الثلاثاء، 2 نوفمبر 2010

فـــــــــارس أحــــــــــلام شـــــــــــرعي

سؤال كنا دايما نسأله لبعض انا وصحباتي البنات وهو " يا تري إية هي مواصفات فارس احلامك ...؟" ويااااااما كنا بنقول اللي عايزاه طويل ورفيع وبعيون زرقا زي ميل جيبسون والا زي براد بيت واللي نفسها ف واحد شبه عمر الشريف واللي عايزاه زي احمد السقا وكريم عبد العزيز ...
لكن انك تلاقي واحدة تقولك انا عايزاه بدقن طويلة وجلابية بيضا قصيرة وعلامة الصلاة منورة في جبينه وكمان يتجوز اربعة عشان يطبق شرع الله ....!!!! يبقي في هناك شييء مش مفهوم ....
دي بقي ماهيتاب صاحبيتي ماهيتاب دي بقي حكاية بتحب الهيصة واللمة وبتحب الحب ولو مفيش ف حياتها حد بتحبه تدور علي حد تحبه , وكمان لفت مصر كلها تقريبا وبتصيف ف ارقي الاماكن والا لبسها اييييييييية علي احدث صيحة في عالم الموضة .....
انقلبت ماهيتاب مرة واحدة كدة سبعمية وسبعين درجة ( مش تلتمية وستين درجة ...دي بقت قديمة اوووي) ولقيناها مرة واحدة كدة دخلت علينا بشكل غريب ...عباية سودا وطرحة سودا ونقاب اسود وشراب وجوانتي اسود ...يعني اسود ف اسود م الاخر وبقت تكلمنا ب يا اخت ..ويا ربنا يهديك ....ويا استغفر لك الله ...يا رب اصلح من  شأنها .......اية اللي حصل ...؟!!
دسست انفي ف الامر وهو امر ليس معتاد في شلتنا ...واكتشفت الســـــــــــــــــــــــــر .....سر ماهيتاب ......
ماهيتاب يا جماعة اتعرفت علي اخت من الاخوات المسلمات ( علي اساس ان احنا يعني كفار ) وقالت لها الاخت دي ان حياتها دي كلها حرام ف حرام ولازم تكفر عن سيئاتها  وخطيئاتها وتتطهر من دنسها ........واستسلمت لها ماهيتاب وهي تبكي علي عمرها الذي فات ف كل تلك الاخطاء ....ولكي يكتمل تطهرها من كل ذلك الدنس لابد ان تتزوج من اخ مسلم من عشيرتهم .......ولابد ان تطيعه ف كل ما يقول ولابد لها ان تعرف انه يطبق شرع الله وهو متزوج اثنتين وسيتزوجها ويتزوج اخري عليها وبهذا يكون قد طبق شرع الله ( عشان لازم يتجوز اربعة وبعدين ما هيحل ازمة العنوسة يا جماعة متبقوش قاسييين ع الراجل كدة )
المهم ان ماهيتاب جاءت الي وهي حائرة وفي منتهي اللخبطة قائلة لي " الحقيني تعالي شوفي الكارثه اللي انا فيها ...؟" قلت لها خييييير .....قالت : شوفي يا ستي الجماعة دي عندهم شروط وبيقولو انها من شروط الاسلام قبل الزواج .." قلت لها اه انه لازم يشوفك  طيب ما هو ده طبيعي ...قالت لاء شوفي هو لازم يشوف وشي وكف ايدي وكعب رجلي واطراف شعري ....وانت عارفة انهم قالولي ان كل ادوات الميك اب حرام دلوقتي اعمل اية وهو هيشوفني علي طبيعتي اكيد مش هعجبه لاني انا نفسي مش عجبني شكلي وانا من غير ميك اب .....انت عارفة هو ده فارس احلامي."
تخيلوا وشها وكف ايدها وكعب رجليها واطراف شعرها ...بقي بذمتكم ده كلام بقي هو ده فارس الاحلام  ....؟وبعدين ماهيتاب مفكرتش في الشييء الغريب انه يكون مسلم ومدتين جدا ويغض البصر جدا يقولها لازم اشوف كف ايدك وشعرك ورجلك .....والله انا ساعتها معلش في اللفظ مع اني عمري ما قلت كلمة مش حلوة  قلت لها " طيب ما يشوفك عريانة احسن " هو اية الحاجات الغريبة دي...
قلت لها ما تسيبك م العريس ده يا بنتي والله في عرسان كتير احسن منه وكمان متدينين عنه هو التدين بالدقن والجلابية وعلامة الصلاة طب والله العظيم انا اعرف ناس عاملين علامة صلاة بالتاتو
بس هي اصرت علي رأيها لانه اكيد لو اتجوزته هتكون تطهرت وربنا هيغفر لها ذنوبها وهتدخل الجنة ..!
الادهي من كدة بقي انه قالها هيلبسها كل اللي نفسها فيه بس جوة البيت مش بره طبعا وكمان اشترالها مايوة شرعي .....مش بقولكم فارس احلام شرعي

رحاب صالح في يوم الاحد 18يوليو 2010

هناك 38 تعليقًا:

  1. التناقض والاختلال الفكرى و الجهل بالدين والامراض الفكريه تنتشر فى المجتمع بشكل غريب البلد بتنهار كل يوم عن التانى طول ما الجاهلون يمتلكون طريقه اكل العقول

    ردحذف
  2. مش هقدر اعلق يا رحاب

    غير بأبتسامة (:

    يعنى هى لازم تكون يا كدة يا كدة

    ربنا يهنى سعيد بسعيدة (:

    مل صعيدى أصيل

    سألتينى عن لبنان ليه لبنان ابا بحب لبنان

    و قريب كدة أبقى اعمل بوست عنها

    تحياتى (:

    ردحذف
  3. صديقتك مغيبة عزيزتي وهذا التغييب لن يدوم طويلا ستصحو ان عاجلا ام اجلا خصوصا ان الانتقال في حالتها كان من النقيض للنقيض دون تدرج
    دمت بكل ود عزيزتي

    ردحذف
  4. انا مش متعاطفة معاها بمليم احمر و بتمنالها من كل قلبى تجوز واحد ماعندوش دم يضربها علقه كل يوم باسم الدين و يجوز عليها تلاته و يخونها كمان مع اى عدد من ما ملكت ايمانه و يحط جزمته فى وشها و يامرها بطاعته و يعيشها اسوا من الخادمة

    اللى يحصلها كده و يتغسل مخها بالطريقة دى و تتخلى عن ادميتها تبقى تستاهل معاملة الحيوانات بس ياريت الحيوانات ما تزعلش من كلامى

    ردحذف
  5. هههههههههه

    انا بقول يارحاب ساعه القدر يعمى البصر

    ومهما نتخيل فارس الاحلام لما القلب يدق

    انتى اكيد عارفه

    مدونه حلوة اووووووووى

    وبعدين قوليلى فين فى بلطيم

    انا من مواليد كفر الشيخ

    وعمى ساكن فى بلطيم

    يعنى بلديات ياقمر

    موضوع رائع وهادف وممتع

    بالتوفيق

    اشكرك

    تحياتى

    ردحذف
  6. السلام عليكم
    المتاجره باسم الدين
    وصكوك الغفران
    ما
    اكثرها
    هذه الايام
    اريد ان
    اقول حاجه
    انا كنت فى صراع من شاكله الكلام ده وكتبته فى العالم من فوق دراجه
    اخوان صوفيه سلفيه وكل واحد فيهم فى ايده مفتاح الجنه
    واللى عقدتك ملوثه

    وعليك ان تشهد الا اله الا الله
    وان محمد رسول الله
    وانى لازم اربى دقنى والبس جلباب ابيض ومصليش فى مسجد فيه قبر
    ولا ضريح ومحلفش بالبنى وكلام كتير قوى قلت ليه ياعامونا احنا ازهريه
    يعنى مش جهله يابنى
    قالى الازهر على خطأ واصحابه عليه ان يتوبوا ويمشوا على مذهب ابن عبد الوهاب
    والكثيرين على شاكلته
    وصراعات باسم الدين
    واللى ميرضاش
    يصلى ورا فلان علشان صوفى
    واللى يشتم على فلان لانه من انصار
    البنا ويخرج على الحاكم
    بلاوى والله بلاوى والاذان الواحد والاتنين
    المهم سيبك من الكلام ده
    الوسطيه فى الاسلام موجوده واللى بيحب يعثر على نفسه هيودى نفسه فى داهيه
    سلام

    ردحذف
  7. صدقيني حتى لو مش مذوقة حيجدها حلوة الناس دي لو شاف طرف شعر واحدة مش ح يعرف ينام الليل كله...دول ناس بيشوفو المرأة مش اكتر من وعاء...ذنبها على جنبها

    ردحذف
  8. والله زعلتينى يا رحاب

    بس دا طبيعى مع كل من جهل دينه سهل اوى يصطادو اى حد بيتكلم بالسان الدين بشكل حلو وطبعا الجاهل بينبهر بصرف النظر عن المضمون

    ولنفرض انها كانت عايشه الحياه طول وعرض وغافله وفاقت هل الجواز من حد منهم نوع من الطهاره او التطهير ليه مين قال ان دا من اسلامنا كفايه التوبه النصوحه لوجه الله خالصه ليه وحده وتحاول تصلح من حالها لله وحده وحده

    سبيها بكره تشرب لما تتكرع وتفوق
    على قفا محترم

    شكرا يا رحاب

    ردحذف
  9. الكلام اللي انت كتبتيه في شئ من الصح وحاجات غلط ايه المشكله ان يشوف اطرافها ووشها ده حقه الشرعي في الاسلام انا شايف ان هو ده الطبيعي هو اللي رايح يخطب واحده بيشوف منها ايه اكتر من كده ولو هي اظهرتت اكتر من كده يبقى حرام اما حكاية انه يتجوز اربعه ده مش شرط بس لو حصل مش حرام ولو انت مقتنعه ان تعدد الزوجات غلط يبقى انت مضيعه جزء من دينك او مش مؤمنه بيه انما مش اجباري يتجوز اربعه مفيش حاجه بتقول كده اما كونها لبست الاسود وغطت كل جسمها ايه اللي يزعل في كده بس ياريت ما يبقاش مجرد زي ليها يبقى سلوك وهو انت شايفه انه عيب ان واحده تتجوز واحد ملتزم بدينه ومربي دقنه وعلامة الصلاه في وشه مش تاتو يعني مسلم كويس

    ردحذف
  10. لا حول ولاقوة إلا بالله العلي العظيم

    والله عجايب ...

    هو ده الجهل بالدين
    ومافي وعي بالمره للأسف

    يارب صاحبتك دي يارحاب تلحق تفسها قبل فوات الأوان

    ربنا يهدينا للصواب جميعا

    ردحذف
  11. تجارة الدين غريبة الشكل والأطوار
    الكل يحب العبث بمسميات الدين والجهل الذي يطغو على الشعب ، الكل يتاجر ويفتي لا أحد يعلم الصواب من الخطأ .
    //
    من قال أن الزوج يجب أن يتزوج 4 لكي يكون شرعيا ، ما يعلمه الجميع أن الزواج من 4 يكون أحد شروطه أن يقوم بالعدل بينهم وإلا فبلا من تعدد الزوجات .
    //
    من قال أن يرى وجهها وكفيها ويديها وكعبها وأطراف شعرها ، وألا يوافق بدون هذا ، على ما اعلم أن تنكحوا ذات مال وذات نسب وحسب وذات جمال وذات دين وخيرهم الأخيرة ولم أعلم أن من الشروط الجمال فقط ، ثم بدلا من أن يراها هو فقد تكون المرأة من أقبح السيدات ولكنها سليمة الطوية وقد تكون من أجمل النساء ولكنها قبس من نار جهنم .
    //
    عملية غسل العقل وإلغاء التفكير من صديقتك هي السبب فالأولى لها أن تعرف ما هو الدين الإسلامي بدلا من أن تسمع لكل هرتلة وكلام فارغ وتصدق إنه من الدين .
    //
    تحياتي لكِ رحاب وتقبلي ردي ومروري

    ردحذف
  12. بصى الاول عاوزة اعتذرلك عن غيابى
    نيجى بقى للاخت صاحبة القصة دى
    مش مهم انها تتنقب ومش مهم انها تحب تتجوز واحد بمواصفات معينة يعينها على طاعة ربنا كل واحد حر
    المشكلة بقى فى الخلط بين مفاهيم الدين
    وكمان فى استغلال جهل الناس بأمور دينهم وزرع افكار غلط فى راسهم منها ان الواحد يطبق شرع ربنا ويتجوز اربعة
    مين اللى قال كده
    مين اللى قال ان ربنا فرض تعدد الزوجات
    غير كده كمان هو ممكن يشوف وشها ماشى لكن ايه الفكرة انه يشوف كعب وشعر وكف
    هو فيه ايه
    المشكلة فى العقول اللى بتسمح لناس ماعندهاش ضمير انها تلعب بيها

    ردحذف
  13. الناس دى حافظة دين ومش فاهمة
    وضايقتنى جدا افكار صاحبتك حقيقى
    الدين لازم نكون مقتنعين ونقول سمعنا واطعنا بس حكاية انها موافقة انه يتجوز عليها دى غريبة قوى
    شرع ربنا منقدرش نتكلم وحلال بس هى من حقها ترفض ومن حقها لو ده تم بدون رضاها انها تطلب الانفصال
    ده زوجات الرسول عليه الصلاة والسلام كان فى غيرة بينهم
    ازاى بيحاولوا يفهمونا انها المفروض ترضى ببساطة كده
    هى استحالة تكون بتحبه
    وكمان حكاية شرعها دى رأى فقهى فعلا بس على مااستوعب يعنى انه رأى غير معتبر

    تصدقى انا هامشى قبل مااغلط

    ردحذف
  14. عمرو يسري
    التناقض والاختلال الفكري والجهل بالدين والامراض الفكرية .....معاك حق اوووي خصوصا القنوات الدينية النتشرة بشكل مبالغ فيه وبتعرض مواد مشكوك فيها اساسا

    ردحذف
  15. Ramy
    لاء يا رامي انا صحيح اتكلمت بشكل ساخر لكن انا فعلا مستغربة ان الشكل هو اللي بيدفعنا لكدة لان عمر الشكل ما بيكون مقياس للحقيقة دوما ....والا كان كل واحد لابس شيك يبقي محترم وكل واحدة لابس حجاب تبقي محترمة ومؤدبة والبنت اللي بشعرها تبقي قليلة الادب ومتحررة .... ده قصدي ...ومستنية بوست لبنان

    ردحذف
  16. خواطر شابة
    اكيد معاك حق
    لان الصعود بسرعة معناه السقوط ايضا بسرعة ...والتدرج مطلوب ده حتي الاسلام لما انتشر انتشر بتدرج وليس مرة واحدة او بالقوة ...دمت بكل خير عزيزتي

    ردحذف
  17. تيرز
    حساكي متنرفزة اووي اوووي بجد
    برغم اني دايما شيفاك متعقلة جدا لكن انت معاك حق لان الدين في اساسه مش بالشكل ده

    ردحذف
  18. جايدا العزيزي
    والله بجد انت نورتيني وبجد بلديات دي مصدقتهاش .....!!!
    طيب مستنية منك رسالة ع الميل اعرف تفاصيل اكتر واية رأيك نتقابل ف العيد...؟

    ردحذف
  19. محمود
    هي فعلا متاجرة باسم الدين
    والاسلام يسر وليس عسر ولكن لمن يفهم

    ردحذف
  20. Tarkieb
    يمكن يكون معاك حق في اللي انت قلته
    خصوصا انهم شايفين الست مجرد وعاء فقط للرغبة والابناء ....مش حكاية دين او عنوسة

    ردحذف
  21. richardCatheart
    كلامك اكيد صح لكن المشكلة ان الناس فاهمة غلط , يعني احنا مش ملايكة ده حتي الانبياء كانت لهم اخطاء احنا بقي البني ادمين مش هيكون لنا اخطاء ...؟ المهم اننا نعرف الاخطاء دي ونعالجها
    لكن مش بشكل يزيد الطين بلة

    ردحذف
  22. لا حول ولاقوة إلا بالله العلي العظيم

    يا ما لسه هنشوف و ياما

    الله هو المعين

    تحياتى

    ردحذف
  23. eng_semsem
    لاء انت اللي للأسف مش فهمتني
    لاني انا هنا برصد من خلال حكاية بسيطة معني الدين في نظرة بعض الناس ومش كلهم , وانا بالعكس متدينة وفاهمة الدين كويس اووي والغريب اننا لما بيكون في خطوبة العريس بيشوف العروسة والعكس اكيد لكن حكاية شعرها والكلام ده مش موجود ولا له اساس الا لو كانت هي اساسا مش محجبة , اما بالنسبة لتعدد الزوجات فده في حالات معينه ولا تنسي الاية الكريمة " وان خفتم الا تعدلوا فواحدة " ولن تعدلو "
    اما الجلابية وعلامة الصلاة واللحية فده من وجهه نظري مجرد شكل المهم الاساس , وانا كنت بتكم بالشكل ده مش اي حد يكون عامل نفسه متدين يبقي متدين لاني قابلت ناس كتييير بالشكل ده وللأسف اتضح لي انهم في منتهي ....مش عارفة اقول لفظ مناسب لكن مستخبين وراء عباءة الدين بالشكل
    شكرا لكلامك

    ردحذف
  24. غادة
    هي خلاص اتجوزت
    ابقي فكريني لما نتقابل احكيلك الحكاية كلها
    وحشاني اووي يا غادة

    ردحذف
  25. IMSA
    اهلا بأول زيارة لك
    واحييك بشدة علي كلامك لانك في كل كلمة بتوضح لي ولللي يقرا كلامك انك انسان واعي وافهم
    تحياتي واهلا وسهلا بيك دايما

    ردحذف
  26. نهي صالح
    ازيك يا قمر ولا يهمك انت تيجي اي وقت وتنوريني ابقي بس طمنينا عليك
    انت اكيد معاك حق وانت فاهمة كويس وكلامك عجبني جدا جدا جدا
    لكن ده زي ما قلت جهل بالدين للأسف
    واحنا برغم القنوات الدينية الكثيرة جدا الا انهم يقدمون مواد ليست مضمونة واغلبها غير حقيقي للأسف

    ردحذف
  27. حفيدة عرابى
    اهلا وسهلا بيك ونرتيني يا قمر
    انت اكيد معاك حق بس ده جهل بالدين في الاول والاخر .....والمشكلة ان الناس فاهمة ان ده صح وبتتعامل علي هذا الاساس , غير ان مسألة تعدد الزوجات له اسباب معينه مش جواز وخلاص , ده حتي الرسول الكريم رفض ان زوج بنته يتزوج عليها ....
    احنا مش وجة مقارنه بالرسول اكيد ...لكن كل تصرفات الرسول فيها حكمة لينا ...ويا ستي اهلا وسهلا بيك ولا يهمك مش عايزاك تتنرفزي ابدا ...وآسفة لو كنت زعلتك

    ردحذف
  28. الشاعر الفنان أحمد فتحى فؤاد
    يااااااااااه ازييك اخبارك اية من زمان مش شفناك خالص ....
    حمدالله بالسلامة

    ردحذف
  29. رامي
    انا نسيت اقولك حاجة ...
    انا عارفة انكم مفيش الا زواج فقط وليس هناك تعدد ...انا فاهمة علي فكرة

    ردحذف
  30. طبعا ما فيش حاجه اسمها كده ..فارس احلام شرعي ازاي يعني
    هو طبعا التدين والإلتزام مش بالمظهر ولا بالشكل , ولكن طبعا الملتحي واللي بيلبس جلباية و عنده علامة صلاة ,مش معناه ان هو وحش ولا حاجه, لكن هو بيحاول بس يمشي على السنة , على فكرة فكرة ان هو يشوف وشها وكفها دي مذكورة في احاديث ممكن تتأكدي بنفسك وده طبعا حاجه كويسه لان في ناس ممكن تتجوز من غير ماتشوف العروسة مثلا

    ردحذف
  31. يالهوووى يالهوووووووووى هى مصدقة ومقتنعة فعلا بالجواز كده؟
    شوفى انا هقولك حاجه من ست سنين كده وانا اخر سنة جامعه عملت العملة دى اديتها سواد كاحل من ساسي لراسي وكنت مأمنة باللى بعمله بس مش لدرجة غسيل المخ كده والجواز بالشكل ده لالالالالا كان عندى شوية عقل بتوعي هما اللى رجعونى بعد تلات سنين من هذا السواد لنفسي كما كانت او ع الاقل انى اللى بره يبقى شبه اللى جوا
    هتاخد وقتها وتفوق وتعرف ان الاسلام مش كده وان التوبة من الذنوب مش كده وان مش كل اللى فات من عمرها كان ذنوب
    بس يارب تفوق قبل فوات الاوان

    ردحذف
  32. مع احترامي الكامل لوجهة نظرك الحاله الاستثنائيه لعدم تعدد الزوجات عدم العدل يعني الطبيعي التعدد اما لو الواحد مش هيعدل الاحسن عدم التعددوده معنى الايه باداة الاستثناء الا وعلماء الشريعه بيقولها كده (الاصل في الاسلام التعدد)اما كون انسان مربي لحيه ومش ماشي على تعاليم الاسلام ده مش صح سواء زوج او صديق او جار وزيه المنقبه اللي مش ماشيه على الدين اما لو اجتمع التدين مع السلوك هيبقى نموذج جيد للاسلام

    ردحذف
  33. Hu-man
    اهلا وسهلا بيك
    التدين في حد ذاته شيء حلو لكن احنا للأسف المظهر المتدين عندنا هو الغالب بدون الجوهر , واكيد لازم العريس والعروسة يشوفوا بعض وانا عارفة ان ده شيء اكيد وقريت احاديث تنص علي هذا
    شكرا لمرورك

    ردحذف
  34. رحيل
    سارة ازيك عاملة اية ...؟
    انا مش بعترض علي التدين انا بعترض علي الاتباع بدون فهم , فيها اية لو فهمنا الدين صح اتبعنا الدين صح , عمر ما اللبس كان مقياس للتدين , لكن الداخل هو الاساس
    شكرا يا سارة

    ردحذف
  35. eng_semsem
    انا هفضل اقول اني برصد حالة بتحصل كتير وحصلت لناس كتير اعرفهم ....تدين ظاهري فقط ...يا ريت يكون تدين حقيقي عن فهم ووعي بالدين ....
    تعدد الزوجات له شروط واسباب مش بس زواج وخلاص
    وانا اذا اختلفت معك في الرأي فليس معني هذا أن اتشاجر معك فكل شخص حر في رأيه ما دام لا يجرح الاخرين ...
    تقبل كلماتي وشكرا لك

    ردحذف
  36. أختي الكريمة..

    هذا هو تعليقي الأول هنا...

    أنا صراحة لن أنقد الآراء الدينية التي تحملها صديقتك (إن جاز وصفها بالدينية ).. ذلك أنه يسهل جدا على أي دارس للعلوم الشرعية توضيح مدى تطرف هذه الأفكار، وبُعد معظمها (ولا أقول كلها) عن الإسلام المعتدل الصحيح..

    لكن ما أحزنني حقا هو اللهجة الساخرة التي طُرح بها الموضوع.. فأفترض أن تكون الشفقة هي الغالبة على مشاعرك تجاه صديقتك والتفكير جديا في كيفية إنقاذها من براثن هذه المصيبة التي قد تؤدي بها إلى ما لا تحمد عقباه لباقي حياتها.. فمن المعروف يقينا تشدد الملتزم في البداية بما يزيد عن طاقته غالبا ومن ثم ينزع إلى الاعتدال بالتدريج، هذا لو كان مصدر علمه معتدل... فما بالنا ومصدرها -كما هو واضح- من أصحاب التشدد الذي يخالف اعتدال الدين وتوافقه مع الفطرة البشرية...
    لذا -أؤكد- أن صديقتك في أمس الحاجة إليك، فإن لم تكن لديك العدة للإنقاذها فالجئي لأهل العلم الموثوقين الذين اشتهروا باعتدال فكرهم...

    ولا يفوتني أن أبدي حزنا مضاعفا لبعض إخواني المعلقين السابقين الذين فيما يبدو وجدوا فرصة ذهبية في هذا النموذج الذي طرحتيه لإخراج غضبهم وسخريتهم وشماتتهم في بعض ذوي الأفكار والمدارس الدعوية الإسلامية.. فليس هذا الأسلوب الأمثل يا إخواني في النقد.. وإنما تواجه الحجة بالحجة والرأي بالرأي...

    أرجو أن تتسع الصدور لما قلت، واعذروني إن كنت سقطت فيما أحذر منه من حدة الأسلوب.. مع تحياتي وتقديري للجميع.

    ردحذف
  37. ماجد القاضي
    علي فكرة انا لما اتأخرت عن الرد كنت مشغولة مش عشان اضايقت وحتي لو اضايقت لازم اوضح واقول انا اضايقت ليه واجمل شيء فيا اني بحب اسمع النقد اووي ...
    انت معاك حق اني طرحت الموضوع بسرخة لكن لان كان عندي اسبابي اني كل مرة اتصدم صدمة قوية لدرجة اني بقيت احس ان الناس بتلعب بالدين مش معني ان شخص بيصلي ويوصوم ويأي الفروض انه انسن متدين ولا الشخص الملتحي او يغض بصره عنك انه متدين احيانا كتير بيكون العكس ...يمكن مشكلتي اني فعلا مقابلتش الا الناس المتدينين ظاهريا فقط ولم اقابل بعد الاشخاص الحقيقين فعلا واللي يعرفوا الدين صح , مش بس مجرد كلام ومظهر ...
    صديقتي اتجوزت واتجوزته للأسف بسرعه وده مش حلو خالص لان مهما كان لازم يكون عندك الوقت للتعرف علي الشخص وفترة الخطوبة معمولة لده ......دلوقت للأسف هي تعاني ولكنها تدعي السعادة ....
    يارب تكون فهمت قصدي وتنورني دايما بكلامك وتعليقك وصدقني انا مش هزعل ابدا ما دمت تتكلم باحترام

    ردحذف
  38. رحاب الجميلة
    كل عام وانت بكل الخير

    اولا موضوعك كتير مهم .. ولازم ناخده بجدية ..

    لابد اى شيء عن الدين لا نأخذه الا بمحمل الجد

    للأسف ما يدخلة بعض المغرضين على الدين هو ما يسء لنا قبل الدين

    ليس معنى لبس السواد في السواد .. انه علامه للجنون واتخاذ طريق لا رجعه منه وبعض الكلمات استغفر الله العظيم الى آخرة .. يدل على اشياء مقززة

    هذا الذي برأسنا هو عقل لنفكر به
    لقد قال الله تعالى
    وهديناه النجدين..
    اى الطريقين الخير والشر ليختار طريقة
    وهناكمن حاول افساد الدين بما يطلقونه على انفسهم اخوان مسلمين .. وهم جماعه الله اعلم به انا لا اعلم عنهم شيء ولكن كل ما اعرفه جيدا وهو ان نمشي بما قاله الله تعالى ورسوله الكريم وخير الأمور الوسط .. وان نفعل مانحن مقتنعين به انه هو الصواب ولا نتبرج حسب حدود الاسلام وشروطة
    وان نذكر الله كثيرا ولا نسخر من بعضنا حين نراه ملتزم بتعاليم دينه
    اما عن الطوائف التي تشذ عن القاعدة فليس لنا دخل بهم

    اما من يرتدين النقاب عن اقتناع فلهم احتراهم طالما انهم لا ينتمون لهذه الطوائف ..

    موضوعك كتيييييييير مميزربنا يوفقك

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين