الأحد، 16 يناير 2011

بتـــــخاف مــــن ايــــــــة....؟

منذ فترة قليلة كتبت المدونة الجميلة هبة فاروق عن احلام الطفولة اللي فضلت عايشة جوانا وطلبت اننا نكتب عن الفترة دي ...
بس انا لقيتني بكتب عن  مخاوف الطفولة اللي فضلت جوايا لغاية دلوقت.....
الخـــــــــوف .....
غريزة فينا ....وإحساس .....
يمكن ناس بتخاف الي حد المرض ..... الفوبيا يعني....
زي اللي بيخاف من الاماكن العاليا او الضلمة او حتي بيخاف م الناس....
بتخاف من إية ...؟
أنا هتكلم عن نفسي .....
وأنا صغيرة كنت بخاف من قصص جدتي وأمي عن النداهة ....وابورجل مسلوخة والجنية أم الشعور....
كنت بنام واأنا بفكر ف كل ده وأخاف ...اشد الغطا وأغمض عيني أووي....وأمسك ف أختي ألتمس الامان فيها...
أنا بخاف من إية....؟
بخاف من السلم اللي من غير درابزين ...بس اكتشفت ان ده سببه اني وقعت من علي السلم وانا صغيرة عشان كدة بقيت  لازم لو طالعة اي سلم اكون ماسكة في الدرابزين حتي سلم المترو...
بخاف من الحشرات ....خصوصا الصرصار....والبتاع ده اللي بيمشي علي الحيطة....البرص....بخاف جدا منهم ..
لكني بخاف اكتر واكتر من العنكبوت ...خوف لحد المرض فعلا ...فوبيا يمكن....يا نهار ازرق لو لقيت عنكبوت ....حتي لو كان العنكبوتة الغيرة دي اللي ممكن تكون في سقف البيت ...يا لهوي ي ي ي ي...برغم ان اصلا مفيش عناكب في مصر يعني زي الدول الاجنبية ....بس مش عارفة  بقي السر في اني اخاف من العناكب بالشكل ده....حتي ولو كانت مجرد لعبة وعنكبوت بلاستيك... يمكن لاني قريت ادب رعب عن العناكب كتير وشاهدت افلام رعب عن العناكب ايضا كتير ...لكن مش فاهمة السبب الحقيقي لخوفي المرضي ده ...ده انا حتي مش باكل الكابوريا لانها بتشبة العنكبوت ...... والجمبري لانه يشبه العقرب...مممممم آه والله بجد
هما الحاجتين دول اللي لسة بيخوفوني لغاية دلوقت  الحشرات والسلم واحم احم .....الاسانسير ...إستحالة اركب الاسانسير لوحدي  اطلع الدور العاشر علي رجلي ومركبش الاسانسير لوحدي ابداااااااا......
يعني مفيش حاجة تانية انا بخاف منها.....؟
اكيد السؤال ده هيجي في بالكم....
اكيد بخاف من حاجات كتير .....لكن....
بقدر اتغلب علي الخوف ده  بشكل اوبأخر ....
وزي ما دكتور نبيل فاروق قال في مقال له عن الخوف .....ان الخوف ده عامل زي غرفة بيخوفوك من اللي جواها  لكن محدش هيبعد الخوف ده عنك غيرك انت...لازم تتغلب علي خوفك وتفتح الغرفة دي وتواجه كل مخافك اللي فيها.......فاهمني...
طيب....حلو اوووي ....وكلام جميل كلام معقول مقدرش اقول حاجة عنه....
هنسيب الخوف علي جنب وندخل في منطقة الرعب ......
مرعوبة اني في يوم اقوم م النوم مالقيش مصر....
اقوم م النوم مالقيش شعب...
اقوم م النوم  الاقيني في مصر تانية غير اللي انا اتولدت فيها....
اقوم م النوم  الاقيني ف مصر  بحرب داخلية .....محتلة داخليا ...اكتر من دلوقت....
اقوم م النوم الاقي علمائنا الافاضل بدال ما يعملوا لقاح للأمراض المتفشية ف البلد يخلقوا  فيروس يدمر الناس والبلد ...." اكتر ما هي متدمرة يعني"
اقوم م النوم......
لاء مقومش م النوم تاني....
المــــــــــــــــــــــــــــوت......
والموت مش هعرف اتكلم عنه....
بس اية رأيكم كل واحد يتكلم عن مخافة بشكل عام .....؟؟
يمكن نقدر نتغلب علي خوفنا....
ونهزم نفوسنا الضعيفة ...
ونكون اقوي.....
اتمني.......
رحاب صالح

هناك 32 تعليقًا:

  1. (:

    الخوف

    انا بخاف جداً من أنى أروح أعوم مع حد علشان أخاف يغرق

    انا مبخفش أغرق بس بخاف مع اللى معايا جداً

    فلما بنروح نصيف كُنت بخلينى فى البيت أحسن علشان مخنوقش عليهم (:(:
    بالقلق الزيادة (:

    الخوف

    أنا كُنت بخاف من الكلاب و دلوقت بعض الشيىء هههههه

    الخوف

    تقدرى تقولى مبخفش من كُل الحشرات او الكائنات إلا التعبان

    الخوف
    كُنت بخاف اكون لوحدى و دة كان بسبب فيلم رعب أثر فيا يمكن لغاية مخلصت أعدادى
    (:
    دلوقتى بقى بتنشق على فيلم رعب يخوفنى مش لاقى (:(:

    الخوف
    معادش الواحد بيخاف على نفسه
    بقيت بخاف على اللى حواليا اكتر مش عارف ليه

    الخوف
    كلمة مُخيفة

    (:

    تحياتى

    ردحذف
  2. يا سلام بتخافي من العنكبوت
    طيب عنكبوت ماشي مع عنكبوته اتجوزوا وجابوا عناكيب صغيره
    هههههه
    بصي الخوف مش عيب بس لازم نعدي على خوفنا ونعرف ايه اللي ممكن يخوفنا بجد وايه اخر اللي بنخاف منه لو افتنعتي ان العنكبوت مش هيعملك حاجه اكيد هتبطلي خوف منه بس حكاية السلم من غير درابزين اكيد بالنسبه لناس كتير صعبه بس مش دايما
    ربنا يحميكي من كل سوء ويبعد عنك الخوف
    تقبلي تحياتي

    ردحذف
  3. كل ده:)
    تعرفى انى عمرى ما خوفت من قصص الاطفال لان امى كانت دايما تحكيلى حواديت بريئة ولما عرفت ان فيه قصة اسمها امنا الغولة بقى نفسى اوى أقرأها أو حد يحكيهالى:)
    لدرجة ان بقى عندى فضول غير طبيعى انى اتفرج على افلام الرعب والجميل فى الموضوع انى دلؤتى ممكن احكم على اى فيلم من خلال تأثيره فيا واذا كان قدر يخلينى أخاف فعلاً ولا لأ.. وطبعا انتى عارفة افلام الرعب الاجنبى مابتهزرش:)

    السلم من غير درابزين معاكى فى خوفك منه كنت بستغرب من اللى بيطلعوا عليه سواء فى الافلام القديمة او فى الواقع وبعدين فى يوم ابويا قرر يغير سلم البيت من بلاط عادى لسيراميك وطبعا ده معناه اننا قعدنا فترة لا بأس بها من غير درابزين.. فخدت على الموضوع:)

    الحشرات بقى انا مابخافش منهم على قد مابقرف منهم
    بس عادى برضه الشبشب موجود وفى ثانية المهمة تكون تمت بنجاح
    كنت فى الاول لو شوفت صرصار اطلع على الكنبة واصرخ بقى وحركات وحد ييجى ينقذنى وفى مرة كنت فى الشقة لوحدى وده معناه انى مش هفضل فى الوضع ده كتير فجمدت قلبى وضربته.. الغريب انى لغاية دلؤتى كل ما اموت صرصار أصرخ مش من الخوف ولكن من القرف أو يمكن لانى ازاى قتلت:)
    بس ايه حكاية انك تخافى من العنكبوت هو العنكبوت اللى عندنا ده يعتبر عنكبوت بالشبشب يا حبيبتى تخلصى عليه فى ثوانى:)

    حاولى دايما تتغلبى على مخاوفك مهما كانت

    ردحذف
  4. انا زيك كده يا رحاب بخاف جدا من الاماكن العالية والمرتفعات ومش هاقوك سلم من غير درابزين بس لا اكتر من كده لو حفة هاعديها بابقى حاسس اني هاقع فيها ولو بلكونة في دور عالي بادوخ لو بصيت منها
    دي اكتر حاجة بخاف منها مفيش حاجة تاني غير المفاجآت والحاجات الغير منطقية هي دي بس الحاجات اللي بتخوفني
    تحياتي للبوست الجميل

    ردحذف
  5. Ramy
    رامي
    بمناسبة الافلام انا فضلت خايفة من فيلم طارد الارواح الشريرة فترة حلوة اول مرة شفته بس بعدها عادي ...تعرف بخاف من اية اكتر من افلام الرعب المعوي ....يع يع يع بقرف اووي من الافلام دي ومظر الدم والقتل واكلي لحوم البشر اوووووفففففففففف
    بالنسبة لللغرق انا كنت هغرق مرة واحدة بس والحمد لله عموما مش بدخل جوة البحراووي ع الشط يا دوب ...
    فعلا انا بخاف علي اللي حواليا اووي اووي...ومعاك حق ان كلمة الخوف مخيفة...

    ردحذف
  6. eng_semsem
    ابو مـــــــــلك
    اه والله بجد بخاف من العنكبوت مووووت حتي لو مجرد صورة ف كتاب او ف فيلم تليفزيوني او اي صورة ...
    مش دلع والله
    بس مش قادرة اتغلب علي خوفي ده
    ومتحاولش
    ابدا مش هقدر بجد اني اتغلب علي خوفي من العناكب ...
    ادعيلي

    ردحذف
  7. موناليزا
    هههههههههه
    والله انتي عسل اووي
    معاك ان الحشرات مقرفة وده اللي بيخوفني اكتر ....اني اقتل صرصار يا لهوي ي ي ي بخاف وبقرف ومش عارفة اقولك اية...؟ ممكن طيب اقتل صرصار لكن البرص بقي ده ....ابدااااااااا يا مامي مش ممكن اموت م الرعب ولا العنكبوت ابدا ابدا
    بحاول بس كله الا العنكبوت

    ردحذف
  8. مصطفى سيف
    المفاجأت والحاجات غير المنطقية...
    معاك حق اكييييييييد
    انا بدوخ من الاماكن العالية بس مش بخاف منها ...
    ربنا معاك
    وميرسي لكلامك

    ردحذف
  9. كلام جميل بجد ... الخووف ... كلنا بنخاف بس بنسب متفاوتة وامور مختلفة

    بصراحة ... مفتكرش طفولتي كتير ... حاجات نادرة بس ... بس كنت فيها شقية و بحاول أجرب كل حاجة و اعرف كل حاجة ... فاكرة ( أبو البيع ) إلي كانت ماما تخوفني منو ... وتخوفنا كلنا ... دا كان واحد بياخذ الصحون و الحاجات الحديد المستعملة من الناس ... اكتشفت كدا .... و قمت أخوف أطفال أقاربنا لما جه ... مفتكرش لو خفت معاهم :) ... ذكرى حلوة حبيت أقولها :P

    كنت حتى بلعب بالعناكب و أشيلها و حتى مع الضفادع ... معرفش ليه بكبري بقيت أخاف منهم !! .. غريبة أوي !!!

    دلوقت بخاف من الحشرات عموماً ... عادي لو فضلت بعيد عني ... بس تيجي جنبي بسرعة أو تهجم عليا ... شعووور :_(

    بخاف برضو من الظلمة ... و خصوصاً لو حلمت حلم مزعج ... أو شفت فلم رعب عشان كدا بحياتي كلها مظنش شايفة أكثر من 3 أفلام رعب ... ويمكن أقل !! ...

    بخاف من أحلامي المخيفة .. جبانة من الناحية دي :P ... وبرضو من الألم الجسدي ... بتألم بسرعة بظن بشرتي حساسة :P

    بخاف من المستقبل جداً ... و بنفس الوقت مترقبتو ... ازاي هكون ... و فين ؟ ... هسافر والا لأ ؟ ... هعيش فأي بلد ؟ ... هكون سعيدة والا لا ؟ ...

    دي مخاوفي ... حاولت أتغلب على الظلام و الحشرات ... ونوعاً ما الحمد لله بقيت أحسن بكتييييير ... و حسيت بشعور جميل لما قمت بالتحدي دا ...

    مرة كان في حشرة فبيت صاحبتي و كنا بنات ... كلهم كانوا عايزين يقتلوها ... مقبلتش بدا و قلت خليني أطيرها ... طبعا و انا بخاف من الحشرات أصلااً ... بظن كانت زاحفة :p ... فماما لما بتطلع الحشرات من البيت بتاخدهم بالكلينكس ( محارم ) و ترميهم برا الشباك ... فعملت كدا و كنت خااايفة ... بس الف الحمد لله عملتها و كنت فخورة بنفسي ...

    ومرات كنت بخلي اوضتي ظلللمة اوي و بنام و بقول انا اصلا هنام بالقبر والدنيا ظلمة ... او افضل اقرأ ايات قرانية و أسبّح ... وبقيت أحسن

    مش بقول تغلبت على مخاوفي ... بس بقيت أحسن بكتير ... جربي بجد هيكون إحساس رااائع ولو إنك تقللي من خوفك ... جربي تركبي أصنصير لطابق واحد بس و تكوني لوحدك و افضلي اقري ايات قرانية و أدعي ... لما هتوصلي هيكون إنجاااز صدقيني :)

    حاجة واحدة مش بطلت خوفي منها خاااالص ... الحافات العالية ... لما بروح مكان عالي و فيه حافة مش متسيجة ... ببقى خايفة أقترب منها بشكل كبييير ... بخاف أقع :)

    سوري على كتر الرغي

    بس موضوعك شدني أوووي

    ردحذف
  10. على فكرة اكبر غلط اننا نحكى للاطفال قصص غير تربوية و مرعبة كده

    الاسانسيرات اغلبها فى مصر كارثة و لسه واقع الاسانسير بالشاب الصحفى محمد زرير رئيس تحرير برنامج مانشيت و مات طبعا و هو لسه فرحة كان من شهرين

    مش بخاف من حاجة ملموسة لكن بخاف من بكرة كفكرة

    ردحذف
  11. اختى رحاب فى البداية البوست فكرتة حلوة جدا
    الخوف اة من الخوف عدو الانسان انا فاكرة وانا صغيرة كنت بخاف من ((الساحرة الشريرة ))وكنت اتفرج على الكارتون وانا مرعوبة وكاشة فى مكانى بصراحة كان شكلها يرعب
    دلوقتى بقى بخاف من الاماكن المغلقة والضيقة زى الاسانسير والاماكن المرتفعة عندى فوبية منها والصراصير كمان شكلها يرعبنى
    اسلوبك لذيذ ودمة خفيف يارحاب يا قمر
    وربنا يبعد الخوف عنك وعنا
    سلامى لاجمل رحاب

