الأحد، 15 يوليو 2012

رمضــــــان ....آخر


قبل هلال رمضان بأيام
تعليق الزينة واللمبات الملونة....
أفرع النور الصغيرة التي تزين شرفات المنازل كانت تنبئنا بوصل رمضان
ومع صلاة العشاء الاخيرة قبل حلول الشهر  كنا نتكدس في المساجد منتظرين بشوق حلول الشهر الكريم 
كنا نشتاق دوما لصلاة التراويح والقيام
أقول لها "  سهام ....لازم تعدي عليا ف صلاة الفجر "
ترد ببساطتها المعهودة " هرن عليكي وانا ادام البيت "
في المسجد نقف بجوار بعض " نسرين , سهام ,شريهان , رباب , آمنة , مروة, آية , ياسمين ,.........
في صف واحد دائما أو صفين خلف بعض ....
ما بين الركعات والسجدات  نشتاق لشربة ماء ....
فيقولون لي " انت بيتكم قريب  روحي جيبلنا ازازتين مية ...."
ونأتي بالمياة  لنشرب بين الركعات ....وندور في أرجاء المسجد لنصلي هنا وهناك........
وأبتعد عن المراوح بسبب الحساسية .....فأكون مصدر تندر بينهم.....
ولكن حتي مع المراوح يكون الجو خانق وحار والعرق يغمرنا  بسبب الزحام الشديد فتكون علبة مناديلي الورقية ممزقة بينهن ...
وتعودنا  منذ سنوات .....علي هذا....
رنات قبل صلاة العشاء ......
مياة مثلجة من بيتنا .....
رنات قبل صلاة الفجر وانتظارنا لبعضنا البعض  حتي نذهب للمسجد سويا.....
قيام العشر الآواخر من رمضان ......والمكوث في المسجد إلي الصباح التالي .....
احيانا نخرج للسحور والعودة للمسجد او لا نتسحر  كثيرا فتكفينا المياة والصلاة.....
يوم وقفة العيد يكون فرحة أخري ....كفرحة انتظار رمضان....صحيح نحزن لفراق الشهر ولكننا نكون بشوق للقاؤه مره أخري العام التالي......
مصلي ونبدأ في التحضير لليوم التالي ....من أول صلاة الفجر ولبس ملابس العيد والذهاب للساحة التي سنصلي  فيها صلاة العيد
وأيضا بنفس الطريقة من رنات ورسائل وانتظار بعضنا البعض  والذهاب سويا والوقوف للصلاة بجوار بعض......
كم هي الحياة جميلة .....
وكم هو جميل أن تجد من يشجعك علي التقرب لله.....
كم كنت سعيدة ..........وقتها......
ثم كان رمضان آخر......
ماتت سهام ميتة مفاجأة لنا كلنا.......
يا الله لقد رأيتها قبل وفاتها بيوم ...بنفس الابتسامة ...بنفس الروح ...بنفس البشاشة  والبساطة ...بساطة طفلة علي اعتاب الشباب ....
كم كانت صدمة لنا جميعا......
بعدها بفترة غير كبيرة......
تزوجت شريهان......
دخلت إحداهما دنيا ....وخرجت منها آخري......
آتي رمضان......
بغير سهام....
بغير شريهان....
بغيري أنا ....." وقتها كان عندي امتحانات قضيت ثلثي رمضان فيها "
نسرين كان عندها شغل ونبطشيات ف المستشفي ....
والباقون......؟!!
كانوا يسألون عني ...عنها....عن من غاب....
إختلف رمضان هذا....فقد رحل من رحل بإرادته  ......ومن رحل بإرادة الله .....
في رمضان هذا لم أشعر بطعم رمضان الذي تعودته....
هذا رمضان آخر غير الذي  كنته منذ سنوات.....
لم أشعر به.....لم أتذوقه كما كان......
هذا العام صممت أن يكون الشهر كما كان من قبل....
صحيح بدون سهام وشريهان ....
لكن سيكون قربنا من الله فيه كأنهن معنا....
اشتريت لي اختي لمبات ملونه باللون البنفسجي لوني المفضل ....سأعلقه علي شرفة المنزل ....
وفانوس كبير  ....سنعلقة ما بين  بيتينا " القديم والجديد"....
نويت أن يكون قرآني هو ونيسي طوال اليوم والليل ....
والمسجد سيكون له نصيب أكبر مما مضي في صلاة التراويح والقيام والفجر....
اشتقت لرمضان....واشتقت للعبادة فيه....
انا  ألوم نفسي علي رمضاني هذا الذي لم أستطع بسبب ظروف ما أن أوفيه حقه
وأما رمضان هذا فقد حضرت له كل شيء ليكون.......
 رمضــــــان آخــــــــر 

وكل سنة وانتم طيبين ورمضان كريم 


 
 

هناك 10 تعليقات:

  1. كل سنة وانتى طيبة يا قمر
    ورمضان كريم عليكى ان شاء الله
    ويكون رمضان اكثر طاعة وتقربا الى الله
    ربنا يعينا جميعا على الصيام والقيام ان شاء الله

    ردحذف
  2. كل سنة و انتى طيبة
    كل سنة و انتى بخير على طاعة ربنا
    ز السنة الجاية تكونى ؟؟؟؟؟؟؟؟؟؟؟؟

    طبعا مفهومة

    تحياتى

    ردحذف
  3. جميل قوي الكلام ورقيق ... قعلا روح شفافة في رمضان

    كل سنة وأنتي بألف خير يا رب وبعودة الايام :)

    ردحذف
  4. كل سنة وانتى طيبة يا رورو

    جميلة اوي صحبتكم فى رمضان وان شاء الله هتتعوض
    والله يرحم سهام ويدخلها فسيح جناته ويكرم شريهان
    وانتى وباقي صحباتكم ربنا يكرمك بالازواج الصالحين ..

    تحياتى :)

    ردحذف
  5. صباح الغاردينيا رحاب
    رمضان مضى ورمضان آتى بشر أفتقدناها
    وبشر أخرى ملئت حياتنا ..
    هي مشيئة الله وهو القدر ..
    ولكن يدفئ أرواحنا أن يبلغنا المولى الشهر الفضيل
    لنعيش أجوائه الروحانية "
    ؛؛
    ؛
    كل عام وأنتِ بخير
    رمضان كريم
    لروحك عبق الغاردينيا
    كانت هنا
    reemaas

    ردحذف
  6. في الأول كل سنة وانتي طيبة

    أكيد كل فترة في حياتنا بتحصل فيها اختلافات .. بنسيب حاجات اتعودنا عليها ونتعود على حاجات جديدة .. مفيش ثوابت ومفيش حال بيفضل زي ماهو .. ده فانون الحياة الأساسي

    بالرغم من كدة ف كل مرحلة في عمرنا نقدر نلاقي الحاجات اللي تفرحنا أو نفرح بيها غيرنا

    وفي الأول والآخر تتعد الطرق والتقرب إلى الله واحد


    من نوعية البوستات اللي بتخلي الواحد يسرح ويفتكر حاجات جميلة

    تسلم إيدك

    ردحذف
  7. جميل رمضان وذكرياتة ونفاحتة كل سنة وانتى طيبة وكل حبيبك بالف خير ياااااااااااااااااااااااارب :)

    ردحذف
  8. وانتي طيبة يااااا رب ...

    انا برضو رمضان اللي راح مش راضية عليه خالص ...

    ياااا رب أقدر أعوض دا بشهر رمضان دا ...

    مووفقة يااا رب ان شاء الله :)

    ردحذف
  9. أنا بقى رمضان واقع منى من خمس سنين تقريبا

    بس مين عارف
    ربنا يرزقنا برمضان جميل

    تحياتى
    وكل عام والأسرة وكل الأحبة فى خير وأمن وأمان

    ردحذف
  10. كل سنه وانتي طيبه رحاب ,ربنا يرحم صديقتكم ويبارك في الموجودين ويحفظ اللمه الحلوه ...
    رمضان كريم عليكِ وعلى اسرتك وربنا يفرح قلبك يا رب.

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين