2014 Go to Hell

 اذهبي بكل ما حمليته لي من معاناة

من ألم من كل من عرفت ...

وكل مكان ذهب إلية  ولم أجد به الا الحزن والالم

اذهبي  بكل ما حملتيه لي من مرضي نفسيين يرمون بأمراضهم الغبية  علي طيبتي  وحسن استماعي إليهم

اذهبي بكل من أحببت وهجرني ...بكل من احببت وظلمني ...بكل من أحببت  ورحل  وما عاد يتذكر...

اذهبي ...بكل من قال كلمه حب لا يشعر بها لكنه يقولها لغرض خفي  في نفسه

اذهبي بكل  قسوة الاصدقاء وخيانتهم ...

اذهبي بكل قسوة الحبيب ... وتجاهله ...وبعده

اذهبي بكل ما عانيته فيك  في العمل ومشكلاته التي لا تنتهي ولم تنهي بعد...اذهبي

اتمني لو استطيع محو كل ما حدث فيك ...

خيانة صديقتي .... وقسوتها الغير مبررة  لشيء تافه لا يستحق

خيانة صديقة وتوريطها لي في مشكلة   ارهقتني  نفسيا وجسديا...

معاناة العمل ...والارهاق البدني والنفسي والضغوط   التي لا تنتهي

ابتعادي عن كل الاشخاص الذين احبهم ..لكي لا اضايق احد بمشكلاتي ...

صمتي اكثر من كلامي ...حتي لا .....

*** قلت لي ...انت قوية ..انا اثق بك... ستصلين لما تريدين...اذهبي ولا تنظري خلفك

لكني نظرت.... كنت اتمني أن أراك ما زلت تنتظر ....تنتظرني

اسوأ الاعوام بالنسبة لي .... فشل فشل فشل  ويستمر الفشل ...في هذا العام كأنه عام الفشل بالنسبة لي

فشل في كل شيء

لم احقق شيء سوي الفشل

ليتني استطيع محو هذا العام من عمري ..... اتمني هذا ...اتمني

أختي ....

اختي بستغلها في شغلي دايما عشان مبعرفش ارسم

وهي بتساعدني دايما  في رسم الكاريكاتير في المجلات  

وكمان بتختار الفكرة 

كنت بعمل مجلة حائط عن الالوان وتأثيراتها المزاجية والصحية علينا 

وهي اللي فكرت في الكاريكاتير ده 

^___^

أنا بحبك يا شيري 

شوف

فات ست سنين ...!

فجأة كدة وانا نايمة افتكرت ان عيد ميلاد مدونتي عدي وانا مش فاكرة
اخص عليا
فاكرة اول يوم عملت فيه المدونة كان يوم 1/6/2008  ومكتبتش غير كلمة واحدة بس ...اهلا ..وسهلا
بعدها بسنة وحوالي شهر بدأت التدوين وتحديدا يوم 27/7/2009 بمساعدة غادة محسن صديقتي الصدوقة
بس ازاي عدت السنة دي ...
السنة دي كان فيها 11 تدوينة فقط لاني انشغلت بمدونتي التانية " حوليات  رحاب صالح "
انشغلت لدرجة اني نسيت حياتي لكن مش حرة فيها
وانا بكتب في الحوليات كتبت حاجات كنت عايزة افتكرها من حياتي  وحاجات كنت بحاول اني انساها
بس اللي اعرفه كويس ان حياتي اتغيرت اووي
وان 2014 كان في سنين اسوأ منها في حياتي
 بس 2014 كانت الأسوأ فعلا  بحياتي كلها ومتخيلتش نفسي اتمني سنة تعدي اد ما 2014 تعدي
أصبحت عصبية أكثر مما توقعت عليه نفسي ذات يوم  ولا أدري لما كل هذه العصبية والنرفزة 
أصبحت ضحكاتي قليلة جدا والشخص الوحيد الذي يجعلني أضحك من قلبي هو من يبكيني 
أجهد نفسي بالعمل بدون سبب مقنع ..... 
لم أعد اجتماعية أبدااا ..... أود العيش وحدي ...اتمني ان أذهب لجزيرة روبنسون كروزو فاعيش وحدي مع الطبيعة فقط 
الاصدقاء كثيرون وقليلون وغير موجودون ....لا أدري لما  ابتعدت عن كل هؤلاء الناس 
فوجئت بصديقتي  دعاء عمروا تكتب عن مدونتي وانا تقريبا لم اتصل بها من يوم زفافها ...!!!
أتحجج بضياع هاتفي المحمول وضياع أرقام الاصدقاء ...لكني اعرفني جيدا فأنا أن أردت شييء أستطيع الحصول عليه  فلماذا أبتعد عن كل شيء بالحياة ....!!!
لا أدري لكني فعلا تغيرت كثيرا ....
أتمني أن أعود رحاب كما كنت ...وأتمني أن تكون 2014 راحلة  بلا ألم ...وأن تأتي 2015 بكل الأمل 
لا أريد أن أتذكر شيء ...لكني أريد أن أحلم بشيء  جميل 
دعاتكم بحلم جميل وعام سعيد لكم ولي ...
-

يوسف رجع لفاتيما ....:*

يوسف رجع لفاتيما 

الجملة دي كانت مكسرة الفيس بوك امبارح 

تقريبا  كل المدونين الي اعرفهم والي معرفهومش كانوا كاتبين نفس الجملة " يوسف رجع لفاتيما "

مين فاتيما ويوسف دول يا رخحوب الي انت كاتبه عنهم ....؟ سؤال اتسألي امبارح مليون مرة  انا وغيري من المدونين  من اصحابنا الي ميعرفوش يوسف وفاتيما 

عملنا هاشتاج  باسم فاتيما امبارح وقولنا فيه كل الي نفسنا فيه لفاتيما ويوسف

فاتيما الام اللي اخدوا منها ابنها بالقوة والظلم .... سنين فراق وبكاء واشتياق 

فاتيما روح قلب ماما ...كتبت  وكتبنا معاها ...وبكت وبكينا نعاها

ولما فرحت برضه فرحنا معاها 

متتصوروش فرحتنا اد إية برجوع يوسف لفاتيما 

كأنه انتصار لينا كأننا كلنا فاتيما ويوسف ابننا ورجع لينا 

 لا أنكر اني تأثرت جدا بقصة يوسف وفاتيما  وانحزت بشكل جزري لفاتيما  قلبي انحاز ليها حتي بدون ان اعرف اساس المشكلة ولما عرفت عرفت ان قلبي واحساسي مخنونيش لأنهم كانوا صح 

فاكرة اني لما عرفت الحكاية  حلمت ان يوسف رجع وعملناله لقاء تدويني  وكان ما شاء الله  شاب جميل 

ودلوقت اتحقق الحلم  فعلا يوسف رجع واصبح شاب  جميل  يستحق حبه فاتيما وحبنا 

ويا رب يخليهولها  ويخليه لينا 

هنا دعوة لكل المدونين ولكل الناس الي حبت فاتيما ويوسف واللي ميعرفومش بردو الدعوة ليهم يجوا يتعرفوا عليهم 

هنا اللقاء ....  يوم السبت الجاي 25 اكتوبر ...مستنينكم

https://www.facebook.com/events/576525239115882/?ref_notif_type=plan_user_joined&source=1

عن الموت ....

كنت من زمن أفكر في الموت برعب 

فكيف سأموت وأترك كل من أحب وكل ما أحب 

كنت أفكر بعقل طفلة ...أنني لن أفرأ كتاب أو قصة بعد الآن اني لن اشاهد فيلم يضحكني أو اغنية أعشقها 

كنت أفكر بقلب أنثي أنني  لن أري من أحب ...وأنه مع مرور الوقت سينساني  ويعشق غيري 

الآن أفكر بشكل مختلف  بعدما التقيت الموت مرة تلو الاخري مع من أحب 

أجلس طوال الليل أدعو  وأقرأ قرآن وأفكر  بمن رحل

ثم أفكر ... هل عندما أرحل انا الآخري سأجد من يفعل مثلي ..يدعو لي  ويقرأ لي ما تيسر من قرآن  ويفكر بي..؟

تري هل سيفكر في ويقول انني كنت طيبة وصالحة  وانني كنت محبوبة

أم سيقول انني كنت عصبية وعابسة ولا أطيق أحد 

تري هل سيفكر من كنت  اساعدهم في العمل بي وسيدعون لي 

أم سينسونني مع مرور الوقت

هل سيفكر في أصدقائي وينعونني ويكتبون عني بمدوناتهم أم أنهم اصلا لن يعرفوا خبر موتي 

هلي سيتصل بي اصدقائي  ويرد عليهم اخي او اختي ويقولون لهم انني رحلت 

هل سيصدمون .....هل سيحزنون علي ...هل سيجيئون ليلقوا النظرة الاخيرة علي جثماني قبل مواراته الثري 

تري ....بعد رحيلي بمدة  من سيفكر بي 

من سيتذكرني 

وكيف سيتذكرني ...

كل هذه التساؤلات دارت برأسي وأنا اتلقي خبر وفاة احدي قريباتي 

تذكرتها وانا اعمل لها شيء وهي تدعو لي  

تذكرتها وهي خجول تطلب مني شيء 

تذكرتها وهي تسلم علي بابتسامة

وأتذكر صديقة رحلت منذ سنوات ومازلت اتذكر ابتسامتها  عينيها الخضراء  وضحكتها  الواسعة

ومازلت برغم مرور السنوات اتذكرها وادعو لها واتصدق عليها 

اخشي  جل ما أخشي  أن لا اجد من لا يتذكرني ويدعو لي 

ان الموت يحاصرنا من كل جانب وطوال الوقت 

ولكن هل نحن مستعدون

اخشي أننا لسن كذلك

وأنني لست كذلك 

برغم محاولاتي

حاجات كتير ...

0

ياااااااااة وحشتني مدونتي أووي

وحشتني حياتي لكن مش حرة فيها

وحشني بلوجر  اووي ووحشني الناس هنا والخصوصية الي هنا والحب الي هنا

أول مرة ابعد عن بلوجر الوقت ده كله

اكتشفت اني من يوم 29 /4/ مكتبتش حاجة هنا ....

ياااة ثلاث شهور تقريبا 

انشغلت بالامتحانات بالدراسات العليا

1

أول مرة احس وانا بدرس اني ملخبطة ومش مركزة  وكل حاجة بنساها

والتذكر كان صعب عليا جدااا

اول مرة احس فعلا اني تعبانة جدا من الامتحانات والمذاكرة 

مش عارفة ده بسبب الحر أو بسبب الصيام واننا بدأنا الامتحانات من اول يوم رمضان  ولغاية اميارح

مش عارفة بسبب حاجات تانية شخصية 

مش عارفة بس اللي اعرفه اني كنت حاسة اني واحدة تانية  

رحاب الي كانت بتذاكر الكتاب مرة واحدة وبتراجعه  تكون استوعبته وفهمته كويس  كانت بتقرا الكتاب والمذكرة مبتفتكرش اي حاجة منهم وكأنها بتشوف الكلام ده للمرة الاولي 

كنت حاسة اني واحدة تانية وطالبة فاشلة

2

متوقعة لنفسي اني محصلش علي اي تقدير وقلقانة جدااا 

صحيح انا عملت اللي عليا 

ومعملتش زي الناس الي كانت بتغش الامتحان وبتنقل من الكتاب والمذكرة صورة طبق الاصل 

صحيح انبت نفسي كتير وقلت لنفسي اني أكيد كان لازم اذاكر أكتر واحضر محاضرات اكتر 

بس فعلا الدراسة بجوار الشغل متعبه جدااا  

بس انا الي اخترت اني ادرس وانا بشتغل يعني مش حجة

مش ببرر لنفسي اني هجيب  تقدير وحش 

بس انا الحمد لله مقتنعة بإجابتي تماما وعملت الي عليا 

وربنا ييسر لي الاحوال 

3

أول مرة احس ان رمضان راح مني 

خلاص فات عشرين يوم وانا معملتش اي حاجة 

حتي كنت بصلي التراويح وانا جاية م الامتحان تعبانة ومش مركزة 

اول سنة مقرأش في المصحف الا قليل جدااا  لدرجة انه بيفوت ايام مش بقرأ في المصحف خالص يا دوب أصلي وخلاص

أول سنة  مروحش اصلي التراويح والتهجد في المسجد بس نويت اني اروح العشر الاواخر  ان شاء الله 

واحاول اني  اعمل فيهم الي مقدرتش اعملعه بسبب الامتحانات 

أول مرة احس ان الصيام متعب  ...يمكن بسبب الحر واني بسافر كل يوم عشان الامتحانات ...مش عارفة 

بس فعلا كنت مضغوطة جدااا

لأول مرة احس اني في رمضان ده وزني بينزل بشكل مش طبيعي 

تقريبا اول مرة اخس في رمضان 

تقريبا كدة أصبح وزني نص وزني قبل رمضان :)

الصراحة انا خايفة اروح اوزن نفسي  اتصدم

4

عندي حاجات كتير نفسي احكيها ونفسي اكتب كتييير عن حاجات شوفتها  وحسيت بيها

مبسوطة بالناس الي اتعرفت عليهم في الكلية السنة دي 

بجد كانت مجموعة من احسن الناس  الي اتعرفت عليهم واتعاملت معاهم 

شعبة الاعلام المكونة من ست طلاب  " آية وانا وعماد ومحمد  ومنصور وهبة  " بنش واحد طول الامتحانات  مع ناس تحس انك تعرفهم من مليون سنة "

شعبة تكنولوجيا التعليم الي كان فيها ناس اعرفهم زي " صلاح وايهاب  وعبد الحميد وسيد ...وعرفت غيرهم زي محمد ومحمد أيمن " اللي بجد ساعدوني بكل المحاضرات الي محضرتهاش ...."

وبرغم كل ضغط الامتحانات وصعوبتها الا اني مبسوطة بكل حاجة فيها 

والحمد لله وياااااارب النتيجة تكون حلوة لينا كلنا يااارب

دعواتكم ...

ووحشتووووووووووووووووووووووني

نهاية العام الدراسي...

الورد الي ف المدرسة والي كل مرة مش اعرف اصوره

فريق الكرة بدورة بيبسي للمدارس

كان هذا العام بالنسبة للدراسة سريع جدا ومرهق لأبعد الحدود 

لكنه مر بكل ما فيه من كل شيء ,,,حلوه ومره ...

كان برغم الارهاق في حاجات حلوة 

زي حفلات التكريم للطلاب والمدرسين  ....

زي كل التعليمات الي بنرفضها وبنعملها لانها ف مصلحتنا 

زي كل حاجة بنعملها لاننا لازم نعملها .... زي الاكل والشرب لان هي دي الحياة 

ومر العام الدراسي .... وها نحن علي وشك دخول الامتحان ....

ستكون هذه التدوينة عن مدرستي .... الي بحبها جدااا  وكنت اتمني اني  اكتب عن كل شيء فيها لكن لن استطيع 

يكفيني شرفا أني اعمل بها وأحب كل من فيها وما فيها ....

الاستاذ احمد افضل رائد فصل

انا  ومفاجأة تكريم

صورتها بالموبايل  زي ما طلعت وكدة يعني

فريق الكرة بالمدرسة في دورة بيبسي للمدارس وحصل علي المركز الاول علي مستوي الادارة والمحافظة 

إحدي مجموعات الاذاعة ...وكلمة لمدير المدرسة 

من اجتماع  جماعة الصحافة

اجتماع جماعة الصحافة  في قاعة المسرح المدرسي

الورد الي في المدرسة

وكل سنة واحنا طيبين ويارب نخلص امتحانات علي خير

حجر الاساس ....!

كتب صديقي العزيز ياسين احمد سعيد علي الفيس بوك يقول ...
من فترة انتشر قوى المنشور دا:
-----------------------------------------
غاده عبد الرازق فى فيلمها الجديد ( حجر اساس )
عامله دور مدرسة فى اواخر التلاتينيات بتتجوز واحد ضعيف جنسياً وبتقرر تطلق للسبب ده وبتعجب بطالب فى اعدادى وبتعمل معاه علاقه وبتخلف منه
تفتكروا كام طالب بعد ميشوف الفيلم ده هيتخيل مدرسته وهيا معاه فى اوضاع زي كده ؟!!
----------------------------------------
ولأن هم يضحك وهم يبكى،اتشقلبت من الضحك من أحد التعليقات ف جروب على الكلام دا،تعليق من سطر واحد بختصر الحالة المأسواية:
- هااااااااااااااار اسود انا كدا هبطل تدريس دا انا عندي شحوطه..
 تعليقي انا ...
كان عبارة عن موقف افتكرته  في بداية شغلي في مدرستي  اني واقفة مع طلبة الصف الثالث الاعدادي  وطبعا هما ماشاء الله طولي مرتين وانا بتعامل معاهم  عادي كأنهم أصحابي ...وده خللي وكيل المدرسة يقوللي في يوم  متخليش العيال  بتوع تالتة يقفوا معاكي كتير  ...رد عليه المدير  ببساطة .... العيال فاكرين رحاب  بنفس عمرهم  عشان هي "حاجة صغيرة "  
وقتها ضحكت كتير بس متخيلتش اني ممكن اقابل كم المشاكل الي قابلته من بساطتي من التعامل مع  طلاب الاعدادي 
عشان كدة لما الموجه جه وطلب مني اني اتنقل لمدرسة ثانوي رفضت جداااا
اذا كنت مستحملة كل مشكلات الاعدادي بالعافية ومش بشتكي ...هروح الثانوي اعمل اية ...؟
ومعتقدش اني اتكلمت عن المشكلات دي مع اي شخص انا طبيعتي اصلا  مش بتحكي لحد بسهولة
لما قرأت الخبر عن فيلم غادة عبد الرازق  كان نفسي اولع في اي حد من بتوع الفن الهابط ده 
يعني بدال ما  نشوف مشكلة من المشاكل المهمة ونعرضها ونحاول نحط لها حلول    نحط احنا بنزين علي النار  ....
يا نهار اسوووود 
بصراحة  الاخلاق والرقي بالاعلام اصبح شي ء محال 
اذا كانت المدرسات بتعاني من  تعلق الطلاب بها  او في اغلب الاحيان ان الطالب يجي للمدرسة يقولها انه معجب بيها وبيحبها  ...واكيد بتكون صدمة ليها وكتير مش بيعرفوا يتعاملوا مع المواقف دي ...
انتم متخيلين  بعد الفيلم ده ممكن الطلاب يتعاملوا معانا ازاي ...؟
 لا انكر اني تعرضت لمواقف شنيعة  علي مدي الثلاث سنوات الماضية بسبب الطلاب ...كتير بسبب الفاظهم لاني واحدة  من القليلين الي مبتعرفش تتعامل مع الالفاظ نهائي 
صحيح خليت بيني وبينهم ود وبساطة تخليهم يحبوني اكتر من اي حد في المدرسة  الا اني كمان عاملة معاهم حدود  مش ممكن يتخطوها ...عارفين اني مش بحب اي لفظ اي كان عشان كدة مفيش حد فيهم بيقول اي لفظ حتي البنات 
الحمد لله قدرت اتخطي مشكلات كتير   مع ولاد وبنات 
لكن معتقدش ان بعد فيلم زي ده ان العلاقة  بيني وبين الطلاب  ممكن تفضل بنفس البساطة ...
أوقات كتير الاقيهم يقولولي " انت موزة النهاردة يا ميس " وانا بكرة الكلمة دي جدا ... 
ومننساش ان المراهقين بيبصوا لكل شيء وبيلاحظوا كل شيء 
صحيح ان  تعاملاتي معاهم  هتخلي العلاقة كويسة لكن التأثير السلبي اكيد له دور ...
والافلام تحديدا او الفن عموما له دور كبير جدا في التأثير علي الشباب  والمراهقين بوجه خاص 
انتم إية رأيكم ...؟

لم يكن عيد أم

يمكن تستغربوا العنوان ....لكن هتستغربوا الصورة أكتر وتسألوا مين ده ؟

هتصدقوا لو قلت لكم اني اصلا مكنتش فاكرة ملامح محمد ...!! أو حمادة زي ما كل الناس بتناديه ....

في الوقت الي كل الناس محتارة إية  تقدم لمامتها في عيد الام  كانت هناك أم مستنية خبر ....أي خبر  يعرفها ابنها ميت والا عايش ...سليم والا زي ما قالولها  انه اصبح عظاما مختلطا  باللحم  من شدة الحادث وبشاعته ....

شييء صعب أن تنتظر  ولدك  يقول لك كل عام وانت بخير يا امي ... ليكون عيد الام  عزاء تحضره كل الامهات لمواساة أم ....

حمادة  شاب  في العشرين او الاتنين وعشرين من عمره ...مثله مثل اي شاب مصري  يريد عمل  ليشعر أن له  فائدة في هذا العالم .... حتي ولو كان هذا العمل بلاد الغربة  التي لا نعرف  كيف يستقبلون المصريين بها ....

وبرغم اصرار والدية علي عدم سفره الا انه اصر   بشدة علي السفر  متمسكا بأن له زملاء هناك واقارب سيساعدونه علي تحمل الغربة وقسوة العمل ...

اصراره  علي السفر  كأن قدره يناديه ...

اسبوع واحد فقط  مر علي سفره  لتتناقل البلد الاخبار عن الحادث وانه تقريبا الوحيد الذي اصيب اصابات بالغة .... وأصبحنا في الثلاث ايام الماضية  نتناقل الاخبار  ....هو بالعناية المشددة ...هو سليم ...هو مات .... ولا أحد يعرف  شيء ...

ثم جاء الخبر المؤكد ....مات حمادة ....

حاولت أن ابحث في ذاكرتي  عن ملامحه ولكني عجزت ...فأنا لم أتحدث معه تقريبا سوي مرة او مرتين برغم انا جيران  وبرغم ان اخته صديقتي جدااا وبرغم اني اتحدث دوما مع والدته  ....... الا  انني لم  استطع  تذكر ملامحه  ابدا أو اني في عقلي الباطن ارفض التذكر كحالتي دوما  عندما اسمع خبر وفاة أحد  بشكل مفاجيء ... 

فجأة اصبح كل شيء بلا معني ...وكل شيء اصبح لا شيء ..

يوم صعب جداا 

ويوم كئيب جدااا  

في الفجر صليت ودعوت له كثيرا 

في اليوم التالي ...اليوم الذي وصل جثمان حمادة للبلد  كانت البلد تعيش  اقسي لحظاتها في وداعه

وتحول الفيس بوك  كله الي صورة واحدة  لحمادة هي تلك الصورة   وكل منا يكتب كلمات له في صمت حزين 

وكان اقسي عيد ام مر علينا

وأنا التي كنت أحسب ان اقسي عيد أم  كان قدر مر برحيل أخر
دعواتنا متصله لـ محمد  بالرحمة والغفران 
يارب ارحمه واغفر له وادخله فسيح جناتك 
اللهم آميييييين

قـــيد الفــــراشـــــــة

شيرين سامي

 بدون مجاملة ......
رواية شيرين سامي الاولي " قيد الفراشة " 
كنت كلما قرأت علي الفيس  بوك  كلمات شيرين عن الرواية  أتغاضي عن قراءتها حتي لا  أحرق الاحداث  
لا أنكر  انجذابي الشديد  نحو كتابات شيرين وبعيد عن كوني  وشيرين صديقتين الا انني أندهشت من كم التعليقات عن الرواية  والاشادة بها  
لا أنكر اني  كنت ذاهبة  خصيصا لمعرض الكتاب من اجل قيد الفراشة ...صحيح اني  أخذت وقت حتي أستطيع قراءتها   الا انني قرأتها في ليلتين متتاليتين   فقط ...بدأتها  في ليلة وسهرت الي الثانية صباحا  وكنت علي سفر ثاني يوم بسبب العمل   ثم الليلة التالية  أكملتها برغم تعب العمل والسفر ...
لم احيذ أبدا  قراءة التعريف بغلاف الرواية ....
لم أحبذ  الكلام الاستهلالي بمقدمة الرواية  .... فهو يحرق الاحداث  من وجهه نظري ...
بداية الرواية لم يجذبني   وبدأت أقول لنفسي لا  ليست هذه شيرين سامي لا ليست كتابتها هذه ... ...
البطلة  من ذلك النوع  الضعيف وانا لا احب البطلات الضعيفات ...مستسلمة لرجل بغيض  يسيء معاملاتها وترضي فقط لأنها تحبه ... ...كم هو غبي  قلبنا هذاا الذي يحب  رجل بتلك الصفات ...
لكني لم ايأس .... فانا قد نزلت البحر وصممت أن أغوص  للنهاية لأعرف ماذا يوجد بالقاع ...
وغصت في عالم شيرين سامي  ....وللصفحة الخامسة والثمانون  تغير كل شيء بتغير  الساعة البيولوجية للبطلة " عالية " التي بدأت تبحث عن ما كانت تفتقده ....
وبعدها فهمت لماذا  كتبت شيرين تلك الصفحات الاولي ..... فشتان ما بين " عالية " في بداية الرواية  ومنتصفها ونهايتها ....
بل شتان ما بين  كل شخصيات الرواية ....فليس فقط " عالية " من تمردت علي قيدها ....بل مروة ومحمود  وفرح ....
أعجبتني جدا شخصية مروة  فهي  شخصية مصرية صميمة .... واعجبت بشخصية غزل التي تخبيء في  انطلاقها   مشاعر شتي  
شخصية الزوج " محمود " شخصية رجل مصري مسلم شرقي الطباع جدااااا  ...رجل ككل الرجال  المستحببين السلطة لكنهم كان في الاساس مسلط عليهم ...
" حسن " يمكن  شيرين اختارت اسم حسن  لشيء ما أو انا  فهمته بطريقة اخري ...فليس كل حسن ...هو حسن  " مش كل شيء حلو بيطلع حلو " 
النهاية   سعيدة لــ مروة .... ولــ علا  ولــ غزل .... نورا الي حد ما  هي قصة مكررة لنساء عدة ... وفرح هي كل فتاة مصرية  سافر  ابواها لدولة عربية   وكانت النقود هي التعويض لذا لم  تفاجئني  نهاية قصتها بتلك الطريقة لانه لا توجد نهاية الا هي ...
اما بطل  القيد نفسه " محمود " فمثله مثل اغلب الرجال يعرف  قيمة الشيء بعد أن   يفقده ....
" حسن " لقد كرهتك فعلا ...... علي قدر حببي لك ...
عالية ..... نهاية قصتك وتمردك علي حبك  يشبهني  ...لكن أنا عنيدة أكثر ....بكثير 
يتبقي ان شيرين سامي  نسيت شيء مهم ....وهو  كيف ان  عالية عانت من  التفرقة بالمعاملة بينها وبين اخيها ولم تظهر هذا في الراوية الا من خلال مشهد او اثنين   وكانا طبيعي جدا ان يحدث بين اب وابنته .... دي فاتتك يا شيرين ...
في المجمل الرواية جميلة جداا فعلا  ولانها الرواية الاولي لشيرين فهي تستحق فعلا  النشر والانتشار ....
تحية إلي شيرين سامي ...وأنا فخورة أنك صديقتي .....^_^ 
بقي نقطة بالغة الاهمية   بالنسبة للرواية  فقد فوجئت  ان سعر الرواية خمسين جنية  وهو سعر  عالي جدااا  في ظل الظروف الاقتصادية  التي نعانيها والمفروض في ثلك الظروف الثقافية التي نعيشها أن يكون سعر الكتاب اقل من هذا بكثير وقد عاتبت شيرين وقتها علي هذا ولكنها قالت ان دار النشر هي التي اصرت علي السعر لان الرواية كبيرة ...
لكنه ليس مبرر علي اي حال  .... ونصيحة ....انت لو روايتك الاولي بالسعر ده انت متخيلة مين هيشتريها غير أصحابك ...
هذا الكلام ليس لشيرين فقط بل لكل من يكتب سواء كتاب ناشئين او كبار .... فنحن في ازمة اقتصادية   وكثيرون  لن يشتروا رواية  بهذا السعر ... وسيفضلون وقتها الخبر علي الثقافة ....وهذا رأي بدون مجاملة

شيرين سامي وانا ^_^ الصورة الوحيدة الي تم انقاذها من موبايلي 

السيدة الاولي ...

في يوم وانا راجعة من الشغل  وداخلة البيت علي اخر نفس  لقيت اخواتي الاتنين في مناقشة حامية الوطيس زي ما بيقولوا  وكانت عن السيدة الاولي  ولمن لا يعرف فإن لقب السيدة الاولي  لقب  انتقته السيدة جيهان السادات لنفسها  بدعوي انها سيدة مصر الاولي   زوجة رئيس البلاد  .....
وكانتا اخواتي الاتنين  بيتكلموا عن زوجة الرئيس مرسي وزوجة  الرئيس القادم السيسي  اختي عبير كانت مصممة ان زوجة مرسي متنفعش تكون السيدة الاولي لان لبسها مينفعش تقابل بيه الرؤساء ولا زوجاتهم لانها هتظهر لهم اننا مبنعرفش نلبس ولا نعرف حاجة ف الموضة وهتخليهم يقولوا علينا اننا  ناس جاهلين مش بس رجعيين  ومتزمتيين جدا 
شيرين كانت شايفة العكس ان زوجة مرسي مثال للزوجة المتدينة ومش عشان هتقابل  رؤساء دول  يبقي لازم  تكون بشعرها  ولبس عريان 
عبير قالت ان زوجة السيسي كانت لابسة حجاب  وبرغم ذلك كان لبسها شيك جدا برغم انها مش زوجة رئيس  البلاد لغاية الان وهي بتظهر المرأة المصرية بشكل كويس جدا بعكس صورة زوجة مرسي 
وبالتأكيد ان الجميع تناول صورة زوجة السيسي وقارنها بصورة زوجة مرسي  واحتفت بها  علي الفيس بوك وعلي جميع المنتديات
وسواء كانت المقارنة منصفة او مجحفة  أو من قال انها ليست صورة زوجة السيسي  وما إلي ذلك  .....أحب أن أقول شيء وأنا أنبه أكثر من مليون مرة  علي مدونتي وعلي الفيس أنا لست مع أو ضد حزب أو فصيل معين ...ولن أكون أبدا ...أنا فقط لي رأي  الحر 
من رأي أن زوجة الرئيس  مهما كانت  معروفة او غير معروفة قبل أن تكون السيدة الاولي فإن الاعلام العربي والغربي سيضعونها تحت المجهر  ويبحثون عن كل  ما يخصها وليس فقط صورها القديمة والجديدة ويقارنون  بينها وبين السيدات الاول في كل الدول ...
لذا فهي لن تمثل نفسها هنا بل ستمثل دولة بأكملها  وليس نساءها فقط ...
أنا لا اقول هنا اخلعي حجابك بل بالعكس  تمسكي به ولكن اظهري الحجاب بأحسن صورة ممكنة  فلا تنسي أنك بهذا تعلي صورة الحجاب والاسلام  أظهري ملابسك المحتشمة بأناقة ورقي  واذا كنت لا تعلمين كيف تظهرية فما أكثر  بيوت ازياء المحجبات في مصر  فأنت  وحتي ان كنت ترفضي لقب السيدة الاولي فأنت تمثلين الدولة  ولابد أن تكوني قادرة علي تمثيلها بمهارة  ونجاح 
وعايزة أذكر هنا ان احنا كبشر بنحكم علي البشر من خلال مظهرهم  حتي ولو بشكل اولي او انطباع اولي  وخصوصا الستات  فما بالك ان تكون تلك السيدة هي زوجة الرئيس  ....!!!
 

معرض الكتاب 2014

في الحقيقة أنا لم أكن علي يقين أني سأذهب للمعرض هذا العام برغم اني كنت مهيئة نفسي  للذهاب  ككل عام
ولكن سفر أخي أحمد لخبطني كتير وفي النهاية ذهبت انا وأختي  فقط ...
كنت عاملة قائمة بالكتب  الي هشتريها وكان بالمقدمة قيد الفراشة  لشيرين سامي وقصص  اهري لبعض الصديقات والاصدقاء  مثل ياسين احمد سعيد  وصالح سعيد ونهي عويضة  ومحمد الجيزاوي ورحاب الخضري ...
الحمد لله وصلت للمعرض بسلامة الله بدون اي حوادث ههه وكنت علي اتصال بصحباتي  غادة ورضا
لما وصلنا المعرض انا واختي شيرين قررنا ناخد جولة لغاية ما أصحابنا يجيو وعلي ما حفلة معطف من قيود تبدا وبعدها قيد الفراشة الي احنا جايين مخصوص عشانهم
اول صالة دخلناها كانت صالة الشروق وانا كنت دخلاها مخصوص عشان رواية " انكسار الروح " لمحمد المنسي قنديل  وللاسف انا عارفة ان الشروق اصلا غالية  وبرغم ذلك دخلت  ولفيت فيها وللأسف انا غلطانة اني دخلت لاني دخلت اتقهرت وطلعت لان لقيت انكسار الروح بسعر ضعف الي اشتريت بيه قمر علي سمر قند ويوم غائم بالبر الغربي وانا عشقت  عشان كدة صرفت نظر ومشتريتهاش  بس قابلت واحدة كانت بتشتري  روايات لمحمد المنسي  وكانت محتارة وانا طبعا قلت لها رأي ف اللي قرأته واخدت الروايات علي ضمانتي ^_^
اللي ضايقني اكتر لما دخلت صالة الشروق ان لقيت  رواية لأوراهان باموق  الكاتب التركي الحاصل علي جائزة نوبل في الاداب  عام 2008 تقريبا عن رواية اسمي احمر  _ للتوضيح عشان الناس الي معندهاش فكرة_  وطبعا  الكتتاب كان من القطع الكبير وكان سعره  فوق الفظيه والرهيب ...مش عارفة اية حكاية الكتب الغالية دي والا هو كل التركي غالي ؟!!
قلت اشتري ديوان فاروق جويدة الجديد أو اي ديوان لجويدة مش عندي ملقتش اي شيء جديد  له للأسف واستغربت  جدا ان ازاي مفيش جديد لفاروق جويدة ؟ وطبعا خرجت من صالة الشروق من غير اي شيء
تاني شيء قررت ادور عليه ف المعرض  كان قيد الفراشة والجميل اننا وصلنا للمكتبة بالصدفة البحتة  واحنا رايحين جناح المؤسسة العربية الحديثة بس اتصدمت جدا لما جيت اشتري قيد الفراشة لاني لقيتها بخمسين جنية  @_o
طبعا دي كانت الصاعقة بالنسبة لي  واتكلمت مع شيرين ف الموضوع ده وهي قالت ان دار النشر الي صممت علي السعر بدعوي ان الرواية كبيرة 400 صفحة واكثر ...بس ده مش مبرر من وجهه نظري لأن الساحة الثقافية ف مصر حاليا والحالة الاقتصادية تخلي اي دار نشر تنشر الكتب  بسعر  مخفض عشان تنشط حركة البيع مش تخليه  عالي بالشكل ده ...
طبعا مش ممكن اروح المعرض من غير ما ادخل جناح المؤسسة العربية الحديثة معقل روايات مصرية للجيب  وبصراحة كنت قبل كدة بدخل جناح المؤسسة  شايلة كومة كتب  متنوعة السنة دي حسيت انها فاضية اووي اووي اووي من الكتب ومن الناس الي بتشتري  اصداراتها اصبحت قليلة اووي ولناس مش  معرفوفين  وكل الناس بتشتري الاعداد القديمة او الجددي لنبيل فاروق احمد خالد توفيق    يمكن الجديد لمحمد سيليمان عبد المالك الي لسة مع المؤسسة من اول كتاب ليه  لما كان يا دوب عشرين سنة ..فاكرة اووي  اول قصة كتبها  ....المرة دي اشتريت من المؤسسة بس اربع قصص طبعا من ضمنهم اتنين للدكتور احمد خالد توفيق ... واستغربت جدا  لاني كنت زمان بادخل المؤسسة الاقيها زحمة زحمة ومتعرفش تقف ولا تتحرك فيها ...واضح ان بعد نبيل فاروق واحمد خالد توفيق  المؤسسة  مستواها بقي زفت جدا ...
وعند المؤسسة قابلنا اسامة الازهري واسامة ناصر ورامي فايز الي اول مرة اشوفه  بجد رامي شخصية حبابة كتير  كتير وانبستط لما شوفته وسألته لية مش بيكت ف المدونة وعرفت انها اتسرقت وزعلت اووي :(
بعدها اخيرا وصلت صحباتي غادة ورضا وطبعا اتصورنا شوية صور شنيعة مريعة جداا ولاحظوا ان غادة ورضا طوال وانا قصيرة   فتخيلوا الصور هتكون عاملة ازاي @_@
طبعا اخدنا جولة في المعرض واشترين روايات بالانجليزية لاختي شيرين لانها  انجليش تيتشر للأسف انا مش هقدر اققرا الروايات لان الانجليزي بتاعي عايز الللغة السيمبل ^_^ 
المشكلة اني كل ما كنت امسك رواية بالانجليزية الاقيها لباولو كويلو  وتحديدا رواية احدي عشر دقيقة  وكنت كل شوية اضحك انا ورضا  لاننا كل مرة نمسك نفس الرواية ...لغاية ما صديقي ياسر  حسن  قابلنا  واحنا بنضحك  علي الرواية قوال بالعكس دي رواية حلوة جدا وانا معاه انها حلوة   برغم المشاهد الحميمية فيها وعلي رأي غادة  ورضا ا  "  ثقافة عامة يا جماعة "  
 

اسرة الدكتور صابر عبد القادر

اخيرا وصلنا  لدار ابداع  وحفلة  توقيع معطف من قيود واول حد شوفته هناك كان زياد  ابراهيم رزق  عرفته لوحدي هو اصلا نسخة ذكورية من ساليناز  بجد عسل عسل  عسل ... وطبعا بعدها شوفت ساليناز وابراهيم رزق واخيرا شوفت ماما شمس الشموس الي جابتلي شيكولاته بنفسج ولسة لغاية دلوقت معايا مش عايزة اكلها محتفظة بيها عشان هي منها :* بوسة اد كدة 
وكمان شوفت  الدكتور صابر عبد القادر   واسرته ودعاء العطار الي بجد انبسط جدا بشوفتها  واخيرا شيرين سامي الي كانت واقفة مستنية لما اخلص واجب التعريف بين  اصحابي  ياسر  ورضا  وغادة واختي شيرين لباقي المجموعة  
وكان بجد يوم من اروع الايام برغم انه كان قصير   والي ختمناه بحفلة توقيع قيد الفراشة الي لسة هكتب له الريفيو  واللي مفيهوش اي شبهة مجاملة لشيرين سامي اطلاقا 
الغريب ان دي اول سنة اروح فيها المعرض واشتري كتب قليلة جداا حتي ماما استغربت  وقالت يارب  كل مرة تسافري تجيبي شوية كتب قليلين كدة .... مش عارفة لية كتير عناوين معجبتنيش ولالي عجبني كان سعره مبالغ فيه ... 
المهم ان  انا شوفت اصحابنا الي مش بشوفهم متجمعين الا كل فين وفين ومبسوطة بيهم كتير جداا 
والمهم ان تاني يوم عمي بيسألني انت جيتي امتي من مصر ...اصل انا سألت عليكم وعرفت انك روحتي مصر من غير احمد  وبابا كان قلقان فقلت له متقلقش علي رحاب رحاب دي عفريتة ومتخافش عليها  وبعدين ما تسيبهوم يتفسحوا شوية ....والله عمي ده زي العسل ...^_^ بحبك يا عمووو 
مبسوطة اني وشفت شيرين تاني وشمس اول مرة واخيرا شوفت زياد  وطبعا لي كام صورة مع ساليناز بس لسة  مش عندي لغاية دلوقت وصوري انا وغادة ورضا  تموت من الضحك ...وقلت الاسياب :( وصوري مع شيرين سامي والله اول ما توصلني هنشرها أكيد ...ومبسوطة اني شوفت رامي  وجوجو وزينب  ورضا وغادة وياسر  واسامة ناصر والازهري  وكل الناس الي اتعرفت عليهم كلهم بحبكم جدااااااا

شيرين وشمس ودعاء وابراهيم

الصور تتحدث عن نفسها في  حفلة توقيع قيد الفراشة لشيرين سامي 
ثم انا ماليش ولا صورة لية !!!؟
عشان صوري لسة في المطبعة  هه
الحقيقة  انا مش هكتب اي شيء عن قيد الفراشة قبل أن اقرأها ولاني جيت من المعرض علي الشغل علي طول قلت ارفع الصور ثم  اقرأ الرواية وبعدين اكتب عنها ....
اسيبكم مع الصور اللي تفتح النفس علي الحياة

ضحكة من القلب  

مع محمد عبد القوي مصيلحي صاحب رواية " ليليان "

آمن

اخواتها الصغيرين زي ما هي قالت  مش آمن وجوري يا جماعة

غادة قدري

شيرين وزينب

شمس النهار  وشيرين سامي

الفراشة تهمس للجوري

شيرين سامي ودعاء العطار  وسارة درويش ثم غادة محسن

        

شمس الشموس وشيرين ودعاء العطار وابراهيم رزق

  

لبني نور طبعا وهل يخفي القمر   

اسرة شيرين سامي   

قيد ....وقيود

بما ان شيرين سامي قفلت مدونتها حدوتة مصرية 

حبينا ننوه عن حفلة توقيع روايتها الأولي " قيد الفراشة " 

فبعد قصاصاتها  الرقيقة في كتاب بنكهة مصر  تفاجئنا شيرين سامي بروايتها الاولي قيد الفراشة  ونحن في غني عن التذكير باسلوب  شيرين الرقيق والراقي  ذو الاحساس المرهف  لذا نحن في انتظاركم  بمعرض الكتاب بحفلة توقيع قيد الفراشة 

يوم الثلاثاء بمعرض الكتاب الساعة الثالثة ظهرا هنا .....الايفينت

وقبلها بساعة حفلة توقيع  الكتاب الجماعي " معطف من قيود " ذلك المعطف الذي تناولناه جميعا بقصص مختلفة  ومتباينة  عشقناها جميعا وتابعنها علي مدونات مختلفة وجمعنها في مدونة واحدة باسم معطف من قيود  وهي الان بمعرض الكتاب  بين دفتي كتاب  وبحضور شمس الشموس ماما شمس النهار   وابو ساليناز ابراهيم رزق ودكتور التدوين مصطفي سيف وطبعا شيرين سامي

هنا ...هنا  الرواية الجماعية معطف من قيود   

ان شاء الله اكون موجودة هناك من بدري كمان ومستنينكم هناك  :)

حكايتي مع ....محمد المنسي قنديل

كنت شغوفة بقراءة مجلة العربي  ومازلت شغوفة بها
كنت اتابع مقالات محمد المنسي قنديل  منبهرة  خاصة انه قام برحلات كثيرة لبلاد عديدة  وكنت اتمني ان تتاح لي فرصة مثله للسفر  لم اعرف ان محمد المنسي قنديل كاتب مصري الا بعد فترة كبيرة  وانه طبيب وروائي  
اشتقت لأن اقرأ له احدي الروايات  ولكن لم تتاح لي الفرصة الا بعد سنوات 
كنت في احدي المكتبات المشهورة  وسألت عن رواياته  وفوجأت ان ثمن رواية واحدة له  بمبلغ خرافي  جعلت زميلي يقول لي في خفوت  " ومالها الازبكية يعني  ده احنا نجيب بالمبلغ الي بيقول عليه ده كومة كتب  " 
ولكن زميل اخر قال " ده يبقي اسمه سرقة لان  المكتبة الي ناشرة الكتاب  مقدرة قيمة الكتاب بالسعر ده وانك تشترية من سوق الكتب المستعملة يبقي كدة بتبتز الشركة  وكمان بيكون في نسخ مقلدة  وانك تشتري نسخة مقلدة يبق يانت كدة بتبخسي الكتاب ثمنه وكمان قيمة الكاتب نفسه , يا تري انت لو مكان الكاتب مش هتزعلي ان كتابك يكون بثمن والناس تشري منه نسخة مقلدة لانه غالي "
وقتها انا قلت  اني لو اصبحت كاتبة كبية عمري ما هبالغ في سعر كتابي  وهيكون في شرط اساسي مع  دار النشر عشان السعر  لاني بالاساس مش بكتب عشان الفلوس .....
لا ادري كم من الايام والشهور مرت علي كلماتي انا واصدقائي ...
الا انه في نهاية  عام 2013 بالصدفة  فقط هي من  وضعت في طريقي رواية محمد المنسي قنديل  " قمر علي سمر قند "  بسعر معقول جداا ....
اكثر من خمسمائة صفحة  سهرت فيها  بين ابطال  ينفسون مشاعر شتي ...وتاريخ رائع   وددت لو عشت فيه صحيح ان كل من قرأ الرواية  غضب من النهاية الا انني برغم عدم توقعي للنهاية الا انها تمن وجهة نظري  نهاية مفتوحة منطقية جدااا  
الرواية حصلت علي جائزة  ساويرس للأداب عام 2006  وبالرغم من نهايتها المؤلمة الا ان من يقراءها يري انها تستحق اكثر من هذا  واكثر من جائزة 
ثم بدأت عام 2014 برواية " يوم غائم في البر الغربي "  اكثر من خمسمائة صفحة  من التاريخ  الفرعوني  من قصص الاثار من قصص الحب والالم   من قصص الاحتلال والثورة والغضب   من قصص  البؤس  والفرح ... ستجد مصطفي كامل  وهوارد كارتر واللورد كرومر كما لم تجدهم  , ستجد  اخناتون ونفرتيتي  وحور محب وتوت عنخ امون كما لم تعرفهم  ....ابطال  اخرون  خارقون بمشاعرهم  .....
صحيح لم تعجبني نهايتها واحسست انها مبتورة الا انني استمتعت جداا واحسست انني فهمت واحببت التاريخ اكثر 
بالرغم من ان الرواية  قد وصلت للقائمة القصيرة للبوكر عام 2010   وتم عمل مسلسل تليفزيوني مستوحي منها الا انها تستحق اكثر من هذا ...

لا أدري لماذا اليوم  بعد كل تلك السنوات التي قرأت  لمحمد المنسي قنديل في مجلة العربي لم اكتب له  برغم  انني كنت دائمة التعقيب علي مقالات مختلفة للمجلة  وكنت صديقة دائمة  لهم ....
لا اعرف لماذا اليوم  أحبت أن أكتب عنه ....جائز  من تأثير قراءةالروايتين ...جائز  لان احد اصدقائي  كتب علي الفيس بوك  يتحسر علي زمن أصبح فيه احمد مراد الكاتب الاكثر شعبية وروايته الفيل الازرق هي الاكثر مبيعا ....
من الممكن اني قد  غضبت   لان كاتب مثل احمد مراد يكتب عن الجنس والمخدرات  يصل لعقول القراء  وكاتب مثل محمد المنسي قنديل لا يصل اليهم .... :( 
صحيح لا أنكر ان هناك مشاهد حميمية  في روايات المنسي  لكن تبقي اللغة هي الاهم فهي لا تجرحك  وتمر امامك هذه المشاهد  مثل مشاهد الشعر  فــ لغة المنسي  راقية ورائعة ....
انا بحياتي لم انبهر بكاتب  في طفولتي  بعد نبيل فاروق واحمد خالد توفيق مثلما انبهرت بمحمد المنسي قنديل   الان ومن يوم قرأت له وانبهاري يزداد ولم اتمني ان اقابل  كاتب مثلما اتمني ان اقابله الآن ....
اتمني  ان تكون المنافسة بين المنسي ومراد  لصالح المنسي لانني أري ان احمد مراد لم يكتب شيء ذو قيمة سوي فيرتيجو 
اخر الاخبار عن  ان رواية المنسي " انا عشقت " سيحولونها الي مسلسل  سيتم عرضه في رمضان القادم ...هذه الرواية سأبدأ فيها الليلة ان شاء الله 

أري ان محمد المنسي قنديل يستحق ان نكتب عنه  وأن نقرأ له فحتي ان كتبنا عن كاتب او رواية لا نحبها فهذا مجد أخر يحسب له ...فما اعتقادك بكاتب تعشقه ...يصرر علي تعريفك بتاريخك الذي لا تعرف عنه شيء .... وبلاد  قد تكون جوارك لا تعرفها ....اعتقد بل متأكدة ان رواياته هي مرجع لنا جميعا ...اتمني منكم جميعا ان تقرأوها وأن تكتبوا عنها ...