    ردحذف
  12. ‏^‏_^ عسل اوي تسلم ايدك حبي
    ت
    حياتي لك

    ردحذف
  13. السلام عليكم
    عجبنى صراحتك وبساطتك وشوية الحشرات الصغنتاتين اللى بتخافى منهم بس ياريت متقريش الروايات دى قبل ما تنامى بجد
    رعبنى اللى رعبك عارفة احنا بقينا نخاف نتكلم ما انتى عارفة اللى بيتكلم مش بيتكلم تانى ويمكن قريب هنخاف نتنفس كل واحد بيقفل على نفسه كافى خيره شره بيقول يارب استرها
    بس انا بخاف على بلادنا من كل يوم جاى وهى لسه على حالها
    بخاف على اخواتى ليكبروا ميلاقوش لهم مكان
    بخاف على اصحابى يجى وقت نتفرق فيه
    بخاف من مستقبل الغموض محاوطه وكل ما تبان لنا نسمة امل منه تلاقى اللى بيجرى عليها يغتالها قبل حتى ما تفتح
    بخاف على بكرة من بكرة

    ردحذف
  14. حاجات كتير من اللى قولتيها انا مشتركة معاكى فيها يا رحاب

    بخاف من الاسانسير جداااا واطلع السلم احسن كتير عندى


    بخاف موووت من البرص



    بخاف جدا بردو من شكل القطر ههههه غريبة صح ؟



    بخاف كمان اوى من شكل خزانات الماية هههههههه



    وكفاية كده لا تقولى عليا مجنونة

    ردحذف
  15. really fantastic subject
    i hate and i feel terrible from the insects, octopus , scorpions

    in the other sides i love playing with tigers and lions and snakes

    once upon a time i was in zoo

    i go for tigers cage while the guard warn me and i ignored his shouts

    i played with that tiger but i think that tiger was irritated the tiger attack me and its tried to catch my hands finger

    also i love the sea and swimming but i afraid from the sun i feel bad sense i love mist

    the climate of london is suitable and favorable for me

    also trains and metro
    its not good for my mode

    if i see train i feel that iam very weak and small

    thanks rabab

    ردحذف
  16. قطرة وفا
    كلامك جميل وقوللي اللي انت عايزاه كله ولا يهمك يا قمر المدونة مدونتك
    انا بتغلب علي خوفي الحمد لله
    لكن المشكلة في بلدنا اننا مش حاسين بالامان ...ف مشكلة الاسانسير عدم ثقة في الاسانسير نفسة وقوة تحمله مش خوف من المكان المغلق نفسه...
    الحشرات عشان مقرفة والعنكبوت تحديدا لاني قرأت في فترة متقدمة من حياتي قصص رعب كتير عن العناكب ...وكانت مش مرعبة وبس لاء مقرفة كمان ...
    لكن اغلب الاشياء بقدر اتغلب عليها ...
    لكن بيبقي شيء لابد نخاف منه ...
    شكرا لكل كلامك

    ردحذف
  17. Tears
    انا معاك اكيد
    بس المشكلة اني انا اللي كنت بطلب اسمع القصص والحكايات المرعبة دي ...
    اختي الكبيرة بترفض ان اولادها يشوفوا افلام الرعب اطلاقا...
    وكانت ومازلت بتحكي لهم قصص مفيدة وجميلة ومضحكة وحتي سندريلا والسندباد وسنوهوايت كدة يعني...
    اما بــــكرة ....فمش انت لوحدك اللي بتخافي منه ...احنا كلنا
    بس خوفي من بكرة والموت اني مشوفش اللي بتمناه لبلدي قبل ما اموت...

    ردحذف
  18. هبة فاروق
    انت اللي خليتيني افكر ف الموضوع ده
    وانت بجد اسلوبك راقي وجميل جدا
    شكرالكلامك
    واعتقد ان الاسانسيرات ف مصر كارثة للأسف مش قادرين يسيطروا عليها
    وصحيح انه محدش بيموت ناقص عمر لكن ده مش معناه نسيب الاهمال ونقول قضاء قدر...
    شكرا ليك مرة تانية
    وانت اللي دمك عسل والله

    ردحذف
  19. carmen
    شكرا ليك يا جميل
    وميرسي لوجودك هنا
    ^-^

    ردحذف
  20. مدونة رحلة حياه
    للأسف للأسف معاك حق
    وبكرة كلنا بنخاف منه لنفس لاسباب غير المعلنة الا بينا وبين نفسنا
    شوية الحشرات الصغنانيين دول بيموتوني م الخوف واستحالة اعرف انام وانا عارفة ان في صرصار مثلا او برص معايا ف الاوضة
    والعنكبوت برغم ان الحمد لله ف مصر مش زي الدول الاجنبية لكن يكفي اشوف صورته بس واشعر بالخوف
    ميرسي لكلامك
    والصراحة انا طول عمري اقول الصراحة والصدق اهم شيء في اي شيء ...

    حكاية القراية قبل النوم دي فدي عادة اتعودت عليها ولغاية الان مقدرش استغني عنها ابدا

    ردحذف
  21. Ms Venus
    ههههههههه لا والله عادي جدا
    الحمد لله اني لقت حد يخاف م البرص زيي وميقولوش بنت دلوعة وكدة يعني
    عادي علي فكرة اننا نخاف من اشياء كتيرة لانها بتمثل لينا شيء ما ...
    المهم نقدر نتغلب ع الخوف ده وميبقاش فوبيا...
    منورة يا فينوس

    ردحذف
  22. ALLELIO
    انك تخاف م الحشرات والعقارب ...اوك عادي
    انك تلعب مع النمر وتقول عادي ...!
    خوف البحر برضه عادي, بتحب الضباب...!! اول مرة الاقي حد متفق معايا....
    المترو القطر برضه طبيعي
    لندن مناسبة معاك من ناحية اية ...؟ المناخ وبس والا ...؟
    عموما بنتمني لك كل خير وشكرا لتواصلك

    ردحذف
  23. الأخت رحاب ، صراحة انتي حيرتيني لأني دورت على حاجة انتي مبتخافيش منها ، ملقتش ، طيب اللي عايشين معاكي ذنبهم إيه ؟ تلاقيكي مركباهم الهوا على كده ههههههه

    ردحذف
  24. الخوف فكرتينى زمان انا كنت بخاف من الظلمه انا صغير بس الغريب دلوقتى انى مش بخاف من اى حاجه خالص اى كانتتقبلى مرورى ياخت رحاب

    ردحذف
  25. رحاب آسفه على التأخير لأسباب نتّيه بحته:)
    الموضوع جميل فعلاً أنا بخاف من الملاهي بحب أروح لكن استحاله أركب حاجه بتطير و تتشقلب و الحجات دي جربت للأسف و كنت حاسه اني خلاص هموت
    كنت بخاف أوووي من الحفر العميقه اللي قبل البنا ياااه رُعب
    الصراص..مش قادره أكمل الكلمه بالنسبه لي وحوش عظيمه مره رجعت جوزي من بره عشان ينقذني من الحشره المستفزه اليع دي
    بخاف من الوحده جداً لازم يبقى معايا حد واحد على الأقل
    و حجات تانيه كتير أنا جبانه عموماً بس مبخافش من القصص الخياليه بعتبرها حواديت مش أكتر
    تحياتي لأحلى رحاب

    ردحذف
  26. محمد محمود عمارة
    مش للدرجة دي يعني
    اكيد كل البنات بتخاف من الحشرات عموما
    وانا بحاول بقدر الامكان اني اتأقلم واتغلب علي خوفي
    بس كله كم والعنكبوت والصرصار والبرص كوم تاني
    ثم ان اهلي خلاص عرفوا طباعي
    الدور بقي علي اللي هيتجوزني اكيد هيشد ف شعره مني....ههه

    ردحذف
  27. Adel Elbassal
    اكيد كل ما بنكبر بنقدر نتغلب علي خوفنا بس الحقيقة اننا بقينا نخاف علي بلدنا بشكل اساسي اكتر عشان الي بيحصل فيها
    شكرا لكلامك

    ردحذف
  28. شيرين سامي
    بالعكس انا اللي حاسة نفسي مقصرة اووي معاكم الفترة دي وكمان الفترة الجاية عشان الامذاكرة والامتحانات
    ادعولي بس
    وبالنسبة للخوف من الحشرات ده تقريبا في كل الستات والبنات
    يعني طبيعي جدا
    يا ريتها بس تيجي علي اد الحشرات وبس
    دمت بكل خير حبيبتي

    ردحذف
  29. السلام عليكم أختي رحاب...

    طبعا زي ما هو واضح موضوعك طرق على حاجة كل الناس عاوزة تخرجها :)

    دوري بقى:
    أولا: الآن تأكدت أنك قارئة مخضرمة لكل من د.نبيل فاروق و.خالد توفيق (أول من عرفنا مصطلح الرعب المعوي!!).
    ثانيا: أردت أن اضيف تفريق بسيط بين الخوف العادي والخوف المرضي (الفوبيا)، فمخاوف كل منا كثيرة، ولكن ما يطلق عليه منها (فوبيا) هو الخوف غير المبرر ويزداد التصاق معنى فوبيا به كلما أثر على الحياة الطبيعية والاجتماعية للفرد.
    مثلا: الخوف من الأسانسير طبيعي لكن غير الطبيعي أن يمنع الشخص من ركوب الأسانسير تحت أي ظرف ومع أي شخص ولأي ارتفاع!!
    مثلا: الخوف (أو التقزز) من الحشرات طبيعي، لكن أن تجدي مصارعا عملاقا يصرخ ويفر إذا رأى صرصورا غير طبيعي.!!

    ثالثا: مخاوفي غير المرضية:
    1- المرتفعات.
    2- !!!!! العناكب.. لكنها قلت كثيرا بعد دخولي علوم.. الآن فقط تصيبني رهبة منها لكني أتعامل معها.. أما الحشرات فصرت أمسك الصرصار من شاربه وبعض الحيوانات الأخرى كالضفدعة كنا نضعها في جيبنا لحين تشريحها!!

    تحياتي أختي رحاب ... سلام بقى لأن فيه صوت جاي من بره وأنا قاعد لوحدي!!!!!!

    ردحذف
  30. اختي رحاب ،،
    يسعدني التواجد هنا في حياتك اللي انت مش حرة فيها ..
    بالنسبة لموضوع الخوف ، فأنا كنت أخاف من قصص امي " رحمة الله عليها " عن ابو رجل مسلوخة وأمنا الغولة .. " قصص تراثية فلسطينية " ولما كبرت شوية باخاف من المية بشكل عام وبخاف من الكلاب كثير ، وبخاف من الموت " مش موتي انا ولكن موت الناس اللي بحبهم كثير زي ما حصل مع امي رحمة الله عليها "، وبخاف على بنتي الصغيرة ، بخاف على أحلامي ودفاتر ذكرياتي ،، بخاف من اشياء كثيرة ،،، انا باخاف وانتي بتخافي وكلنا بنخاف ..
    تقبلي مروري عزيزتي ودمتي بخير وسلام وأمان ...

    ردحذف
  31. الخوف دائما عدو للانسان
    والاجيال السابقه كانت
    بتستسهل الحصول علي
    الصمت والهدوء عن طريقه
    التخويف
    اما عن تجربتي مع الخوف
    فانا اخاف وجودي في البيت
    لوحدي حتي الان
    مع ان والديا لم يقتربوا
    من منطقه التخويف هذه
    وتحياتي لموضوعك الجميل

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين