الخميس، 3 فبراير 2011

لنفكر....بعمق....قليلا


الحقيقة مش عارفة اقول أية...؟
مش زي كل مرة اقولكم....صباح الورد.....للأسف مش هينفع....
طيب ممكن اقول ....صباح التحرير....
النت لسة واصل من ساعة تقريبا ....حاولت ارد علي الاصدقاء اللي من خارج مصر يطمئنون علينا هنا ...
وحاولت ان اري ما كتب علي الفيس بوك والمدونات....
وللأسف......وجدت ما يسرني قليلا بجوار ما احبطني....
من الوقت اللي قالوا فيه النت هيرجع مصر والتليفونات نازلة علي دماغي ...رحاب لازم تقولي للمتظاهرين يروحوا بيوتهم واجمعي اكبر عدد من اصحابك يوافقوا علي اللكلام ده كفاية قتل وكفاية تظاهر وكفاية بقي اللي حصل ....
عايزين شوية هدوء....شوية أمان...
اخويا قالي .....والا اقولكم ده كلام اخويا بالنص.......



دي جمعة تدمير وهدم مصر..إمتى هتفهموا؟ شغلوا دماغكم وحافظوا على البلد..سئ جدا أن يسمح الإنسان لأي شخص أن يستحمره..والأسوأ أن يكتشف هذا متأخر جدا.
إرحموا مصر وشغلوا دماغكم البلد بتولع وإنتوا عامليين تقولوا يرحل..وجمعة غضب.. ربنا بيقبل توبة الك...
افر إدوا فرصة للتوبة والتراجع إدوا لمبارك فرصة يتوب ويتراجع،خاصة إنه بدأ.. إحسبوها بمنطق المكاسب والخساير، هنستفيد إية دلوقت من رحيله..إما أن يسود الدمار والخراب والقتل-وده الأكيد- وإما نستند إلى الدستور الحالي ..نبقى إستفدنا إية؟!..إرحموا البلد وشغلوا عقولكم.... أولا مبارك إنتهى ومشروع التوريث إنتهى..
ثانيا وجود مبارك الأن ضرورة لأسباب،إذا رحل ستعم الفوضى أكتر،ولن يتغير الدستور وسنستند للدستور الحالي...من سيحكم مصر؟الجميع عينه على الكرسي ولن يقبل بغير الكرسي، شاهدوا تصريحات أمريكا وإيران وتركيا...أمريكا تدعم البرادعي،وإيران تدعم الإخوان،وإسرائيل تزرع لها واحد..ونبقى ساحة يلعبوا فيها وندبح بعض. ..البرادعي أنا كنت بأيده لكن دلوقت أنا ضده لأنه عاوز يشعلل البلد وينط على الكرسي بشكل بلطجي وبعد كدة ينط علينا..وربما الأمريكان يساندوه لأنه هو إللي فتح لهم باب العراق...الإخوان أثبتوا عبطهم المفروض كان قرؤا الأحداث بشكل أفضل وقالوا نعم للإستقرار..،مبارك هيغير مش عاوزين نولع البلد إحنا مايلزمناش من يحكم دلوقت بقدر ماإحنا عاوزيين دستور وقوانين تحترمنا وده إللي بدأ يحصل..ومبارك كدة كدة راحل،نفهم ونصبر وننتظر تغيير الدستور وإنتقال سلمي ومحترم للسلطة.. حافظوا على البلد وماتولعوهاش..

ده كلام اخويا................
طيب انتم إية رأيكم......
شوية عقل كدة يا اصحاب العقول المتفتحة.....يا اصحاب الفكر الحكيم....يا اصحاب العقول النيرة.....
بقالنا اكتر من تلاتين سنة.....في الظلم والاستبداد....بيقول اصلاح ...وهو فين الاصلاح
طيب لو كان عايز اصلاح صحيح اللي حصل امبارح ده مكنش حصل ...ولا الدم ده هيروح كدة هدر....؟
يا جماعة انا عندي يقين ان لو المتظاهرين روحوا بيوتهم فعلا ....مفيش حاجة هتتغير الا....للأسوء....
وابقوا شوفوا  لو حد فيكم فعلا حاله اتغير غير للأسوأ....
متفتكروش ان النت رجع النهاردة كدة عشانكم......
لاء.......
ده رجع   عشان الموالين نظام والجبناء منكم يقولوا كفاية تظاهر وكفاية دم وقتل....
بكره القتل وبكره الدم والتعصب والخيانة وكل الصفات الوحشة...
بس للأسف معدتش ينفع التراجع الان....لآن اي تراجع معناه اننا خلاص ....استحالة  اننا نتقدم خطوة  للأمام وننجح في اسقاط الفسده.... بجد حرام اللي حصل للناس ده حرام....
وحرام ان " عمر سليمان" دماغه تكون     بالشكل السيء ده ويعملها بحكاية لوي دراع ويشتطرط الشروط الغبية دي عشان يتكلم مع المحتجين.....وحرام برضه ان المتظاهرين السلميين يحصلهم ده....
طيب مفيش شوية عقل في الناس دي من الطرفين.........؟
يعني.... ان ممكن كان المتظاهرين يعملوا وفد منهم يتكلم مع "عمر سليمان" حقنا للدماء....
وبدون ان يغادروا موقعهم لاني كمان قلت علي يقين ان لو المتظاهرين غادروا التحرير لن يسقط النظام الفاسد ابدا....
لكن ممكن شوية تفكير وعقل ونشوف حل وسط.....
حراااام بجد انا اول يوم النت فصل والموبايلات لما معرفتش اتواصل ولا اطمئن علي اصحابي معرفتش انام وفضلت اعيط من المشاهد اللي بشوفها علي القنوات.....ولا الكلام اللي اتقال  .....ومش معقول بجد اصدق الكدب ده تاني
واقول فرصه تانية....
طيب فرصة تانية ازاي...؟ بعد اللي حصل في ميدان التحرير ...؟
اعتقد انه كان ممكن بكلمة واحدة من الريس كان الهجوم ده محصلش بس احنا اللي  شعب بينسي الاساءة بسرعة وعاطفي وبيتأثر بشوية كلام ....
الناس اللي في التحرير هما الجيل الفاشل .....جيل النايتي والكاتشب والنسكافية....اللي بيقولوا عليه مينفعش بأي حاجة......
الجيل ده هو اللي خوف النظام ...؟
الجيل اللي كانوا بيشتموا فيه عمال علي بطال بقوا بيحكوا ويتحاكوا بيه  وعلي شجاعته " يا سبحان مغير الاحوال" يا رب  ما يكون تعبكم من غير فايدة...
احنا مش عايزينها تولع .....
احنا عايزين حقنا .....وهو حرام نطالب بحقنا...؟
يا جماعة بجد كلي الناس ع الفيس بوك منقسمين .....ما بين يلا روحوا بيوتكم ويلا اثبتوا  في التحرير ويلا ارحل ارحل.....
مفيش حل وسط......حل وسط عشان  الناس اللي في التحرير دي...؟
حل وسط يحمي مصر ويحمي اولادها ويحمي الدم اللي روي ارضها.....
بتمني اجابة......
وبتمني فعل.....
مش بس كلام ان الناس دي هتتحاسب  وهما فعليا مش هيتحاسبوا....
والله حرام ....حرام ....انا بكيت كتير عشان الناس دي....
الناس اللي معرفهاش
واصحابي اللي اعرفهم.....اللي كانوا بالمظاهرات دي....
برغم اني لا احبذ فكرة الانتقام الا انني لا احب ان يذهب دماء هذه الناس بدون اي ثمن
عارفة اني كلامي مش منظم ولا مرتب....بس بجد مش عارفة اقول اية...؟
منهم لله ....وحسبي الله ونعم الوكيل ....
اللي بيتاجروا بإسم مصر....
تعالوا نفتح باب الحوار المرتب والمنظم والمقنع لنصل معا بمصر لبر الامان ....
انتظركم .....ويا ريت تطمنوني عليكم لاني للأسف الشديد اغلب المدونين معرفهومش معرفة شخصية ولا معي ارقام موبايلاتهم وندمت ندم شديد  علي اني معملتش حساب اليوم ده اللي النت يفصل فيه ومعرفش اطمن عليكم....
يا رب احمي مصر وشعبها ووصلنا ومصرنا الحبيبة لبر الامان والاستقرار بعيدا عن بؤرة الفساد والموالسين....
رحاب صالح

هناك 16 تعليقًا:

  1. يارب احمي مصر واهلها وابعد الظالم عنها واخرجه من عندنا لا نريد موته ولا تعذيبه زي ما عمل في اهلنا مش عايزين كلاب تاكله زي ما سلط كلابه علينا عايزينه يمشي عشان يرجع الهدوء والاستقرار لان تواجده اكتر من كده مش هيبقى في نهايه للمشاكل ده
    تخيلي الظابط هيمشي ازاي تاني في الشارع وهو في نظر كل الناس قتل اخواتهم لازم يمشي ويتغير النظام عشان يعود الاستقرار

    ردحذف
  2. http://www.islam-nogodbutallah.blogspot.com/
    اول الطريق لحماية اي انسان هو منع المعتدي من الاعتداء واحنا معناش اي ضمانات من انه مش حينتقم مننا كشعب بعد ما تهدى الامور خصوصا ان احنا جربنا كدبه كتير بغض النظر اصلا عن اللي حصل في التحرير , وقبل ما يرحل مش حينفع اي كلام هوه عايز ينتصر علينا علشان بيفكر بعقلية العسكري اللي حيفقد شرفه في حالة الانسحاب طيب واحنا اللي اتقتلوا مننا دولة فراخ ولا كلاب شوارع علشان ينداسوا تحت العربيات ويتسحلوا في الشوارع هوه علشان رئيس جمهورية محدش يحاسبه علشان خاطر اصحابه الجنرالات عايزين يبقى شكله حلو هما ومثقفين المطبخ اليوم القاتل عمره مكان ولا حيكون شكله حلو الا في عين اللي مبيشفش فما بالنا باللي باع البلد للاسرائيليين ,كفاية عواطف بقى مخدناش حقوقنا الا لما وقفنا وقبل منبقى في موضع قوة مضمون رحنا نختلف في هدفنا الاساسي

    ردحذف
  3. السلام عليكم
    عارفه كلنا تقريبا تايهين مبقيناش عارفين مين صح ومين غلط
    بس كلنا عارفين اننا نحافظ على مصر
    على دمنا
    على ارضنا
    على اهلنا
    مش مهم ازاى المهم مش عاوزين نقطة دم ولا حالة اغتصاب ولا موت من الجوع ولا ترويع لضعفاء ولا نوم وسهر فى الشوارع
    لك خالص تحياتى

    ردحذف
  4. والله انا تعبت يا
    رحاب والله
    مخنوق
    وتعبان جدا
    جددا

    ياااااااااااارب
    سترك
    يارب

    ردحذف
  5. أنا يارحاب زي ماقولت لمحمود

    أنا عايزه نحكم عقلنا ونفسي ألاقي حل يرضينا كلنا ومن غير دمااء

    بس في نفس الوقت أنا والله مش ضد إللي هينزلوا وأنا متعاطفه معاهم ومتفهماهم وزي زيهم نفسي كل شي يتغير

    بس بجد الشباب دول عملوا تغيير أحييهم عليه من كل قلبي

    وبجد ضروري مبارك يستوعب ويتخذ خطوات سريعه بدل الخطوات البطيئه إللي ماشي بيها دي

    مصر بتنهار وهو مش قادر يستوعب ده

    ربنا يكتبلنا الخير اللهم أمين بأي حال من الأحوال

    ردحذف
  6. مبارك سكت كتير اوي
    المظاهرات من يوم 25 يناير اول خطاب له كان 28 يناير بعد ما مات العديد على يد الامن
    ويا ريته قال حاجة في الخطاب ده ليها معنى
    وبعدين فضلت الناس تموت وهو ساكت في الاخر طلع علينا بخطاب تاني مفيهوش اي ضمانات لاي كلام قاله وفي نفس الوقت طلع بلطجيته
    مبارك مستحيل يكون رئيس جمهورية احلى لقب له رئيس عصابة
    مستني الشعب كله يجثو على ركبتيه ويقولوا احنا اسفين يا صلاح
    معاكي ان التهدئة مطلوبة وتحكيم العقل مطلوب بس في ضمان ان الناس اللي هناك مش هيتقبض عليها اول ما يخرجوا من الميدان؟

    ردحذف
  7. يا مصر أنت في قلب كل عربي

    أيها الإخوة المصريون الشرفاء تضرعوا إلى الرب وأسألوه النصر الذي وعد به الصابرين، نتمنى من الله أن يتقبل دعائنا لكم بالنصر.
    صبرا صبرا يا معشر الشرفاء فالنصر قادم.يا شعب مصر العظيم..إتحدوا جميعا للحفاظ على هبة النيل
    الذي صار عندكم هو نفسه صار عندنا في تونس
    رؤوف

    ردحذف
  8. اصبح عندى قناعة راسخه ان مصر مخطوفة...القضية ماعدتش ثورة و لا ديكتاتور زى ما كنت فاهمه

    التعامل مع النظام ده مؤخرا خلانى شفت زاوية جديدة

    اقرى
    http://www.tayyar.org/Tayyar/News/PoliticalNews/ar-LB/egypte-pb-679657980.htm

    و بعدها اقرأ ده ستجد نفسك امام مافيا
    http://www.masrawy.com/News/Egypt/Politics/2011/february/3/police_friday.aspx

    وجود مبارك فى النظام من اساسه خطر

    ردحذف
  9. انا اتلخبطت واتخنقت ومابقتش عارفة حاجة
    المشكلة مش فى مبارك والله ماهو هيمشى المشكلة فى البلد اللى هنفضل سنين نصلح فيها

    ردحذف
  10. دي بلادنا و لازم نخاف عليها و نقف جنبها في أزمتها

    كفاية كده

    مطالب كتير اتحققت و لسه

    نهدي بقي و نخاف عالبلد

    ربنا يحمي مصر من كل شر

    تحياتي

    ردحذف
  11. للاسف اللى بيحصل دة اسمة تخريب وليست ثورة

    الثوار الحقيقيون غادروا بعد خطاب السيد الرئيس اما من يتواجدون الان هم الصيع والمتخلفين بتوع الفيس بوك اللى ملهمش شغلانة وفجاة وجدوا مهمة وطنية ممكن تعملهم قيمة وبدون تفكير انضموا اليها ليسببوا فوضى عارمة

    مين يقول ان خسائر 76 مليون دولار يوميا لاقتصاد مصر اصلاح

    مين يقول ان الممتلكات العامة تضيع اصلاح

    مين يقول ان الشرطة وغيابها اصلاح

    مين يقول ان الشباب على حسب ماحكى لى من اصحابى فى مصر انهم بيتجمعوا ليحموا اهلهم فى البلدة او القرية او المدينة اصلاح

    مين يقول ان حسنى مبارك مفسد وانزل ياعميل الامريكان اصلاح

    للاسف الموضوع تمادى واخد اكثر من وقتة وحسنى مبارك راجل محترم جدااا

    لا هو عميل امريكان ولا هو عميل لاى حد الراجل وطنى مخلص صاحبة سوء توفيق مع شوية حاشية ظالمة افسدوا السلطة والاقتصاد

    ولو فكرنا بمنتهى العفوية امريكا وفرنسا وايطاليا واسبانيا وبريطانيا يوكدون ضرورة اجراء انتقال سلمى للسلطة .... دة معناه اية ؟؟

    تيجى تسال الشباب فى ميدان التحرير عاوزين اية يقولوا مبارك يمشى !!!!!

    طيب يابنى عمر سليمان يمسك يقولك لا الحكومة تمشى !!!!

    طيب يابنى مين يمسك يقولك معرفش بس اهم حاجة يمشوا

    مخ اتبرمج على اوبشن واحد فقط

    يعرفوا الاساتذة بتوع الفيس ان غياب الحاكم فقط يودى الى فراغ دستورى فمابالكم بالحكومة كلها

    فى اعتقادى مجرد ان مبارك ينزل من السلطة معناه ان مصر ستكون اشبة بالعراق وهناك اخوان مسلمون وكفاية وايمن نور والبرادعى وجهات اخرى خارجية منتظرة الفرصة عشان تقتل الاخرين وتطلع السلطة

    ومحدش يقولى على السنايبرز اللى كانوا بيصطادوا الناس لان دول مستاجرين من جهات اخرى لعمل بلبلة

    ومحدش من العصافير بتوع الفيس يقولى ان مبارك بعت ناس تضرب فى المتظاهرين لان مبارك اساسا كدا كدا مش هيكمل الانتخابات الجاية الراجل سنة كبر وتفكيرة اساسا انة مش داخل انتخابات كمان مش هيطلع عيل ادام شعب يوعدهم باليل والصبح يطلع بلطجية عليهم

    والاولى لو كان مبارك هو اللى عملها انة يبعت ناس مستخبية شوية مش راكبة خيل وجمال


    باختصار مبارك راجل محترم لانة كان يقدر يسحق الثورة دى فى مهدها بادوات الجيش ولكنة لم يفعلها

    مبارك راجل وطنى ولو مش عارفين افتكروا لما خرج لغزة وقال لاسرائيل انتى تخطيتى الحدود الحمراء وبديكى فرصة 24 ساعة وكانت فيهم اسرائيل منسحبة

    مش هفكركم كمان بان مبارك حجرة عثر ضد الامريكان لما كانوا عاوزين يبنوا قاعدة امريكية فى السويس


    مش هفكركم ان مبارك هو سبب وجود جيش قوى لمصر ووجود جهاز مخابرات احسن من الموساد والاستخبارات الامريكية وجود جهاز امن دولة قوى للغاية

    مش هفكركم ان فى اتيكس فى التعامل مع الزعماء او الذوقيات وهى ان مش الشنكوتى والصايع اللى مسقط بنطلونة والصايع التانى اللى عاوز يمشى بحشيش فى الشارع والعسكرى ميمسكوش مش شوية الصيع دول اللى يهزوا قائد مصر وينزلوة من سلطاتة


    وبكل صراحة وفى رايى المتواضع

    الى الان انا راضى عن ماحققتة الثورة اللى كانت بتضم محترمين ورايى ان يبقى مبارك فى السلطة الى موعد الانتخابات ويتم تسليم السلطة بشكل الى والافضل لها بعد مبارك هو عمر سليمان

    ردحذف
  12. داخلين على كارثة يا رحاب ومحدش حاسس

    رافضين يسمعوا

    وحاطين شىء واحد بس قدامهم

    يمشى حالا وبس

    مش مهم الفوضى

    مش مهم الكارثة اللى احنا فيها

    مش مهم اللى حوالينا ومستنين الفرصة لتدمير البلد

    مش مهم اى شىء المهم يعملوا اللى شايفينه

    صوت العقل خلاص راح


    رحمتك بينا يارب

    ردحذف
  13. الواحد فعلا اعصابه اتحرقت بما يكفي
    ربنا يعديها علي خير يارب

    ردحذف
  14. هو ده اللي عملوا بالفوضي والاعلام الاهبل

    قسم الناس علي بعض

    خوفهم اوي المنظر في اول جمعة منظر الشعب كله وهو طالع خوفهم

    والاتحاد قوة

    يبقا لازم نقسهم ونفتتهم
    ومايبقوش علي راي واحد
    انا زعلانه علي اوي من الشعب المصري
    بس انا حاسه انه خير يارحاب ابشرب ربك موجود

    ردحذف
  15. ان شاء الله مصر هتبقي احلي هي اكيد فيها حبه فوضي بس هما اللي عملوها من امتي عندنا بلطجيه وامساجين تهرب بالعدد الماهول ده والكنائس تولع منه لله العادلي لك يوم يا عادلي يا ظالم ده انتوا غلبتوا الكفار ان شاء الله ربنا بنصرنا امانه كلنا نصلي لمصر تكون كنانه الله

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين