الثلاثاء، 18 يناير 2011

عندما تبوح شهرذاد ..... تحديـــــــــــــــــث

بستغرب لية بعض الاشخاص بيولوا نفسهم قاضي وجلاد علي غيرهم لمجرد انهم فهموا شيء  ما
هو انا لو كتبت احساس او عبرت عن حاجة جوايا اكون كدة عديمة الاخلاق وعديمة الرباية   زي ما واحدة قالتلي ...
والا زي ما اتكتب لي تعليق يقول " اللي اختشوا ماتوا وان لم تستح فافعل ما شئت ويا بنتي  ربنا يهديكي واكتبي حاجة مفيدة وبلاش قلة الادب دي..."
ده كان عشان مجرد خواطر انا كتباها ...ولما نشرها الموقع هي كتبت التعليق ده مع اني كنت بعت الخواطر للموقع لشيء في بالي
بس اتضح لي ان اللي كان في بالي صحيح جدا
المهم ان دي مش اول مرة تحصل معايا ان في ناس تتهمني بعدم الاخلاق وقلة الادب وقلة الرباية وكلام افظع  وافظع
لدرجة التكفير  ...تخيلوا....
لية يعني عشان كتبت كلمة حب....عبرت عن مشاعري ...عن امنية ....
لية في ناس بالشكل ده ....بيحاسبوا غيرهم ...
طيب لما هما اللي هيحاسبوني ...ربنا هيعمل إية...؟
وللأسف ان لسة فاكرة قريبتي اللي لما اتنشر لي  مقال في جريدة الدستور  وكان عن الحب
لقتها بتقول كلام مش هقدر للأسف اني اقوله ولا حتي عايزة افتكر برغم انه لسة في ذاكرتي ...
بس الغريب اني لما شفتها بالصدفة في الشارع خدتني بالحضن وهات يا بوس فيا واهلا بالصحفية الشاطرة اللي رافعة راسنا
يعني ...ادامي بوش وورايا بوش تاني
طيب بذمتكم الكلام اللي ف الصورة دي فيه حاجة  ....
ده اللي كان من كام سنة
واما بقي الجديد فوالله انا مش عارفة ده كان مجرد حلم ...
لية اتشتم عشان كلمات كتبتها واحساس عبرت عنه بكلمات هي دي
يدى على كتفك
ويدك على خصرى...
وجهك بوجهى... وعينيك فى عينى...
تتعالى دقات قلبى....
بطبول الفرحة والرغبة...
ورقصة.. واحدة.......
...... حالمة..... معك...
*******
تهمس شفتاك بكلمات
تسمعها أذنى نغمات
تتردد بقلبى صرخة....
معلنة.. إنى أحبك
*****
وتدور بى.. تراقصنى...
ببسمة منك.. تدوخنى....
ولمسة يدك... تذوبنى....
وانتظرك.. لتقول... أحبك
********
عينى أغمضها...لأتجرأ.. لأهمس.. أحبك....
وأريح رأس على كتفك...
أتجرأ.. أنتظر.. تجاوبك.....
أنتظر.. وأنتظر.....
******
وأخيرا أفتح عينى....
وأرفعها..... نحوك.......
لأصحو من حلم .......الرقصة...

بس كدة.............
في النهاية بقدم اعتذاري لكل اللي متابعيني ومش عايزة انسي اي حد لاني مش هقدر اتابع لايام الجاية عشان المذاكرة
والامتحانات ادعولي كتير...
هتوحشوني جدا
تيرز وماجد القاضي واسماء عبد العزيز وكارمن واسلام ومحمد واسامة ابو ملك ورؤوف وخواطر شابة وفاتيما وكارمن وكارولين فاروق وشيرين سامي وهبة فاروق ورامي وكاسبر وسواح في ملك الله وابو فارس  وتيمو وعمرو يسري ومصطفي سيف ومحمد متولي  ومين تاني قولولي ...لو نسيت ....آه وداد وولاء صلاح واستاذ فاروق ابن النيل و...
اممممممممممم يا رب عيني علي فراقكم الايام الجاية ....
ادعولي كتير مش هوصيكم

بقدم اعتذاري لكل اللي مكتبتش اسمهم بس والله غصب عني في ناس كتير بتابعني  وانا بتابعهم حتي ولو معلقتش عندهم  ومعلقوش عندي
ده غير اللي علي الميل سواء الياهو او الجوجل
بعتذرللولو كات وقلب القطة ومدونة من نور  ووجع البنفسج و لمحمد حجاز ونيللي وشهرذاد وفينوس وشمش النهار وعادل وطه  ومحمود وزهراء  وخلود ومروة وغادة ومحمد عمارة وحمدي جعوان وندي الياسمين وشريف  باشا وغيرهم وغيرهم ....
بفتكر كلام اخويا لما قالي حاولي بس يكون في عدد محدود تقدري تتابعيه بلاش تشتتي نفسك...بس اعمل اية بجد في مدونات كتير  تستحق المتابعة ....أعمل إية يعني ....^-^
ثـــــــــــــــــــــــم
أنا كتبت فضفضة مش معني كدة اني عطيت إهتمام للناس اللي شتمتني او أهانتني لاء بالعكس كلمتهم بالعقل , تعرفوا ان في موقع اتقفل بسببي لما قلت لهم اني هرفع عليهم قضية ...آه والله بسبب تعليقات الشتائم  اللي اتوجهت لي ...بس أرائي  في اللي مكتوب من مواضيع....
حتي موضوع الخواطر اللي علي موقع معروف جدا ومميز لما كتبت ارد علي التعليق السخيف ورديت عليه باسلوب راقي جدا ....التعليق والرد اتحذفوا ..!!!
تاني بعتذر لكل اللي نسيت اسمائهم ...
وهتوحشوني اوي اوي اوي
بجد عندي صداع وقلق ومش بعرف انام ...وكوابيس مع اني بذاكر كويس  والله الحمد لله بس هو انا كدة قلوقة شوية...شويتين ....لاء تلاتة...^-^
بحبكم كتييييييييييير ...^-^
ووردة مني ليكم كلكم......
زهرة بنفسج....لوني المفضل


رحاب صالح

هناك 30 تعليقًا:

  1. ربنا يوفقك ياحبيبتي هتوحشينا كتير
    ومش تلتفتي لكلام حد طالما انتي صح وياريت كل واحد ينشغل بعيوبه احسن من نقد الناس حتي لو كانو غلط مش هم اللي هيحاسبوه
    وفي الاخر ربنا يهدينا جميعا
    هتوحشيني ياقمراية مش تتأخري علينا

    ردحذف
  2. soooooooooooory
    يا رامي
    حصل عندي مشكلة ف المدونة ورجعت تاني حذفت البوست وعملته تاني
    ده تعليقك يا رامي يا اللي دايما رافع معنوياتي ومشجعني
    ربنا ما يحرمني منك
    عارفه ليه

    علشان كُل تفكيرنا مُتخلف

    كُل تفكرنا سيىء

    وكل شخص بيفكر باللى هو فيه

    ميقولش دة خاطرة جميلة أبداع بدون إسفاف

    علشان كدة عمرنا ما هنكون زى البنى ادمين

    و هنفضل متأخرين فكرياً و عقلياً


    تحياتى ليكى رحاب

    ربنا معاكى و يوفقك فى الأيام اللى جاية

    بالنجاح أن شاء الله

    ردحذف
  3. رحاب المشاعر اللي ربنا خلقنا بيها و مش كل الناس تقدر تعبر عنها أكيد مش حرام ميهمكيش الناس لأن الموج الثائر أجمل بكتير من المياه الراكده
    الشعر رائع يا عزيزتي و كله احساس
    ربنا معاكي و أكيد هنفتقدك كتير

    ردحذف
  4. بالنجاح الدائم أن شاء الله
    وترجعي بالسلامه
    ومنتظرين جديدك
    ام بنسبة للموضوع
    فما عليك من كلام الناس
    وتذكري الاختلاف فى الرئي لايفسد للود قضية
    وبلوجر مش ملك حد.
    اكتبي اللي انت عايزته.

    وندعوا لك بالنجاح والتفوق
    تحاتي

    ردحذف
  5. شهرزاد ............
    مجتمعنا فيه المثل اللى بيقول الفاضى يعمل قاضى
    كمان فيه ناس موش فاهمة حاجة وموش عارفة حاجة وموش حاتعرف تعمل حاجة أبدا فهى دى اللى ترميها ورا ضهرك لأنهم ولأنهن فشلن فبيحاولوا يفشلوا كل الناجحين كلماتك وشعرك رائع وليس فيه كلام عيب أما المقال فعنوانه ليس فيه شيئ ولاأستطيع أن أحكم عليه إلا إذا قرأته كله شكرا لكى

    ردحذف
  6. من حقك كل انسان البوح و التعبير و لا يحق لمخلوق ان ينصب نفسه اله او حتى واعظ للاخرين فربما يكونوا افضل منه

    التسلط سمة المجتمع المتخلف و هو نوع من تفريغ الاحساس بالنقص او الدونية التى يشعر بها عضه افراد فى المجتمع نتيجة قصور فى فكرهم و قدراتهم المعرفية

    ردحذف
  7. رحاب

    سيبك منهم ومن كلامهم


    ارميهم وراء ضهرك وكملى

    ربنا يوفقك يارب

    ومتغيبيش علينا كتير

    ردحذف
  8. السلام عليكم

    رحاب حبيبتى كلنا بنتعرض لنقد لان كلنا بنكتب صفحات مفتوحة ومادمنا قبلنا انا نكتب يبقى لازم نتحمل النقد ((((البناء))) اللى بيكون هدفه نصيحة طيبة وارشاد لأخطاء مش عايزنها تتكرر تانى مع اللى بنحبهم

    لكن فيه ناس بتجعل من نفسها قضاه انا عن نفسى اتعرضت لكتير من هذا النوع للاسف والغريب ايضا من خلال مواضيع دينية وبعدها صممت انشىء مدونة سلما للسماء اتكلم فيها عن حواطرى الشخصية بحرية وبأسلوبى وتعرفى انها عالجت نفسيتى كتير من بعض الضغوط العصبية بسبب الازمات فى الحياة

    لو حد نصحك يارحاب بأسلوب زى اسلوب اخواتى او بابا وماما اقبليه وردى عليه بهدوء وثقة لانه اكيد عايز مصلحتك
    لكن اللى يتعدى حدوده اعملى زى انا ماعملت تجاهليه وما تعطيه اهميه انك تعملى بوست له لان ده هيزيد من اههميته

    لكن انا كمان انصحك دايما حبيبتى لو فى اى تعليق تحسى انه فى مصلحتك حاولى تهتمى به لاننا كلنا اخوة وبنحب الخير لبعض

    ربنا يوفقك فى الامتحانات والحمد لله الذى عافانا منها ههههههه

    امنياتى لك بالتوفيق والنجاح ياغالية مع انك نستينى فى سلامك بس انا مش هنساك :)

    تحياتى لك

    ردحذف
  9. شدي حيلك ونجاحك شئ يهمنا واستخدمي دايما النقض لمصلحتك سواء كان جيد او غلط ياما يوجهك للصح ياما يزيدك اصرار على هدفك وتاكدي ان في بيقول ليكي كلام وهدفه بس انه يهدك ويتعبك
    المهم احنا مستنين لما تخلصي امتحانات وترجعي لينا بالسلامه

    ردحذف
  10. لا ارى سببا فى الهجوم عليكى ولكن لا تلتفتى لتلك الانتقاد لمجرد الانتقاد...

    ربنا يوفقك فى الامتحانات

    ردحذف
  11. رحاب
    شدي حيلك وربنا يوفقك في الامتحانات هنفتقدك كتير
    وبالنسبة لكلام الناس كبري دماغك منهم مادام انتي حاسة ان كلامهم تجريح مش نقد يحثك للاحسن
    خليكي مؤمنة باللي جواكي واوعي تتراجعي عن رايك وقرارك مادام مقتنعة بيه الا اذا اقتنعتي بعكسه
    وعلي راي الاستاذ جورج وسوف كلام الناس لا بيقدم ولا ياخر كلام الناس ملامة وغيرة مش اكتر
    بالنسبة لحزب اعداء النجاح في ناس كتير اوي بينتموا للحزب ده لو سمعتي كلامهم مش هتنجحي ابدا
    خواطرك ملكك انتي بس ومشاعرك ملكك انتي بس ومحدش له اي سلطة عليكي غير ضميرك
    يلا بقي طولت
    اسيبك تذاكري ومعطلكيش
    تحياتي وربنا يوفقك

    ردحذف
  12. رحــــــاب الطيبة
    ادعوا لكي ربنا يوفقك دايما
    في امتحاناتك ونشوفك باذن الله
    علي احسن ماتتمني ونتمني لكي
    تحيتي ليكي
    اختي الفاضلة

    ردحذف
  13. رحاب بالتوفيق يارب
    دايما كده

    ردحذف
  14. "واعود..
    اعود..لطاولتي..
    لا شيء معي..
    لاااا...شيء معي..
    الا....
    ...
    ....كلمات..!!"

    .........ماجدة الرومي...

    اللحن ده حسيته بيكمل كلامك اللي بيقولوا عليه (خارج) يا ري :)

    ردحذف
  15. اما بقى بالنسبة للناس اللي مش عاجبها كلامك..
    الموضوع بسيط جدا..
    وهو ان دي منطقتك.. واللي حابب يتابع ييجي..
    واللي متضايق..بلاش ييجي وبس .

    ردحذف
  16. انا مش شايفة ان فى حاجة عيب
    الشعر رائع وجميل
    اقولك سيبك منهم المهم انتى تبقى ناجحة
    وربنا معاكى يا قمر فى المذكرة
    تحياتى لاجمل رحاب

    ردحذف
  17. ازيك يارحاب ربنا معاكى يارب والامتحانات تعدى على الف خير ونسمع اخبار حلوه

    فكك من الناس انت قولتيها ربنا اللى هايحاسبنا كل حد من اللى بيتكلمو وعاملين فيها شيوخ عنده بلوى يروح يلمها

    عجبتنى اووووووووووووووووى القصيده يخربيت كده

    سيبك منهم
    وركزى الله امال لما تبقى نجمه مشهوره هاتعملى ايه ههههههههههههههه

    ربنا معاكى يارب وبالتوفيق

    ردحذف
  18. مش هقولك غير كوني انتي مش اكتر

    مع مراعات شرقيتنا

    واتكلي علي الله


    وان شاء الله موفقه في الامتحانات

    ردحذف
  19. انا زعلانه انا فين اسمى هعيط اهو اها اهأ

    انا هقولك كلمه بسيطه فيها الخلاصه

    "دعى القافله تسير والكلاب تعوى"

    وبجد مقالاتك تحفه

    وربنا يوفقك فى المذاكره

    اه على فكره شيلت حروف التدقيق اللى بضيق عشان تبقى تنورينى فى المدونه

    ردحذف
  20. see rehab

    i will never say to you like the privious visitor i will said the truth

    love and beautiful words , rhymes like it is not bad its very good and we need it but when and where ???

    for example between person and his wife

    between man and his family somthing like it

    come and see if you wrote your rhymes

    then you published it after that one girl or guy read it and imagine thinking him self romio
    may be he try to meet his girl and repeat again your talking.........big troubles no its catastrophe

    you will earn trespass and may be the guy and girl save it

    renewable source for trespass

    if you need the truth dont ask mimo and tity and soso

    go for the history of our prophet mohammed peace be up on him (pbuh) its my opinion

    never thinking that song ,play, dreams be considered civilization

    the west try to pull us for these idioms to clear the basics of our islamic traditions

    *_^

    ردحذف
  21. الله الله ايه الكلام ده ياست رحاب
    انا ما كنتش اعرف انك كده ابدا ابدا
    ههههههه

    على فكرة الناس دى موجوده فى كل حاجه فى حياتنا كتبتىى حب هاتلاقيهم كتبتى سياسة هاتلاقيهم كتبتى دين هاتلاقيهم
    كتبتى فى حاجه هاتلاقيهم معارصين الاى حاجه
    كان فى كتاب اسمه افكار ضد الرصاص بيناقش القضية دى قضية فكر المجتمع المتخلف
    واحنا من زمان اوى مجتمع متخلف
    وهانفضل متخلفين لحد ما الناس دى ما تكنش موجوده

    تسلمى يا رحاب وبالتوفيق اى امتحاناتك
    وانا زعلان عشان نسيتينى هيه يالا بقى
    :( :(

    ردحذف
  22. اختي
    اتمنى لك من كل قلبي النجاح ويارب اوقذفقك
    وكده خليك دايما قويه
    ياما حتشوففي من الدنيا
    ربنا معاك
    تحياتي

    ردحذف
  23. على فكرة

    الحب مش محتاج عرافة عجبني اووي

    وواقعي اوي

    و بجد في ناااس كدا ... بيمشوا ورا كلام العرافاااات بكل حاجة ... اصلي ست و عارفة الستات و عمايلهم

    :)

    انتي مقتنعة باللي تعمليه ؟

    انتي عاجبك كلامك ؟

    انتي مش خايفة من ربك يوم القيامة يحاسبك عليه ؟

    يبقى خلاص اكتبي اللي عايزاااه

    انا بعمل كدا لما اكون محتارة بحاجة ... بفكر كدا ... فكري كدا بكل حاجة تكتبيها ... و هتلاقي نفسك مرتاحة و محدش هيفرق معاكي

    وعارفة انو ممكن تعليق واحد مزعج يغير المزاج .. بس هنعمل ايه ... الناس اذواق و امزجة ... و كل واحد بيقرا حسب وقتو و مزاجو و فكرتو ساعتها

    متهتميش :)

    ومووفقة :)

    ردحذف
  24. صباح الفل يا فندم
    اولا ربنا معاكي في امتحاناتك و دي اهم حاجة
    اما عن النقد الرائع اللي جالك يبقي معظمنا زيك قليل الادب و مش متربي كمان
    و يبقي نقفل مدوناتنا و نقعد جنب الحيط
    بلا كتابة بلا وجع دماغ.
    بس ابدا احنا بنعبر عن مشاعر انسانية جميلة ربنا اللي خلقنا بيها و هانفضل نعبر .
    ربنا يفوقك دايما و يبعد عنك كل سوء

    ردحذف
  25. السلام عليكم
    باشا
    باشا
    باشا
    شوية هدوء الله يخليك
    ذاكرى وانسى اى حاجة انتى زعلانة ليه اقرأى دي (وقالت اليهود يد الله مغلولة )
    طب اقرأى دى (وإن يكاد الذين كفروا ليزلقونك بأبصارهم لما سمعوا الذكر ويقولن إنه لمجنون )
    حضرتك فهمتى قصدى
    سلام عليكم

    ردحذف
  26. السلام عليكم

    أختي رحاب..

    حقيقة رغم أن الأخ ALLELIO لم أقابله إلا في تعليق واحد في مدونتي وكنت مختلفا معه فيه، إلا أنني معه هنا في شق كبير جدا من كلامه.. خاصة فيما يتعلق بالموضوع الذي طرحتيه نموذجا.

    أما بشأن أساليب الآخرين في نقدك.. فأنا لست مع من يقول لك لا تلتفتي إلى كلام أحد، ولكني سأحاول الخروج من ضيق الموضوع إلى رحاب القواعد العامة التي يمكن تطبيقها على أي موضوع لك بعد ذلك:
    لا بد من الاهتمام بأي نقد طالما التزم بأمرين هامين:
    1- الأدب في الطرح.
    2- إبداء أسباب الاختلاف معك.

    مثال لنقد غير موضوعي:
    "كل ما تكتبينه سيء وأنا غير مقتنع به.. والأفضل ألا تكتبي مرة أخرى!!"
    أو كما عبر عنه صديقنا المشترك (خالد توفيق) بعبارة: "نقد من عينة إيه القرف ده".. فقط دون إبداء أسباب!!!
    مثل هذا النوع لا يستحق منك أكثر من وقت قراءته... ثم... delete

    مثال على نقد بناء:
    "أرى أنك جانبك الصواب للأسباب التالية:
    1-.......
    2-.......
    3-.......
    ويمكنك تجنب هذا عن طريق:
    1-.......
    2-......."

    معذرة أطلت عليك... لكن الموضوع مهم بالنسبة لصحفية مثلك، وسيتكرر كثيرا، فلا بد من أن تضعي لنفسك منهجا واضحا في التعامل مع قرائك.

    تحياتي أختي الكريمة مع تمنياتي الصادقة بدوام التقدم والتوفيق في حياتك المهنية.

    ردحذف
  27. ماجد , allelio احيانا الواحد بيشعر لنه المفروض يسكت لما الكبار يتكلموا وده موقفي منكم دلوقتي انتوا الكبار وانا المفروض اسكت
    استاذة رحاب : انا قريت البوست اول منزل ومرضتش اعلق لاني خفت اقول كلام يضايقك لان معظمنا بيحب يسمع الشىء اللي يريحه مش الحقيقة لكن صدقيني فكري كتير في كلام ماجد والليلو لان الحياة بنعيشها مرة واحده مفيش اعاده فمواقفنا تستحق التفكير وخصوصا من ناس مخلصة في النصيحة
    دمت بخير , موفقة قي الامتحان ان شاء الله

    ردحذف
  28. أصدقائي
    دعوني أرد الان رد عـــــام فقط الي ان اجد الوقت لأرد عليكم واحدا واحدا
    أولا.........
    أنا اقرأ كل كلمة في اي تعليق سواء بالمدح او بالذم
    ثانيا..........
    لا اغضب من النقد اطلاقا ما دام نقد بناء وليس نقد لمجرد النقد والسب والشتم
    ثالثا...........
    افرح جدا بردود الافعال مع الموضوع
    رابعا.......
    لا افرح ابدا بكلمة حلو وجميل وتسلم ايدك وانت لا يعلوا عليك وشاطرة ومش عارف اية من كلمات المديح ...فمن يعرف رحاب صالح جيدا يعرف انني اكره المجاملة ولا اجامل ابدا حتي ولو احب الناس الي قلبي ....
    اعرف ان مهنتي صعبة واني اخترت طريق صعب جدا وسأواجه فيه كافة المشكلات
    ولكني احاول ان انجو من الاخطاء علي قدر ما استطيع....
    خامسا .....
    للأسف انا كنت عارفة بعض ردود الافعال
    لكني رغم ذلك اثرت ان انشر كل شيء واقول كل شيء
    وعلي فكرة انا نشرت الموضوعين لغرض في نفسي
    ولكن لم يفهم هذا الغرض سوي شخصية وحيدة فقط احب ان احتفظ باسمها بيني وبين نفسي ....
    ساعود لأرد عليكم ....
    وصدقوني لا اخشي النقد ابدا لانه بمصلحتي اولا واخيرا ولكن النقد البناء
    وليس من نوعية اية القرف ده علي رأي الدكتور احمد خالد توفيق وماجد القاضي
    دمتم جميعا بخير
    ^-^ رحاب

    ردحذف
  29. رحوبة الجميلة
    كلامك والله عجبني وعيشني بدنيا جميلة جدا
    انا قرئت كل خواطرك وكلامك
    مش شايفة فيه شي شان الناس تقول الكلام ده
    دول متخلفين ماعندهم عقول
    واكيد حقدين عليك الي يشوف غيره ناجح ويقول كلام جميل مثل كلامك اكيد بيقول كلام وحش عليك عشان الغيرة دافعاه لده
    والله دوبني كلامك الحلو
    مافي شي عشان يحاسبوك فيه
    ربنا يوفقك يارب
    ومستنيى ترجعي عشان اقراءه المزيد من ابداعاتك
    تقبلي مروري
    بنشوفيني عندك كثير
    لحد ماتزقهي مني وتقول
    خلاص يابت سيبيني يارخمة
    هههههههههههه
    سلامي لاجمل رحوبة.

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين