الصداقة كنز....
ومش ممكن تلاقي صديق حقيقي بسهولة
وكداب اللي يقول زمان حاجة ودلوقت حاجة ...
لان كل شيء موجود طول الوقت ...
بنلاقي الصداقة الحقيقية وبنتقابل في اللي بنعتقده صديق ويتضح انه شخص وصولي ...
بنتصدم في صداقات لكن برضه بنلاقي صداقة حقيقية
عبيط اللي يقول الصداقة باالايام والشهور والسنين
لان صديقك بتعرفه من مواقفه معاك ومن افكاره ومبادئه
حتي صديقك ممكن تكون شخصيته غير شخصيتك لكن في اشياء مشتركة بينكم بتخلق جو الصداقة ده....
معارفي كتييير جدا ...
زملائي كتيير برضه
اللي بحبهم وبيحبوني كتييييييييييييير جدا ..
لكن تبقي هناك في غرفات القلب المغلقة " غرفه حميمة" بها من نعشقهم ....أصدقائنا الحقيقيون "
رانيا ....
معرفتي بها من ايام الكلية برغم انها اصلا مكانتش في كلية اعلام ولا حاجة دي كانت في ترجمة انجليزي ...
بس رانيا كانت بتحضر المحاضرات مع اختها اللي هي صاحبتي " غادة " عشان يروحوا سوا...ومن هنا عرفت رانيا ...
رانيا مش هقدر احكي عنها ....لانها بجد مثال للصديقة الصدوقة ...
مبتتكسفش انها تعترف بغلطها....ومش ضعيفة ...بالعكس قوية علي عكس ما بتظهر
فيها شيء يجذب اي حد يتكلم معاها ...ولما تتكلم رانيا مش بيخلص الكلام
رانيا شطورة ...تقديرتها حلوة وهي عاملة زي حالاتي متقدرش تذاكر حاجة غير لو فهماها كويس ...ولما كان عندهم دراسة لقصة يوسف ادريس " الهجانة " نقشناها انا وهي كتير عشان تقدر في الامتحان تستوعب وتجاوب ....وكانت مناقشة جديرة بجد يا رانيا عرفتني بيكي اكتر واكتر ....
رانيا عاملة زي الدكتور النفسي ....
كتير جدا لما كنا نحكيلها عن مشكلاتنا واللي مضايقنا وكتير كانت بتنصح النصيحة اللي تخليك تحس انك مرتاح وتقرر القرار الصح
احنا خلصنا كلية ....
كتير مننا فكر في مليون حاجة وحاجة يعملها ويستثمر فيها رصيد دراسته طوال اربع سنوات من العذاب ....بس الفشل كان نصيب اغلبنا لان اللي بندرسه حاجة والواقع حاجة تانية وهو ده التعليم في مصر للأسف
رانيا مصرية يمنية" اب يمني وام مصرية " ...بس بتحسها مصرية جدعة اوووي عمري ما حسيت معاها انها مش مصرية ...
حلم كانت بتتمناه وهو الدراسة في مصر ....وحققت الحلم ده ....
بعد الدراسة في الجامعة كانت عايزة شغل تثبت فيه قدراتها وتحقق ذاتها فيه بس الاحوال في مصر اتلخبتط طبعا ...
بس رانيا ميأستش ابدا ....
دورت كتير علي منح دراسية بره مصر ...و اخيرا رانيا حصلت علي منحة دراسية لمدة شهرين فقط في لندن ...في جامعة " مش عارفة اية كدة طبعا نسيت ...بس هي جامعة معروفة "
رانيا كانت بتتمني الدراسة تكون اكتر من شهرين بس كانت الشروط قاسية جدا من نواحي مختلفة
والمنحة دي برضه كانت ليها صعوبتها واللي هي مازلت بتحاول تكمل فيها عشان تسافر للمنحة في شهر تسعة ....
رانيا ...هتدرس اللغة الانجليزية .....في لندن ...هتعيش مع اسرة اجنبية ...هتتعلم اللغة وتمارسها ....وترجع بشهادة تساعدها لدراسة شيء تاني او تحقق لها مشروع شغل كويس
الصراحة احنا اتفاجئنا بالموضوع ...بس علي أد المفاجأة كانت الفرحة.......
مش مصدقين ان في صديقة لينا ثبورة لهذه الدرجة ....
فرحنالها كتييييييييييييييير
وبيني وبينكم انا قلت ده كله من عند ربنا لجهود رانيا في الاعمال الخيرية اللي كنت بحسدها عليها لانها عايشة في منطقة تقدر فيها تساعد بجهود كتير لأعمال الخير ....
وده طبعا غير جهود رانيا والصبر اللي تحملته عشان موضوع المنحة ....
رانيا ...رانيتي ...مبرووووووووووووك يا احلي صديقة وربنا يوفقك
مع اني الصراحة خايفة عليكي ...بس مطمنة ان وليد اخوكي هيكون جنبك
بصي بقي مفيش هناك البرجر والبطاطس والبيبسي اللي كنا متعودين عليهم في الكلية
فاكرة سندوتشات البطاطس السورية والبيبسي ......هههه والا الجبنة الرومي والنسكافية ...
طيب اياكي تنسي سلم ابراهيم اللي غلبناه معانا....واغاني رضا صاحبتنا....
بقولك اهو البرجر هناك لحم خنزير اياكي تدوقيه والا حتي تفكري فيه هههههه
علي فكرة في كتاب للكاتب الكبير المرحوم عبد الوهاب مطاوع اسمة يوميات طالب بعثة كان فيه حاجات كتير هتفيدك بس انا ممكن اقولك اهم حاجة لتخفيض المصروفات ...اياك تطلبي سلطة خضرة اياااااااااااااااااااااااااك ...لانها بتعتبر وجبة كاملة وانت كدة هتموتي رسمي اطلبي حاجة تانية او متطلبيش سلطة خالص ....هههه حاولي تعرفي الاسعار عشان متتخضيش وتتصدمي هناك....وبلاش برجر...اقولك اللحمة غالية ....بس مش عارفة هي برضه اللحمة في لندن بستين جنية برضه ...؟ يمكن يكون ستين دولار....؟!!!
علي فكرة وقت الدراسة اربع ساعات يعني ممكن انت بقي يا شطورة تستغلي الوقت الباقي ده ف انك تشتغلي زي ما بنشوف في الافلام وتشتغلي في مطعم والا فندق زي ما بنشوف .......واو هتبقي حلوة اوووي ...ابقي ابعتيلي صورة وانت كدة ,,,,ههههه
فرحانة عشانك ولو اني قلقانة ...بس في نفس الوقت عارفة انك قد التجربة وقد اي تحدي ...وكفاية اني واحدة فينا تحقق حلمها وتخوض تجربة هتستفيد منها واحنا علينا الدعاء ليها بكل ما في قلوبنا من حب ليها ....
هو ده معني الصداقة ....
تعرفي انا كنت لسة مطلعة الهدية بتاعتك....واهدائك....
بفكر يا تري هتجيبلي اية من لندن....؟؟؟؟؟
ههههه...طبعا عايزة كلام كتيير وحكايات كتير وبالتفاصيل المملة كمان كل تفصيلة ...
ويا سلام بقي لو عملتيها كتاب يا رانيا ....
ما انت برده مش قليلة ....هو يعني هالة سرحان احسن منك والا يعني الناس اللي كتبت عن تجربتها مع البعثة والمنحة والسفر بره مصر والاختلاط بالغربيين افضل منك...
بالعكس انا شايفة انك تقدري تكتبي وتحققي مبيعات جامدة...تعرفي لية
لأنك بنت مصرية عادية لا انت اعلامية مشهورة ولا كاتبة ولا صحافية ...ولا عندك اي مؤهلات غير انك عايزة تبقي انت....رانيا الطموحة الثبورة الصبورة....اللي مش بتقف عند حدود الحلم لا بتتخطاها عشان توصل مهما كانت الصعوبات
ومحدش يفتكر ان المنحة دي بالساهل والا مدفعتش فيها فلوس ....لالالالالا
ده بجد حاجة صعبة اوووي
بس رانيا قدرت تتخطي حاجات كتير وقادرة انها تتخطي الاصعب اللي جاي .....
الرسالة دي مش مني انا بس دي مننا كلنا يا رانيا ....اصحابك...اللي بيحبوكي...واللي يهمهم اووي اي حاجة تخصك
واللي اكيد لازم يشوفوكي قبل ما تسافري ...مش عشان يودعوكي لان مفيش وداع بينا ....لا عشان نشجعك ونقولك احنا بنحبك اووي وهنستناكي ترجعي بشهادة نفتخر بيها معاكي
وبرضه هنستناكي في المطار وانت راجعة ....بالسلامة ان شاء الله...
بنحبك اووي...
اصحابك
ملحوظة
كنت عايزة اضيف صورة لينا مع بعض في الكلية بس مقدرتش عشان لازم استأذن الاول كل اللي في الصورة
ربنا يرجعها بالسلامه
ردحذفحاجات كتير بتحتاج مجهود مننا وعشان نوصل لازم نتعب ونواصل وممكن نخسر مره بس حتى الخساره فيها مكسب المعرفه
ربنا يديم الود بينكم
صباح الغاردينيا
ردحذفصباح الإحساس العالي والمشاعر الحلوة أجمل حاجة في الدنيا أنك تلاقي صديقة صدوقة وتحبك بصدق عجبتني شخصية رانيا من وصفك ليها وأنتي كمان بنوتة عسل وتتحبي ربنا يجمعكم على خير وترجع رانيا بشهادة تفرحكم بيها ماتنسيش وصلي سلامي لرينو :) "
؛؛
؛
لروحك عبق الغاردينيا
كانت هنا
reemaas
هههههههه , تسلميلي يا رحااب والله
ردحذفأنا والمستحيل , ومازال المستحيل يفرض نفسه أمامي وأمام الجميع كل يوم
ربنا يخلينا جميعا من قاهريّ المستحيل :)
وبالنسبة للسلطة الخضرا ,, عااادي جدا أنا ممكن زي ما قولت لك ممكن أعيش من غير أكل هههه , لأنه بالتأكيد ح تجيلي حالة من الإزبهلال الشديد إن أنا في لندن , والحالة دي من أعراضها هي التوقف عن الأكل والشرب والحركة كمان هههههه
امم , سمسم و ريماس , ياأهلا بيكم وتسلموا الكلام الجميل . ريماس , سلامك وصل أهو مباااشره :d
رحاب ، والله انبسطت بكلامك جدااا ,, ربنا يديم الود بينا جميعا ,, وما يفرقنا أبدا ,, و نفضل أصحاب كلنا لآخر العمر ,, وياارب كده أشوف كل واحد فيكم ماشي في الطريق إللي نفسه فيه , وتحققه كل إللي بتتمنوه , وتكونوا في أعلى المراتب دنيا وآخرة
بحبكم يا أحلى وأجمل أصحاب
رانيا :)
من كلامك حسيت بخووووووووف جامد عليها ... ميتة من الخوف عليها و خايفة من الفراق اووووي ... بس عايزاها ترفع راسكو و مبسوووطة بيها اوووووي ... مشاعر جميلة اوووووي حسيتها مع صحباتي لما كانو بيحققو اللي نفسهم فيه و نتشارك الفرحو كلنا ...
ردحذفياااه يا رحاب ... تدوينتك دي خلتني استرجع مشاعر جميلة اووووي وأفكر بيها ... شكراً على التدوينة دي بجد ...
ويااااااااااااا رب تروح و تجي بالسلامة ياااااااا رب
كلمات ذات معانى رائعة :)
ردحذفتحياتى لقلمك واحساسك حبيبتى
ههههههههه ايه اللدغة دي؟ ثبورة؟ صبورة يا حلوة وسمبورة...بس انت عارفة ان معظم المصريين اصلهم يمني وجيش عمر ابن العاص كله كان م اليمن....عشان كدة تلاقي القاهريين بيقولو جيم مش معطشة زي قبائل كتير م اليمن....ممكن اطلب منك طلب؟ تطلعي الموسيقى فوق عشان اول ما اخش عندك ببقى في سباق مع الزمن قبل ما تشتغل لاني باشوف التليفزيون اونلاين وبحب اقري عندك في نفس الوقت وكل مرة افضل ادور ع الموسيقى عشان اوقفها
ردحذف