هي علي حقيقتها وصدقها وده المهم وفي ناس دخلت الجروب وبجد ناس تستحق الحب , المهم ان لسة في صداقة حقيقية

    ردحذف
  11. سلاموا عليكم
    ازيك يا حوبة ...الصداقة شئ جميل لكن للاسف بسبب الى شفتة فى حياتى بقيت افكر واظن هل فية صداقة بجد ولا الموضوع كلة مصلحة وملقتش الجواب الى فى القران وهوا ان الصداقة والحب فى الله هما بس الى حقيقيين والباقى كلام فاضى
    ق ت (الاخلاء يومئذ بعضهم لبعض عدو الا المتقين) والحديث الشريف ان من السبعة الى يظلهم الله فى ظلة يوم لا ظل الا ظلة رجلان تحابا فى الله اجتمعا علية وتفرقا علية
    تحياتى

    ردحذف
  12. الارموطي
    ازيك اخبارك اية
    بالنسبة للصداقة احنا بنتصدم كتير جدا لكن مش معني كدة اننا لوحدنا ومنصاحبش حد لانه مش كل الصحاب وحشين يعني انا مثلا في من حياتي حسيت ان لازم اقطع علاقتي باي واحدة من صحباتي تتخطب لان كل واحدة تتخطب خطيبها يبقي سخيف معايا مش عارلافة لية ويمكن بشكل وحش جدا حسيت اني غلط لكن بعدها قلت لنفسي انا مش غلط انا بس قابلت الناس الغلط والحمد لله دلوقت عندي اصحاب حلوين بحبهم وف غ مش اعرفهم الا علي اااااااااااااااونات وبحبهم جدا مش لازم الصديق يكون من مكان قريب منك لكن كفاية انه يكون معاك بصوته وروحه ...تحياتي ليك ويارب تدوم الصداقة بينك وبين اللي تحبهم

    ردحذف
  13. رحاب صلاح ....
    لما ييجى قرايبى من أستراليا دايما بنروح المتحف المصرى والأهرامات وأبو الهول وطبع الصوت والضوء ( بيختاروا يوم الترجة بالإنجليزى عشان لغتهم) ونختمها دايما برحلة بالمركب بالنيل وطبعا "الدى جى " وموضوع رقص البنات
    ده عادة وماتستغربش الحياء دى بقت كلمة غريبة بمجتمعنا ودومتى على هذه الرحلة وكملى بقى باقى الأماكن
    farouksam.blobspot.com(عصفورالجنة)

    ردحذف
  14. فاروق ابن النيل
    اهلا وسهلا ونورتني
    ويظهر ان كل الناس كانت عارفة ان ده عادي ما عادا انا
    خلالالالالاص يا جماعة انا آمنت اني مش عايشة في مصر
    شكرا فاروق وانتظر زيارة قريبة لمدونتك

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين